Mae’a le fono itumalo Tualauta mo se isi latou Senatoa

O le faaiuga o le vaiaso na te’a nei na fono ai le itumalo o Tualauta, mo le sailia o se isi na te faaauauina le isi nofoa o le itumalo lea na nofoia e le afioga i le Sa’o ia Letuligasenoa Soli ua tu’umalo.

 

Na faatumulia le maota fono a le afioga i le fa’alupega ia Fonoti Tafa’ifa Aufata, i faauluuluga o le itumalo i le aso To’ona’i na te’a nei, mo le tau sailia o se tasi e tula’i mai i le nofoa o le itumalo.

 

I se faatalatalanoaga ma le afioga i le ali’i Senatoa ia Magalei Logovi’i i le amataga o le vaiaso nei, na faamaonia mai ai e Magalei le mae’a o le fono a le itumalo, ma ua i ai le manatu o le afioaga o Vaitogi lea o le a filifili mai ai se tasi e nofoia le nofoa.

 

Na taua e Magalei e faapea, o i laua e toalua ua tuu atu i ai le filifiliga poo ai e sau mai Vaitogi e aofia ai le afioga ia Ulugaono W. Tonumaipe’a Allen ma le afioga ia Gaea Perefoti Failautusi.

 

Ae talu ai se faafitauli o lo o tulai mai, ona e le’i lesitalaina le suafa matai o le afioga Ulugaono, ua taoto atu ai le faaiuga ia Ulugaono e pei ona saunoa Magalei, e tatau ona lesitala muamua lona suafa matai ona faatoa mafai lea ona ia tauaveina le nofoa.

 

“Afai e mae’a le kerisimasi ae le’i lesitalaina lava le suafa matai o Ulugaono, lona uiga o le a tula’i mai Gaea na te tauaveina le nofoa o lei tumalo,” o le saunoaga lea a Magalei.

 

Sa ia taua fo’i e faapea, e le toe fono le itumalo i le mataupu lenei, ae o le tuana’i ai o le Kerisimasi o lo o loma nei ona faalauiloa loa lea o le ua sauni e faatauto mo le nofoa o le itumalo, pe a tauaofia le fono i le masina fou o Ianuari, 2014.

Comment Here