Ua maea nei ona fausia le talita fou a le Iuni Lakapi a Amerika Samoa, e pei ona faalauiloa ai i le vaiaso na te’a nei a’o toe tolu ai vaiaso maea le taamilosaga o loo faagasolo ta’i to’a 15 o loo faagasolo i le taimi nei i le malae taalo a le VA Stadium i Tafuna.

Mai le tele o vaiaso o faalogoina pea leo faasea ma le tomumu o le atunuu aemaise ai o nisi o kalapu lakapi, i le faaaoga lea na o le upu talita i taimi uma lava e faia ai le taaloga o le talita ae leai se tino, o lea ua aloaia le maea lea ona fausia o le talita fou e sui tulaga ai le talita tuai a le alii kovana sili, o ia foi lea o le taitaifono o le Iuni Lakapi, lea ua faia le faaiuga e tumau pea i le au a Nuuuli.

O le faaiuga na faia e kovana Togiola Tulafono e tumau ai pea le talita ia Nuuuli, i le mae’a ai o le faalavelave lea na fasi ai e ni alii lakapi se toalima mai Nuuuli le alii laufali o Ponifasio Vasa i le masina o Iulai 2011 ma manu’a tigaina ia.

Mai alii lakapi e toa 5 na tuuaia e le malo i lea mataupu, ua faamaonia moliaga o le faaoolima faasaga i le isi toafa ae sa toe faaui i tua le moliaga faasaga i le isi toatasi, ma le faamoemoe o le malo latou te toe failaina, peitai e oo mai i le taimi nei e le’i toe failaina lea e le malo moliaga faasaga i le alii lea.

O le lua ai lenei o vaiaso talu ona auina atu le talita i le malae taalo i Tafuna i aso Toonai i taimi o taaloga, ma o loo tumau pea ona mau i le au a Fagatogo.

O le i ai o le talita i le au a Fagatogo, o le isi lea faamalosiau i tama taalo e pei ona taua e le isi sui o le au, le susuga Kapisi Ga’opo’a.

“Ua avea le i ai o le talita ma itu ua atili ai ona faamalosi tama e manumalo pea,” o le saunoaga lea a Gaopoa.

E ui o lea faatoa lua vaiaso talu ona i ai le talita, peitai na amata mau mai lava ia Fagatogo i le amataga o le taamilosaga seia oo mai i le taimi nei.

Na taua e Gaopoa, o le tele o au malolosi o le taamilosaga na manumalo ai Fagatogo e aofia ai au e lua a Nuuuli, Taputimu, Pago Pago, Malisi, Laulii ma Fagasa i le vaiaso na te’a nei.

“Toe lua matou taaloga o loo totoe, toe o Leone o le vaiaso fou (vaiaso nei) ma Lalomalava i le taamiloga faai’u o le taamilosaga, ma ua matou sauni foi i a matou taaloga faai’u ia e lua o le taamilosaga,” o le tala lea a Gaopoa.

O le aso Toonai foi na te’a nei na faalauiloa ai le lisi o tama e toa 20 ua filifilia mo le au faavaomalo a le Talavalu, lea ua sauni atu mo le taamilosaga taito’a 7 e faia i Ausetalia i le masina fou, e aofia ai sui e toalima mai le au a Fagatogo.

O i latou ia e aofia ai Esau, Henry, Sefo, Faagata Jr ma Sipo.

Na taua e Peseta Sa Mavaega le sui o le Iuni Lakapi e faapea, toe tolu vaiaso maea le taamilosaga o loo faagasolo i le taimi nei, ma ua i ai le fuafuaga o le au lava e maea le taamilosaga e leai se faiaina pe tele foi ana manumalo, o le au lena o le a siamupini, e oo foi i le au e mau ai le talita i le taaloga faai’u, o le au lava lea o le a mau ai le talita mo lenei tausaga.