Vaega: 150

Taeao manuia, i le mamalu o le atunu’u, ae maise fo’i o i latou o lo’o alaala ma papaa’ao i atunu’u i fafo, fa’amalo le soifua, malo fo’i le onosa’i i faiva ma tiute o lo’o feagai ai i lenei aso. E i ai le fa’amoemoe o lo’o aoina le masina i lou soifua laulelei. E ao ai ona o tatou momoli la’au i foga’a ma sunu’i lapalapa o malo i le Atua Soifua, aua o ia o lo tatou malupapa ma lo tatou malosi’aga i mea uma. Ae o le vi’iga ma le fa’amanu, ia tatou fa’afo’i i aso uma o lo tatou ola.

Ae ia manuia lou alo faiva i feau ma galuega o le a feagai ai i lenei aso, ae alo maia, o le vaega mulimuli lenei o la tatou tala Lupe o le Filifili. E i ai pea le fa’amoemoe, ua i ai se a’oa’oga lelei o la tatou tala mo i tatou. O a lava fa’afitauli ma faigata e o’o mai, ia tumau pea o tatou loto i le Atua Soifua, ae maise o nai o tatou aiga. O fea fo’i o lo’o e alaala ai, o oe lava o le lupe o le filifili, e le o oe o se lupe o le ta’alaelae, aua ua i ai lou fa’asinomaga i totonu o lou aiga.

O oe fo’i o le lupe o le filifili i le aiga o le Atua, aua ua i ai Ekalesia o lo’o e galue ai, o oe fo’i o le lupe o le filifili aua ua i ai lou atunu’u ua fa’asino tonu i a te oe e te sapi ai ma e alala ai i lona matagofie. O oe fo’i o le lupe o le filifili, aua ua i ai lou fa’asinomaga, o lou aiga, o lau gagana, o lau aganu’u ma ou ‘ele’ele ua fa’asino tonu ia te oe, e le o tatou la o ni lupe o le ta’alaelae, e leai, o tatou uma lava o lupe o le filifili. Ae ‘aua lava ne i galo i o tatou loto, ia o tatou fa’atuatua pea i le Atua, o ia o le Alefa ma le Omega, o ia o le Amataga ma le Gata’aga o mea uma lava.

Ia o tatou maua le loto maualalo, le agamalu, le onosa’i, le  fa’apalepale, le loto fa’amagalo, aemaise o le loto alofa, aua o uiga lelei uma ia, o lo’o finagalo le Atua, ia o tatou ola ai i le lalolagi nei. Aua po’o le a lava le tele o le o’a ma le tamaoaiga o lo’o tatou maua, ae fai mai le upu a le tupu o Solomona, e leai se uiga, o mea e ‘ai e le matagi, e leai fo’i se mea fou i lalo o le la, aua ua leva ona i ai. O le a le aoga, o nei mea uma, ae maumau ai lo tatou ola, ae ia o tatou fa’afo’i le vi’iga ma le fa’afetai i le Atua e le aunoa, o ia e ana mea uma lava.

E i ai lo’u fa’amoemoe, ua maua se a’oa’oga lelei i la tatou tala, Lupe o le Filifili, fa’afetai i le tapua’iga a le atunu’u, o le a fo’i se upu ua le tau tamali’i i lau faitau a’o fa’agasolo la tatou tala, ia malu ave i fale i lou finagalo, o le taumafaiga lava ina ia fa’apupula manino le uiga tonu o la tatou tala.

Ua fa’asolosolo pea aso o le olaga, ua maliliu uma tagata matutua o le aiga, ae ua tula’i mai fanau e tausia le aiga. Fai mai, na i’u lava ina avea Vaitimaleata ma matai Sa’o i totonu o lona aiga. E ui lava ina fa’apea o le tama’ita’i, ae ua fa’ae’e i ai e lona aiga le suafa matai ma o le Sa’o fo’i lea o lona aiga, ina ua maliu Petelo.

Na taumafai Vaitimaleata e nofo Samuelu i le aiga, ae na sau le tali a Samuelu, e fai lava ma asiasi mai i Samoa, ae e sili pe a sauni ia e nofo. Ua malilie uma i ai fanau a tuagane o le tina o Vaitimaleata le lo’omatua o Salamasina e nofo Vaitimaleata e tausi le aiga. Fai mai, o se aiga sa nonofo fealofani tagata uma, o se aiga sa fetausia’i i ona itu uma, o se aiga fo’i sa nonofo filemu tagata uma, e leai se mea e ga se ina ua nofo mai Vaitimaleata i lona aiga.

O totonu fo’i o le nu’u, e leai se mea na fa’aletonu, leai se mea e tasi na ga se, aua na fa’atino e Vaitimaleata lona tiute e le gata i totonu o lona lava aiga, ae ua fa’asalafa atu i le nu’u atoa. A’o le i maliu le tina o Vaitimaleata, sa maua e Salamasina le avanoa e opo ai ma fusi le tama ulumatua a Vaitimaleata ma Mikaele lea ua fa’aigoa i le igoa o le tuagane lona lua o Salamasina, o Lupematasila.

Ua toe fo’i mai Samuelu i le aiga, fa’apea ma lona to’alua ma le la fanau, ma ua suitulaga i a Petelo, e ala lea i le fesoasoani malosi i a Vitimaleata i le faiga o mea uma o le aiga. Ua le toe i ai se fa’amisamisa o Samuelu na i ai, a’o taule’ale’a, aua ua matua. Ae e o’o mai i aso nei, o lo’o manatua pea e Samuelu nai ona matua, le toeaina o Paulo ma le lo’omatua o Eseta. O le upu lava a le lo’omatua a’o soifua, “Va’ai lava lo’u lima e, o lo’u lima e le i lavea ai lava se tagata.” Ua maligi ifo loimata o Samuelu, ina ua ia toe manatua uiga fa’agalo gata o si ona tina o Eseta.

Soifua!