Ads by Google Ads by Google

LOLO: E le o sa’o mataupu o lo o finau mai ai Fono Faitulafono i ‘increments’

Na taua e le afioga i le ali’i kovana ia Lolo Matalasi Moliga i le fonotaga a lana kapeneta i le aso Lua, e le o sa’o le mataupu lea e taumafai le fono faitulafono e una’i pe finau mai ai, o le talosaga atu lea i le faigamalo e totogi lea tupe fa’aopoopo i totogi o tagata faigaluega po o ‘increment’.

 

Na fa’amalamalama e le ali’i kovana e fa’apea, o le mataupu e fa’atatau i ‘increment’ a tagata faigaluega a le malo ma le taimi e totogi atu ai, “o le matafaioi lena a le faigamalo”.

 

“Afai e manatu le Fono Faitulafono ua tatau ona ave ni isi tupe fa’aopoopo i totogi o tagata faigaluega a le malo ma le atunu’u, o le gaioiga sa’o e tatau ona latou faia, o le finau e si’i totogi amata o tagata faigaluega, a e le o le finau mai e totogi ‘increment’ a tagata faigaluega”, o le saunoaga lea a Lolo.

 

O le mataupu e fa’atatau i ‘increment’ a tagata faigaluega a le malo, na fa’atula’i e le Komesina o le Ofisa o Palota, le tofa a Tuaolo Manaia Fruean, i se fesili i le ali’i kovana, mo se avanoa na te fa’amaninoina ai i le kapeneta le uiga moni o le upu “increment”.

 

E mafua lea tulaga ona na saunoa Tuaolo, e to’atele naua tagata faigalueaga a le malo o lo o pisa ma tu’u fesili i le mataupu lenei, i le mafua’aga ua le totogiina atu ai e le malo a latou ‘increment’ ua uma ona pasia i le paketi.

 

“O isi tagata faigaluega o lo o fa’asea fai mai, ua silia i le tolu tausaga talu ona taofi e le malo a latou ‘increment’, ae o tupe nei ua uma ona pasia i paketi a le malo, e tatau fo’i ona totogi atu e le malo ia i latou”, o le saunoaga lea a Tuaolo.

 

Na fa’amanino e Lolo, e mafua ona fa’atulaga e le faigamalo tupe mo ‘increment’ a tagata faigaluega, ona o le manatu ia i ai se auala e aumai ai i luga totogi o tagata faigaluega o lo o pito maualalo o latou totogi o lo o maua, peita’i, ua ia fa’alogo ua finau le fono ina ia totogi atu loa e le malo tupe o ‘increment’ ua mae’a ona pasia i le paketi i tagata faigaluega a le malo.

 

“Ou te talitonu e le o talafeagai le mataupu lea e taumafai le Fono Faitulafono e una’i mai, ma ua foliga mai ai ua tau fete’ena’i le mataupu o lo o tau una’i mai e le Fono ma le aano moni o lo o taumafai le malo e fa’atino i tulaga o ‘increment’ a tagata faigaluega”, o le tali atu lea a Lolo i le saunoaga a Tuaolo.

 

“O le mataupu e fa’atatau i ‘increment, o le mataupu lea e fitoitonu i le faigamalo ma ona ta’ita’i, ae o le mataupu sa’o e tatau ona finau le Fono Faitulafono e una’i mai, o le mataupu e fa’atatau i totogi amata o tagata faigaluega i le teritori, afai e manatu le Fono ua tatau ona fa’aopoopo ni isi tupe se tele i siaki a tagata faigaluega, e tatau la ona latou finau e si’i totogi amata a tagata faigaluega”, o le isi lea saunoaga a le ali’i kovana.

 

Na fa’aalu e le ali’i kovana ni nai minute e tau fa’amanino ai le uiga tonu o vaega tupe ia e taua o ‘increment’ i lana kapeneta, ina ia mafai ai fo’i ona fesoasoani fa’atonusili e fa’amalamalama i a latou tagata faigaluega le mafua’aga tonu e ala ai ona fa’aavanoa e le malo tupe i totonu o le paketi ma fa’aigoa o ‘increment’.

 

“O tupe ua taua o ‘increment’, o se vaega tupe lea ua fa’aagaga e le malo i totonu o le paketi, e avea o se taui mo le tagata faigaluega na te fa’atino lana galuega ma le fa’amaoni, pau le itu e fia fa’amanino, e le o tagata faigaluega uma a le malo e agava’a i ‘increment’, se’i vagana le tagata faigaluega ua fa’amaonia e lona ta’ita’i o lo o fa’amaoni i le fa’atinoina o lana galuega, o lo o tulaga lelei uma fo’i ripoti e tusa ai o lana tautua”, o le saunoaga lea a Lolo.

 

Mo se fa’ata’ita’iga e pei ona taua e le alii kovana, o le to’atele o tagata faigaluega a le malo sa i lalo atu o le $10,000 o latou totogi i le tausaga, ua mae’a ona iloilo tulaga o le latou tautua ma le fa’atinoina o a latou galuega, ma faia ai loa le fa’aiuga ina ua tula’i mai le faigamalo e fa’aopoopo i ai vaega tupe ua taua o ‘increment’ i o latou totogi, o le mafua’aga lena ua ova atu ai ma le ta’i $10,000 totogi o i latou ia i le tausaga”, o le isi lea saunoaga a Lolo.

 

Ina ia fa’aleleia atili tulaga o totogi a tagata faigaluega i le malo, ua fa’atonuina ai e le alii kovana ni isi o Fa’atonusili e pei o le Teutupe a le malo, Fa’atonusili o le Ofisa o le Paketi, atoa ai ma le Fa’atonusili o le Matagaluega a Tagata Faigaluega a le malo (DHR), ina ia va’ava’ai i tagata faigaluega uma o lo o pito maualalo a latou totogi i le taimi nei, ina ia fai i ai se fuafuaga e taumafai ai e tuu mai i luga a latou totogi, ina ia mautinoa e gafatia e a latou tupe maua ona tausi i latou ma o latou aiga.

 

“O isi fesili tuga ia ua ma fa’alogo i ai ma le Lutena Kovana i le taimi nei, e le gata ua to’atele tagata ua pisa i le taugata o le soifuaga, ae o isi fo’i ua talanoa po o afea e si’i ai totogi amata, pau le matafaioi a le malo, ia mautinoa e le a’afia tagata o le atunu’u i mataupu e pei ona fa’alogoina ai fa’asea”, o le isi lea saunoaga a le ali’i kovana.

 

O le taimi nei i totogi amata a le malo e pei ona saunoa Lolo, “ua o o atu lava i le tulaga ua tau feololo, sei vagana ai kamupani tua e le o malamalama le malo po o tulaga lelei totogi amata i le taimi nei pe leai, sei vagana ai ni nai pisinisi ma kamupani e mautinoa o lo o maualuga le tulaga o a latou totogi amata, ae afai o le mataupu tonu lea o lo o finau mai ai le Fono Faitulafono e si’i tupe o ‘increment’, o le fautuaga sa’o lava mo le Fono, finau loa e si’i totogi amata i le teritori”.

 

O le tauaofiaga a le fono lea na fa’atoa mae’a atu nei, na fa’aulu ai i luma o le maota o sui se i’ugafono e talosagaina ai le ali’i kovana ma le faigamalo, ina ia totogi ‘increment’ a tagata faigaluega a le malo ua mae’a ona pasia atu i totonu o le paketi, peita’i e tapunia le tauaofiaga lona fa na se’i mae’a atu nei, e le i faia se fa’aiuga a le maota o sui e tusa ai o lea i’ugafono.