Ads by Google Ads by Google

Lu’itau taitai o le ASPA e saili auala e faamama avega ai i tagata

E 6 masina lea ua tuuina atu e le afioga i le Kovana Sili ia Lolo Matalasi Moliga, i le Komiti Faafoe fou a le Faalapotopotoga o le Eletise ma le Suavai (ASPA) lea ua maea ona ia tofia, latou te faia ai se gaioiga e faaitiitia ai le tau o le eletise.

O lea lu’itau na faalauiloa e le alii kovana i le taimi na faatautoina ai Alii mautofi mai Itumalo ma Falelima i le taeao ananafi, ina ua oo lana saunoaga i le tulaga e tatau ona i ai le soifuaga o aiga, faatusatusa i le malosi o lo o i ai le tamaoaiga o le taimi nei.

Na taua e le tofa Lolo e faapea, e tatau i tagata uma ona tulai mai e fai so latou sao mo le unaia o le malo ma lona atina’e i luma.

O le Aso Faraile na te’a nei na usuia ai le uluai fono a le Komiti Faafoe fou a le ASPA ma le afioga ia Utu Abe Malae lea o lo o faasiusiumata i ai le Komiti Faafoe, e ono tofia e avea ma pule fou o le ASPA, ona o ia foi o se tagata ua tele tausaga o galue mo le ASPA.

O sui fou o le Komiti Faafoe e aofia ai Perelini o le taitaifono, Isabel Hudson, Peter Crispin, Daniel King ma Vaa Sokalati.

Na taua e le sui faapitoa o le kovana ia Iulogologo Pereira e faapea, e i ai vaega o lu’itau ua maea ona folasia mo le ASPA e ao ona galulue aga’i i ai, e aofia ai le sailiga o se auala e mafai ona ave’esea maia i le faatauina lava e le ASPA o le suauu ma tu’uina atu i se pisiniai lea tautua.

Atoa ai ma le sailia o se auala e aveese mai ai le tautua o le Lapisi ma le Suavai Lafoa’i mai le ASPA, ae tuuina atu i se isi Vaega faapitoa na te faatautaia lea tautua, faapea ai ma le taumafai e avatu le nofoaga o lo o i ai afi a le ASPA i lona nofoaga i Tafuna, ae faaavanoa le nofoaga i Satala mo galuega a le kamupani i’a i Atuu.

Na taua e ni isi o le atunuu na mafai ona fesiligia e le atunuu e tusa ai o lea fuafuaga mai le alii  kovana, o se tasi lea o laasaga ua leva ona tatau i le malo ona uia ina ia faamama ai le avega i le atunuu.

“O le taimi nei ua le toe gafatia e tupe maua a tagata ona faafetaui manaoga i aso fai soo aemaise ai o le tau o le eletise ma le suavai, e fai o le maualuga ae ua taugata foi ma le tau o oloa,” o le finagalo lea o le susuga a Valoaga Tufuga o Aua, o se tama ua silia i le 20 tausaga o galue i le Ofisa o Galuega a le malo, ma ua malolo litaea i le taimi nei.

Na taua e le tama lea, o se isi laasaga e tatau ona uia e le alii kovana, o le vaavaai lea i le tau o oloa ma pisinisi mai Asia ia o lo o faatautaia ma pulea le tele o pisinisi i le teritori.

Soo se taimi e fesiligia ai e le Fono sui o le Komiti Faafoe tuai a le ASPA ma lana taupulega i se auala e faaitiitia ai le tau o le eletise ma le suavai, latou te taua ai lava le tali, “o lo o latou taumafai i se auala sili mo le atunuu,” peitai na taua e ni isi o tagata e faapea, afai e mafai e le ASPA ona aumai i lalo o le tau o le eletise ma le suavai, e atagia mai ai iina sa i ai le malosi na unaia le ASPA e faaauau le sii o le tau o ia tautua i tausaga ua mavae.

I taimi tuana’i, sa ta’ua e sui o le ASPA, o le mafuaaga i le taugata o le eletise ma le suavai, ona o le taugata o le suauu atoa ai ma le taliga o tupe e tatau ona totogi atu e le malo i le ASPA.