Ads by Google Ads by Google

Lolo ma Lemanu tofi kovana ma le lutena kovana

LOLO: O le tatou manumalo e mo tagata uma o Amerika Samoa

FAOA: Ia malolo faatamali’i, e toe oso fo’i le la

O lagona o le fiafia ma le faamalieina na faalogoina i le nofoaga autu a le paga a Lolo Matalasi Moliga ma Lemanu Sialega Peleti Mauga i Matu’u i le po anapo, ina ua tuuina mai le faaiuga e le aloaia o le faiga palota e sailia ai se Kovana Sili ma le Lutena Kovana, e manumalo le la paga i le paga a Faoa Aitofele Sunia ma Taufetee John Faumuina.

Mai le aofai o tagata sa palota mo le ‘run off’ e to’a 12,553, o le to’a 6,645 na palota ia Lolo ma Lemanu, tusa lea o le 52.9% o le aofai o tagata palota, ae o le toa 5,908 na palota mo Faoa ma Taufete’e, tusa lea o le 47.1% o tagata palota.

O se tauvaga na vaaia ai le tinou o taitai komiti ma a latou komiti i afioaga taitasi, i le sailiina lea o palota mo a latou itu, peitai o le upu e fai i faigamea i le tai, “e le mua uma ni va’a”.

Ae ui i lagona o le fiafia ma le faaeaina i tagata uma sa latou lagolagoina le faamoemoe o Lolo ma Lemanu, peitai na saunoa le tofa Lolo e faapea, o le latou manumalo, e le mo le komiti poo sui tauva, ae mo tagata uma o Amerika Samoa.

“O la tatou manumalo i le po nei, e le mo le komiti ma taitai komiti poo se isi lava sa lagolagoina lenei faamoemoe, ae o le manumalo mo tagata uma o Amerika Samoa,” o le saunoaga lea a Lolo.

Saunoa Lolo, ina ua faatoa amata mai lenei faamoemoe, sa tai alalo pea lava le i’a a le komiti ma taitai komiti, ae tuu atu i le Atua le faamoemoe ina ia faasino mai lona finagalo, peitai o lea ua tali le Atua e ala i le finagalo o le atunuu, o le viiga foi lea e toe fo’i atu i le Atua.

O le te’a laititi o le itula e 8:00 i le po anapo na faalauiloa aloaia ai loa le faaiuga e le aloaia o le palota, ua manumalo le paga a Lolo ma Lemanu.

O le taimi lea na vaaia ai le alalaga i luga o tagata sa tumutumu i le nofoaga autu o le paga a Lolo ma Lemanu i Matuu.

O foliga foi o le fiafia na vaaia i fofoga o le tofa i le tootoo ia Lolo ma lona tausi, faapea ai fofoga o le afioga i le alii Senatoa ia Lemanu ma lona faletua.

O upu o le faamalo ma le faafetai na tau fai momoli e soo se tasi na auai, ao fusi atu ma faafeiloai atu le toatele sa i ai i le tofa Lolo faapea ai ma Lemanu.

O nisi e fetagisi, o isi e alalaga fiafia ae o isi foi e le mapu le faatalofa ma le faafetai i sui uma sa auai mo le lagolagoina o lenei faamoemoe.

“Malo Lolo le onosa’i, sauni laia e tau le taua ua filifilia i ai oulua ma Lemanu e le Atua,” o upu ia na tuu mumusu atu ai se tina matua lava ao ia fusi ma faafeiloa’i atu i le tofa Lolo ma ona loimaga.

Ina ua maea ona feiloai atu Lolo ma Lemanu i le aofia uma sa auai i le po anapo, ona sosoo ai loa ma se sauniga lotu na taitaia e le susuga Rev. Asiata, o le feagaiga a le Ekalesia EFKAS i Matu’u, lea na ia faamamafaina ai le filifilia o Tavita e fai ma tupu o Isaraelu.

Saunoa Rev. Asiata, e ui i le faatauvaa o Tavita ma le amanaia e Saulo ma le nuu, peitai na filifilia lava o ia e le Atua e fai ma tupu o lona nuu.

Na saunoa faafetai Lolo i isi paga ia na le manuia la latou taumafai i le uluai taamilosaga o lenei faamoemoe, ma latou liliu atu ai loa e lagolago i laua ma Lemanu, e pei o le afioga i le Aloalii ia Afoa Moega Lutu ma le tofa ia Le’i Sonny Thompson; o le faletua ia Dr. Salu Hunkin-Finau ma le susuga ia Iuniasolua Savusa; faapea ai le susuga ia Timothy Jones ma le susuga ia Tuika Tuika.

“Faafetai atu ia te outou i lo outou lagolagoina o lenei faamoemoe, o lo tatou tutu faatasi lea mo le faia o ni suiga, ou te tatalo atu, o maia laia ina tatou alo e fai suiga na mafua ai ona tataou tutu faatasi e lagolago lenei faamoemoe,” o le saunoaga faafetai lea a Lolo i paga e toatolu ia na liliu atu e lagolago lo la faamoemoe.

