Talu mai le tausaga e 1904 ina ua sainia le feagaiga e avea ai le motu o Manu’a ma vaega o le teritori o Amerika Samoa, e tuuina atu i lalo o le vaavaaiga a le malo tele o Amerika, na amata mai ai lava i le taimi lea ona le amanaia e Amerika Samoa le motu o Manu’a, seia aulia mai le tausaga na te’a nei, lea na faatoa molimauina ai e tagata Manu’a o lo o alala i Manu’a atina’e tetele ua faia e le malo mo i latou, e pei ona taua i se vaega o le ripoti a le kovana sa tuuina atu i le Fono Faitulafono i le vaiaso nei.

“O le tausaga na te’a nei na faatoa molimauina ai e tagatanuu o Manu’a, le le toe i ai o se totogi mo a latou uta e la’u atu i Manu’a, atoa ai ma le faaitiitia o isi totogi mo femalagaaiga aga’i i le motu,” o se vaega lea o le ripoti a le alii kovana sa tuuina atu i le fono.

Saunoa fo’i Lolo, o le tausaga na te’a nei na faatoa maua ai se pamu kesi e utu ai taavale a tagata Manu’a, suia mai ai i le faiga sa sau ai i le tele o tausaga, o le ave o kalone kesi ta’i 50 i le va’a mo Manu’a.

O isi suiga e pei ona taua e Lolo, e aofia ai le ulua’i taimi i le tausaga na te’a nei na faatoa faasalalau tuusa’o mai ai i Manu’a sauniga o le sisiina a’e o le fu’a i Malaetele, atoa ai ma le ulua’i taimi ua faatasi uma atu ai sui o le kapeneta i le molimauina o lea sauniga taua.

O le tausaga fo’i na te’a nei e pei ona saunoa Lolo, na faatoa mafai ai ona tala e tagata faigaluega a le malo i Manu’a a latou siaki i totonu lava o Manu’a, ma totogi ai a latou pili eletise ma le telefoni, e aunoa ma le tau toe malaga mai i Tutuila nei e faatino ai nei fuafuaga uma.

O le taimi nei, ua i ai uma i totonu o Manu’a lala o Ofisa ma Matagaluega a le malo, ma ua i ai fo’i a latou tagata faigaluega faapea ai vaega e faaaoga e faatino ai galuega e pei o ofisa ma taavale.

I tulaga o atina’e, o lo o galulue pea le malo mo le faamautuina o feutanaiga ma lala o le malo tele, mo le faaleleia o uafu ma malae vaalele i Manu’a, ina ia saga faaleleia atili ai tulaga o femalagaaiga i totonu o le motu.

I tulaga o pasese e malaga ai tagata i Manu’a, o lo o iloiloina pea e le faigamalo i le taimi nei le $30 mo le malaga e tasi ma le $50 mo le alu ma le toe fo’i mai, o lo o totogi e tagata Manu’a i le MV Sili, faapea ai ma le toe faia o ni suiga i le ta’i $40 i le po e tasi mo tagata faigaluega a le malo e malaga i Manu’a e galulue ai.

O nei suiga uma e pei ona taua e le alii kovana, o taumafaiga uma a le faigamalo ina ia faaleleia atina’e ma le tamaoaiga i totonu o motu o Manu’a.