Ads by Google Ads by Google

LOLO: O A.S e le o se malo kolone ae o le teritori o le Iunaite Setete

Talu ai e le’i valaauliaina Amerika Samoa e auai i le fonotaga a le Komiti a Malo Aufaatasi e iloiloina tulaga o malo kolone (United Nations Decolonization Committee), o le mafuaaga lea o le tuuina atu o se tusi mai le afioga i le ali’i Kovana Sili ia Lolo Matalasi Moliga i i le Komiti a Malo Aufaatasi, e lagolagoina ai finagalo o isi fo’i kovana ua mavae atu e faatatau i le mataupu lenei.

 

Na taua e Lolo i lana tusi le taua tele o le faia e tagatanuu o le teritori o le faaiuga i le tulaga e ao ona i ai lana faigamalo mo le lumana’i, nai lo le fai mai e le Konekeresi a le malo tele o le faaiuga.

 

“O Amerika Samoa e le o se atunuu kolone a le malo tele o Amerika, ae o le teritori o le Iunaite Setete, ma o se tulaga ua leva ona umia mai e Amerika Samoa mai tausaga e tele ua mavae,” o se vaega lea o le tusi a le ali’i kovana sili.

 

O se ulua’i finagalo faata’ita’i lea ua tuuina atu e le tofa Lolo, talu ona avea o ia ma Kovana o le teritori o Amerika Samoa, ma o le kopi o lea tusi ua tuuina atu i le Failautusi o le Ofisa o le Initeria.

 

E ui e lei valaauliaina Amerika Samoa i le fonotaga sa faia i le aso 28-30 Me i Guayaqui Ecuador, ae na taua e Lolo i le Komiti a Malo Aufaatasi lona fiafia tele e faasoa atu ona lagona faata’ita’i i le tulaga o Amerika Samoa.

 

Na taua e Lolo i lana tusi e faapea, talu ai e leai se malosi i malo aufaatasi e avea ai teritori ma malo kolone, e talitonu ai o ia e tatau lava ona tuu atu le avanoa i teritori e faailoa mai ai ni o latou lagona e faatatau i mataupu faapenei.

 

Sa ia taua foi e faapea, talu ai o Amerika Samoa o le teritori o le Iunaite Setete o Amerika, o lea sootaga ua mafai ai e Amerika Samoa ona fai ana ia lava faaiuga, mo se faataitaiga, e filifili e Amerika Samoa lana kovana ma le lutena kovana, ma o vaega ia e eseese ai Amerika Samoa mai le faamatalaina o malo o lo o ola faakolone.

 

Sa ia taua foi le isi mau faamaonia e lagolagoina ai lana tusi, e le o pulea e le malo feterale Amerika Samoa.

 

I se isi la faaupuga e pei ona taua e Lolo i lana tusi, o Amerika Samoa o se vaega lea o le Iunaite Setete o Amerika, ma o lea sootaga na afua mai i le feagaiga sa osia e Amerika Samoa ma Amerika, e ui e le o i ai se tulafono o lo o faamatala auiliili ai tulaga uma o lea mafutaga i le va o Amerika Samoa ma le Iunaite Setete o Amerika.

 

I le sainia ai fo’i o le feagaiga i le va o Amerika Samoa ma le Iunaite Setete o Amerika, o iina na faavae mai ai lenei mafutaga, ae le’i faapea na mafua mai i ni faiga faamiliteli, ma o le avea ai o Amerika Samoa o se vaega o le aiga o le Iunaite Setete o Amerika, o se faaiuga sa iloiloina e ona lava tagata.

 

Na faatepa fo’i e Lolo i lana tusi aiaiga o Feagaiga e lua na sainia e tuaa, ina ia faailoa ai le lumana’i manuia o Amerika Samoa i le Iunaite Setete o Amerika.

 

“E ui o lo o i ai i le taimi nei mataupu o lo o talanoa ma iloiloina i luma o le konekeresi o lo o aafia ai le tamaoaiga, soifuaga lautele atoa ai ma le atina’e o Amerika Samoa, ae ua maea fo’i ona tuuina atu i luma o le konekeresi lagona faatuiese o Amerika Samoa i nei mataupu ona o lo o aafia ai taumafaiga e atina’e le malo atoa ai ma le soifuaga a ona tagata.

 

O se tasi o vaega na taua e Lolo i lana tusi o le fautuaga a le Komisi sa iloiloina se lumana’i o le faigamalo a Amerika Samoa sa tuuina mai i ni tausaga ua mavae atu, lea sa latou taua ai le tatau lea ona tumau pea Amerika Samoa i le tulaga o lo o i ai, ae tatau ona talanoa ma le konekeresi a le malo tele mo le iloiloina o se isi suiga tumau o lana faigamalo.

 

Fai mai le alii kovana, e talitonu tagata Amerika Samoa e le tatau ona faaauau ai pea le tulaga faalagolago o lo o i ai le atunuu i le taimi nei, ae tatau ona saili se isi auala talafeagai mo soifuaga o tagata.

 

I le faaiuga o lana tusi sa ia taua ai e faapea, o Amerika Samoa e le o se malo kolone o le Iunaite Setete o Amerika, ae o le teritori o Amerika.

 

fa’aliliu Ausage Fausia