TATALA ALOAIA LE ULUA’I TAUAOFIAGA O LE FONO FAITULAFONO

O le taeao ananafi na tatala aloaia ai le ulua’i Tauaofiaga o le Nofoaiga lona 33 a le Fono Faitulafono, lea na auai faatasi taitai o vaega maoti e tolu o le Faigamalo a Amerika Samoa, e molimauina lenei aso taua.

O le afioga i le Kovana Sili ia Lolo Matalasi Moliga ma le Lutena Kovana ia Lemanu Peleti Mauga ma o la faletua, sa fai ma sui o le Vaega Faamalosi Tulafono i le molimauina o lenei faamoemoe.

O le afioga i le Faamasino Sili ia Lealaialoa Michael Kruse na fai ma sui o le Vaega o Faamasinoga, atoa ai ma Taitai o le Fono Faitulafono i le Peresetene o le Senate ia Gaoteote Palaie Tofau, ma le Fofoga Fetalai o le Maota o Sui ia Savali Talavou Ale na auai faatasi i lenei faamoemoe taua, lea na taitaia e le susuga i le alii Faifeau ia Rev. Faalili Otineru, o le Ekalesia EFKAS i Fagali’i, a’o viiga o le Atua na saunia e le Aufaipese faapitoa a le Aoga Maualuga a Leone.

Sa aofia ai foi i lenei sauniga taua ni isi o Faatonusili filifilia ua maea ona faalauiloa e le kovana, faapea ai sui o le kapeneta ma le mamalu o le atunuu.

I ulua’i saunoaga o le aso e pei ona saunoa i ai le alii Faifeau, sa ia siitia mai ai siitaga mai le tusi o Kenese 1 e faatatau i le Foafoaga o le lalolagi e le Atua, ma ia faataua ai le tatau i Faipule, Senatoa, le Kovana ma lana faigamalo, ona saili muamua i le malamalama o le Atua, ina ia mafai ai ona manuia laasaga uma latou te faia.

Na tolopo galuega masani a le Fono mai le aso ananafi, ma le faamoemoe o le itula e 10:00 i le taeao nei o le a toe tauaofia ai maota e lua mo le amataina o galuega masani.

Na pau le tulaga ua manino mai i le taimi nei, o ni isi o galuega o le a alo atu i ai le Fono, mo le faamaonia o tofiga a le kovana mo Faatonusili o Matagaluega ma Ofisa eseese o le malo.

I lana ulua’i saunoaga faa kovana, na folasia ai e le tofa Lolo se otootoga o lo o i ai le tamaoaiga o le malo i le taimi nei, faatasi ai ma ni isi o fuafuaga ua la faataoto ma Lemanu mo le manuia o le atunuu i lona agai i luma.

O tulaga i le sailiga o tupe atoa ai ma le ave o le faamuamua i le atina’eina o le tamaoaiga o le malo, o ni isi ia o fuafuaga faataoto na faalauiloa e Lolo.

“I lo ma talitonuga ma Lemanu, afai e mautu le tamaoaiga o le atunuu, o le mautu foi lena o aoaoga ma isi tautua e aofia ai ma le soifua maloloina, faatasi ai ma le mautu atu ai o tulaga tau tupe a le malo,” o le saunoaga lea a le alii kovana, ma na ia ta’ua foi, ua oo i le taimi ua tatau ai ona ave le faamuamua a le atunuu i mea e tatau ona faamuamua.

E ioe Lolo ua pologa le atunuu i le leaga o auala sa fausia e le faigamalo ua mavae atu e pei o le sau mai Futiga ma faasolo atu ai i Sasa’e, na fai faa aitalafu uma, ma o le molimau a kamupani fau auala, e le toe gaioi latou i se isi galuega sei vagana ua totogi atu e le malo tupe o lo o aitalafu ai.

Ui o lea fai mai le alii kovana, ua maea ona o la talanoa ma Lemanu i ni isi o kamupani fai auala i le atunuu, ma ua latou malilie o le a ofo atu la latou fesoasoani mo le malo.

O le taimi nei, e silia i le $200,000  e totogi ai kamupani fai auala mo galuega ua maea, ma ua taua e Lolo lona faatonuina o le Teutupe filifilia ua i ai ia Falema’o Phil Pili, e saili se vaega tupe e totogi ai kamupani fai auala.

O isi vaega na aofia i le saunoaga a le alii kovana, o tulaga i le Soifua Maloloina, aemaise ai o le unaia o tupulaga talavou e tulai mai mo le lumanai manuia o le malo.

Saunoa Lolo e faapea, ua oo i le taimi ua tatau ai ona ave le faamuamua i tagata aemaise lava i fanau talavou ina ia latou iloa le ituaiga faigamalo moni ma le tonu e tatau ona latou agai i ai.

Na faaoloolomaau le alii kovana i taitai o le fono, ina ia tulai mai latou te galulue faatasi mo le manuia o le atunuu.

“Ua sauni le ma faigamalo tatou te galulue faatasi mo soo se auala e manuia ai le atunuu,” o le saunoaga lea a Lolo.

“Ua i ai lo ma manatu ma Lemanu, afai e tatau ai, ia maua ni a tatou feiloaiga i masina taitasi, poo ni isi lava foi taimi talafeagai, mo le soalaupleina lea o auala eseese e manuia ai le faigamalo a Tutuila ma Manu’a,” o le saunoaga lea a Lolo.

Na taua e le afioga i le alii Peresetene o le Senate ia Gaoteote Palaie Tofau i lana tali fuaitau e faapea, soo se nofoaiga lava e tulai mai, o le latou mau tauloto lava lea e faailoa i le Fono, o latou ua sauni e galulue ma le Fono.

Saunoa Gaoteote e faapea, e faigofie le tofa saili a le Fono pe afai e malamalama i le tulaga o le malo.

“Afai e malamalama le Fono i le tulaga o lo o i ai le malo, e faigofie foi lana avana tauave, ma ua matou sauni foi e galulue faatasi ma lua afioga Lolo ma Lemanu, pe afai o lea ua lua folafola,” o le saunoaga lea a Gaoteote.

Fai mai Gaoteote, e mafua ona lelei se malo pe afai e lelei le fesootaiga i le va o ona taitai, ae mafua ona lelei fesootaiga pe afai e lelei le faalogologo ma le tautala.

O ona moemitiga, ia faaauau pea le galulue faatasi o le Fono ma le faigamalo fou, i le sailia lea o auala e manuia ai le atunuu.

Na faaiu le tatalaina o le tauaofiaga a le Fono i faaaloaloga masani, atoa ai ma se taumafataga na tapena i ai le Fono Faitulafono