Ads by Google Ads by Google

LOLO; Mumusu Faigamalo maea atu e tu’u mai tala sa’o

FAAILOA LOLO ULUA’I LU’ITAU UA FEAGAI MA I LA’UA

O se tasi o lu’itau pito sili ona faigata na taua e le afioga i le Kovana Sili ia Lolo Matalasi Moliga, ua avea ma tasi o to’atuga i le tau amataina o le la taitaiga ma le afioga i le Lutena Kovana ia Lemanu Peleti Mauga, o le le galulue faatasi o le faigamalo fou ma le faigamalo na se’i mavae atu nei, mo le tuuina atu o tala moni i le tulaga sa’o o lo o i ai le faigamalo i le taimi nei.

I le tuana’i ai o aso e iva talu ona avea Lolo ma Lemanu ma taitai o le atunuu, na faaalia ai e le kovana fou i le taeao ananafi e faapea, o le galuega ua la tauaveina nei, o se “galuega fita,” ona e le o maua mai e i laua tulaga o lo o taoto ai le tamaoaiga o le malo, sei vagana ai nai vaega na mafai ona oo i ai a latou sailiiliga, lea sa ia faailoa i luma o le Fono i le taeao ananafi.

Na taua e Lolo e faapea, afai e faaauau pea tulaga o lo o i ai tupe faaalu a le malo i le taimi nei, e mafai ona aitalafu le malo i le faaiuga o le tausaga tupe lenei, i le aofaiga e $5.2 miliona.

O se tasi o mafuaaga, mai le $93.5 miliona lea na valoia e le faigamalo tuai e maua mai e le malo i tupe faalotoifale ma tupe mai le Initeria, e le moni ia faaupuga, ona e $5 miliona e sili ai lea tupe ma le tupe sa’o e tatau ona maua, e pei ona taua i ripoti mai le Ofisa o Lafoga a le malo.

E $44,554,848 le aitalafu a le malo o i ai nei, e ese ai isi aitalafu e lei oo i ai sailiiliga a le nofoaiga fou ua i ai nei e pei ona saunoa Lolo.  O le vaevaeina o aitalafu, o le mataupu i le Laufou e $7.9 miliona; $364,000 e tatau ona totogi i le Pacific International Engineering-PIE; $153,000 mo le mataupu a Tinitali; $836,000 mo Marisco Co, Ltd; $25,000, $95,000 mo le mataupu a Amosa; $916,000 mo le mataupu i Livi o tagata faigaluega e le’i sao ona totogi, e pei ona galulue i ai le Matagaluega o Tagata Faigaluega a le malo tele, ma le $560,592 mo isi aitalafu a le malo mo isi faaiuga a le faamasinoga e tatau ona totogi.

O isi aitalafu e $8.8 miliona o lo o aitalafu ai le malo i le ASPA; $3 miliona i le vaega o le FEMA Community Development Loan; atoa ai $8.9 miliona mo livi ma isi aitalafu e tatau ona totogi.

O lo o faaopoopo i ai i le aitalafu atoa a le malo tupe sa totogi atu mo totogi faaiuga a Faatonusili o Matagaluega a le nofoaiga ua mavae atu, faapea ai le kovana ma le lutena kovana, i le aofai e $1,000,027.

I le taumafai ai o le faigamalo fou e sefe ni isi tupe mo le malo, ua faatulai ai e le alii kovana ni isi o tulafono e pei o le taofiofi lea o le soona faaaoga o taavale a le malo, taofi le toe totogiina e le malo o telefoni feaveai sa tuuina atu i tagata faigaluega, atoa ai ma le faamutaina o konekarate e lua mo le Ofisa o le kovana i le laumua i Uosigitone.

“Ua tulaga le manuia le tamaoaiga o le malo i Uosigitone i le taimi nei, ma ua ma manatu ai ma le afioga a Lemanu, ia faia ni suiga mo le malo ina ia mafai ai ona foia faafitauli tau tupe e ono tutupu mai i lo tatou malo, ae soifua manuia ai tagata uma,” o le saunoaga lea a Lolo.

Na faailoa e Lolo i taitai o le Fono Faitulafono e faapea, “e matua manaomia lava e le faigamalo lenei tulaga tau tupe, ona o lenei lava e le o manino mai tulaga o le malo ma lona tamaoaiga, ma ou te faamoemoe o le a tatou galulue faatasi i lea tulaga.”

Na taua e Lolo e faapea, o tofiga ua la faia i ni isi o matagaluega a le malo, ua tuuina atu faatasi i ai ma lo la talitonuga, o le a mafai ona faatino e i latou ua tofia suiga lelei, mo le manuia o le malo ma ona tagata.

“Ma te talitonu, ua oo i le taimi ua tatau ai ona tatou faamuamua tagata, ave le faamuamua i nai o tama ma tina matutua, o e sa asaina le manuia mo le malo, ma ia momoli i ai le faafetai e tusa ai o la latou tautua matavela i le malo,” o le saunoaga lea a le alii kovana.

O ni isi o atinae ua folafola e Lolo o le a faia mo le manuia o le atunuu, e aofia ai atina’e mo Manu’a, aemaise ai o le tulaga i le soifua maloloina o tagata, aoaoga atoa ai ma le faaleleia o tulafono mo le Ofisa o Femalagaaiga.

“Le atunuu e faapea ai taitai o le Fono Faitulafono, ua oo i le taimi e pei ona ma manatu ai ma Lemanu, tatau ona faamuamua o tatou tagata, ina ia tusa ai ma le finagalo o le Atua, ma latou silafia ai tulaga o lo o i ai le malo, aua o le malo mo tagata,” o le saunoaga faaiu lea a le alii kovana.