E leai ni ‘au lakapi a alii mai Apia o le a tauva i le taamilosaga taito’a 7 a le Mosooi, lea ua faamoemoe e faia i le faaiuga o le vaiaso nei i le malae taalo a le malo i Tafuna, sei vagana ai au e lua a tamaitai lea na taunuu mai i le taeao ananafi i le malaga a le Lady Naomi.

O au a tamaitai e o mai i le kalapu a Apia ma Moataa.

Na maua le avanoa e fesiligia ai e le Samoa News se sui o au lakapi ia ua malaga mai, e tusa ai o a latou tapenaga mo lenei faamoemoe, ma na taua ai e le tamaitai o Olivia e faapea, o tamaitai ia ua malaga mai, o lo o taalo i latou i taamilosaga o lo o faia i Apia a latou Iuni Lakapi, ma ua lava lo latou iloa i le faatinoina o le taaloga.

“E ui lava foi o le manumalo le autu o le malaga mai, ae o le isi taua, ia maua ai le avanoa e feiloai ma faamasani ai au a tamaitai i le teritori nei, mo le faalauteleina o le tomai i lenei taaloga mo le lumanai,” o le saunoaga lea a Olivia

E lei mafai ona auiliili mai le mafuaaga ua le mafai ai ona auai mai au mai Samoa mo lenei faamoemoe, na pau le saunoaga Falefata, “ua le avanoa mai au a le Iuni Lakapi a Apia sa tuu atu i ai le valaaulia.”

E lua au a tama ma le au e tasi a tamaitai mai le kalapu lakapi a Apia na tuu i ai le valaaulia e malaga mai, ona sa i ai lo latou faamoemoe mo sa latou malaga taamilosaga mai i le teritori nei i le faaiuga o le masina nei.

E pei ona silafia, o le au a Vaiala Ulalei o lo o umia le siamupini o le taamilosaga a le TMO Marist 7 lea na faia i le sisiga fu’a na mavae atu, ma sosola ai e le gata o le Ipu autu ae o le faailoa tupe e $10,000.

I se fesootaiga ma le faiaoga a le au lakapi a Vaiala Ulalei, susuga Rudy Leavasa i luga o le telefoni i le vaiaso nei, sa ia taua ai le pisi o lana au i taamilosaga taito’a 7 o lo o faagasolo i Apia i le taimi nei, aemaise ai le toe sauni atu o lana au e puipui lona tulaga siamupini i le taamilosaga taito’a 7 a le Marist Sevens i le masina fou.

O le au a Vaiala na manumalo i le isi taamilosaga taito’a 7 lea na faia i le Apia Park i le vaiaso na te’a nei, ina ua manumalo ia Vailele i ai e 21-14.

Talu ai ua le mafai ona malaga mai ni au mai Samoa, ua faia ai loa foi ma ni suiga laiti i le taamilosaga ua faamoemoe e faia i le faaiuga o le vaiaso, lea o le a na o le aso Toonai lava e faataunuu ai le faamoemoe e pei ona saunoa Falefata.

“O le faamoemoe la lea ua i ai, o le a na o le tasi le aso o le taamilosaga, na o le aso Toonai lava, e amata lava i le taeao i Pool games, ae o le aoauli e faagasolo ai loa sailiga siamupini mo vaega e tolu,” o le saunoaga lea Falefata.

Ae tusa lava pe malaga mai au mai Apia pe leai foi, e le o faatamala ai kalapu lakapi eseese i le atunuu i a latou tapenaga, e pei ona vaaia i le tolu vaiaso talu ai i soo se malae i afiafi o aso taitasi.

E pei ona silafia, o le au a Fagatogo lea o le a sauni atu e puipui lona tulaga siamupini o le taamilosaga a le Mosooi i le tausaga na te’a nei, ma ua vaaia foi le lava tapena o le au mo le taamilosaga.