O le siitia o le tautua a le Faalapotopotoga o le Eletise ma le Suavai (ASPA), o se lu’itau lea ua folasia e le Maota o Sui, mo le nofoaiga fou ua faafoea nei lenei auaunaga. O lenei lu’itau, ua aofia ai le faaleleia o nisi o tulaga o lo o faaletonu e pei o le motusia soo o le eletise, faaletonu le suavai taumafa, tuu i lalo tau o le eletise ma le suavai, ma ia silasila toto’a i ni isi o aiga e le o oo atu i ai le eletise i latou maota ma laoa.Na taua e le tamaitai faipule ia Vui Florence Vaili Saulo i le iloiloga a le maota o sui ma le pulega a le ASPA i le Aso Lua na te’a nei, o lo o i ai ni isi o aiga i totonu o lona Itumalo e le o ola le eletise i o latou fale, ae o ni isi o aiga e vaivai le tamaoaiga ua latou le gafatia le maualuga o le tau o le eletise ma le suavai.Na taua e Vui e faapea, na te le lagolagoina le fuafuaga a le ASPA e pei ona faalauiloa i se taimi ua mavae, mo le fausia o se tane vai i totonu o lona itumalo, ona e i ai lona talitonuga e le saogalemu mo nai aiga o lo o nofoia lea vaega o le atunuu.Na fesiligia e le Sui Fofoga Fetalai ia Talia Faafetai Iaulualo le mafuaaga e ala ai ona faaauau pea faasilasilaga a le ASPA ina ia faapuna suavai. Na ia fa’aalia lona le malamalama i le mafuaaga e ao ai e le ASPA le $12 i le masina mo le faamamaina o le suavai, ae o lea lava e manaomia ona faapupuna muamua le suavai faatoa taumafa ai.Na faamanino e le Pulesili o le ASPA ia Utu Abe Malae e faapea, e mafua ona faaauau pea lea faasilasilaga, ona ua faamaonia i suesuega, ua sao suavai ia o lo o to’a i luga o le eleele i lalo i le manava o le eleele lea o lo o pamu mai ai le suavai ma faaaoga mo le fofoga taumafa, e mafua lea tulaga ona ua le lava faamama i lalo o le manava o le eleele e puipuia ai le suavai mai faaletonu nei, ma tulai mai ai le faaletonu.Na taua e Utu e faapea, ua fautuaina e le AS-EPA ia le ASPA e tusa ai o lea faaletonu, ma e ono tele se avanoa e faasala ai e le AS-EPA le ASPA ona o lea faaletonu, ae ua i ai ni isi o fuafuaga e pei o le fausia o ni isi tane vai e fesoasoani i le fofoga taumafa o le atunuu.Na taua e Talia e faapea, o le faafitauli o lo o tulai mai, e le gata o lo o totogi e tagata pili i le ASPA mo le faamamaina o le suavai, ae o lea foi o lo o alu a latou tupe e toe faatau ai faguvai mai faleoloa, ona e le o lelei le suavai taumafa a le ASPA.Ae na taua e le faipule mai Aunuu ia Talaimatai Elisara Su’a e faapea, o le vai o lo o i ai i Aunuu, e lua lava mea o lo o aoga i ai, o le faaaoga mo le suavai lafoa’i, toe aoga e taeele ai tagata, a’o se upu i le inu, e misi atoa, pau le mea lea ua tua i ai Aunuu, o le latou vaieli lea e finau mai le AS-EPA ma le ASPA e leaga, ae talitonu tagata Aunuu, o le vaieli lea o lo o umi ai lo latou soifua.O ni isi o faipule e aofia ai Lemapu Suiaunoa Talo; Fatulegaee Mauga; Puleleiite Li’amatua Tufele Jr; Vaetasi Tuumolimoli Moliga ma Maugaoalii Leapai Tusipa Anoai, sa latou talosagaina le pulega a le ASPA ina ia silasila toto’a i faafitauli o lo o feagai ma latou itumalo ona o le tautua a le suavai, suavai lafoa’i, atoa ai ma le eletise i le motusia soo.Fai mai faipule, afai e tigaina tagata e totogi pili i le ASPA ae faaletonu le tautua a le ASPA i le atunuu, lona uiga e i ai le mea o lo o faaletonu, ae na saunoa Utu e faapea, e tele ni isi o suiga o lo o faamoemoe e faia mo le faaleleia o le tautua a le ASPA i le atunuu, ma o lo o i ai le faamoemoe o se taimi o i luma e tatau ona faataunuuina ai nei suiga lelei.