“Faafetai atu i la lagolago mai, o la outou pule lea.”

MALOLO A LE TAMALI’I

Ae ui ua le a’e manuia le faamoemoe o le afioga ia Faoa ma le tofa ia Taufete’e, peitai e talitonu Faoa, e toe oso foi le la i tulaga o sailiga tofi a le atunuu.

Na momoli faapitoa le faafetai a Faoa ma Taiufetee ia i latou uma sa lagolagoina lo la faamoemoe, uo ma aiga, o le atunuu ae faapea ai komiti ma taitai komiti.

“Aua tatou te faanoanoa aua  o le finagalo lea o le Atua i le itu le la ua manumalo, ia tatou malolo faatamalii ma ia tatou loto tetele e toe oso foi le la,” o le saunoaga lea a Faoa.

Saunoa Faoa, o le tofi Kovana ma le Lutena Kovana, o le tofi a le atunuu, o lea foi la ua fai le filifiliga a le atunuu mo ona taitai i le lumanai.

Ae i le saunoaga a Taufetee sa ia fautuaina ai i latou uma sa lagolagoina lo la faamoemoe, i aiga, uo, le atunuu ma komiti taitasi, ina ia fai malu pea le faiva ma ia maua le loto maualalo.

O lana tatalo, o le a latou tapuaia faiva o le itu manumalo ma tulimata’i suiga ua latou folafola o le a latou faia i le atunuu

LEAI NI FAALAVELAVE MATUIA NA TUTUPU

E leai ma se faalavelave matuia na ripotia mai e le Ofisa o Leoleo i le aso atoa o le sailiga tofi a le atunuu i le aso ananafi.

Na tapunia foi le faatauina atu o le ava malosi mai pisinisi uma i le atunuu, mai le 6:00 i le taeao e oo atu i le 6:00 i le afiafi.

O le tolu ai lea o tausaga palota sosoo ao sailia le tofi kovana ma le lutena kovana a le atunuu o faia pea le ‘run off’, ina ua le mafai ona i ai se paga e ausia pasene e agavaa ai i le manumalo i le taimi o le palotaga muamua.

E le gata sa faia le ‘run off’ i le palotaga o le 2008 ae sa fai foi i le palotaga o le 2004 e pei ona taua i faamaumauga a le Ofisa Palota.

O le ‘run off’ i le palota o le 2004 na manumalo mai ai le faiga malo a Togiola ma Ipulai, lea foi na la toe manumalo i le ‘run off’ o le palota i le 2008.

I le ‘run off’ ia Novema 14, 2004, na tauva ai le paga a Togiola/Ipulasi ma le paga a le afioga i le Aloalii ia Afoa Moega Lutu ma Taeaoafua Meki Solomona i se tauvaga finau, peita’i i le faaiuga, na manumalo ai le paga a Togiola/Ipulai i pasene o palota na o la mauaina e 55.7%, ae o le paga a Afoa/Taeaoafua na o la maua pasene o palota e 44.3%

I le ‘run off’ ia Novema 14, 2008, na toe tauva ai foi le paga a Togiola/Ipulasi ma le paga a Utu Abe Malae ma Nua Mailo Saoluaga i se tauvaga finau, peitai i le faaiuga o le palota na toe manumalo ai le paga a Togiola/Ipulai i palota e 6,590, tusa lea o le 53.45%, ae maua e le paga a Utu/Nua palota e 5,084, tusa lea o le 43.55% o tagata sa palota.

I le palota o le tausaga lenei, e toa 6 sa tauva i le palota o le aso 6 Novema, na tula’i mai ai le paga a Faoa/Taufetee ma Lolo/Lemanu e pito maualuga a la palota na maua, i le aofai e 4,320 mo Faoa/Taufetee ae 4,377 mo Lolo/Lemanu.

O isi paga e 4 e le’i faamanuiaina i le tauvaga e aofia ai Afoa Moega Lutu ma lana paga o Le’i Sonny Thompson, lea sa la mauaina palota e 2,485; o Dr. Salu Hunkin-Finau ma lana paga o Iuniasolua Savusa i palota e 873 sa la maua; o Save Liuato Tuitele ma lana paga o Tofoitaufa Sandra King-Young sa la maua palota e 754; ma le paga a Timothy Jones ma lana paga o Tuika Tuika sa la maua palota e 165.

E 7 aso lea ua taoto atu ai le faaiuga le aloaia lenei a le Ofisa o Palota, ona faatoa tuuina mai ai loa lea o le latou faaiuga aloaia e tusa ai o lenei faamoemoe.

Ia manuia le agai atu o Amerika Samoa ma lana faigamalo fou i le isi tausaga o lo o lumana’i atu.