O lo o ua loka nei i le toese i Tafuna, se alii e tusa ma le 40 tausaga le matua, ona o tuuaiga i lona taumafai e faamalosi se teinetiti e 10 tausaga, i le vaiaso na te’a nei.  O le taeao ananafi na toe fa’aauau ai le mataupu e faasaga ia Loma Itutasi mo le failaina o moliaga faaopoopo faasaga ia te ia.

O le mataupu lenei na tofu atu i le Ofisa o Leoleo i Leone, ina ua vili e le tina matua o le teineititi na aafia se fesoasoani a leoleo  ina ua fiu e su’e lona alo ae te’i ina ua tamo’e mai i le atoa mai totonu o le fale o le ua molia ma ee mai mo se fesoasoani.

I faamaumauga na tuu atu e molimau i leoleo o lo o taua ai e faapea, na pisi le tina matua i le faiga o ana feau i luma o le latou fale, ae sa tafafao le fanau e toalua a lana tama i tafatafa o le fale.  Ae e le’i umi ae vaaia e le olomatua, ua toe toatasi o lo o tafao i tafatafa o le fale, na ia fesiligia ai lea tamaitai po o fea lona uso, ae tali le teine na te le iloa ma na faatonu ai loa e le tina matua ia le teineititi e alu e su’e lona uso.

Na taua e le tina matua i leoleo e faapea, na toe foi atu le teineititi sa alu e sue lona uso ma faapea atu, pei uma lava lona uso o lo o i ai i le fale o Loma Itutasi, ma o le taimi lava fo’i lea e le’i toe faatali ai le olomatua ae ua tamoe atu loa agai i le fale o Itutasi ma tauvalaau le igoa o lona alo o lo o tau saili peitai e le’i tali mai se isi.

Sa faaauau pea ona valaau e le olomatua le igoa o le teineititi o lo o tau saili, ma  ia faalogoina ai le ee mai i totonu o le fale mo se fesoasoani, ma na valaau ai loa le olomatua i aiga tuaoi mo se fesoasoani.  Na tau fai laga mai i fafo tuaoi ae o le taimi lea ua tamo’e mai ai mai i totonu o le fale a Itutasi ia le teineititi sa tau saili, o lo o tagi ma valaau mai mo se fesoasoani.

Sa vaaia foi e le olomatua o lo o manu’a vaega o le tino o lona alo i le taimi na tamo’e mai ai.  Na valaauina leoleo mo se fesoasoani ma logoina foi le vaega a le EMS ma le Social Services.

Na taua e le tamaitai na aafia i leoleo e faapea, sa tutu i le auala e faatali lona tina, ae faafuasei ona ia faalogoina se tagata o valaau atu i lona igoa. Sa autilo solo ma ia vaaia Itutasi ua savali mai i fafo o lona fale ma valaau atu ia te ia e alu atu i lona fale.

Sa ta’ua e le teineititi e faapea, e le’i o’o lelei atu i le fale a Itutasi, ae ua tago mai i le toso atu o ia ma toso i totonu o lona potu, ma amata ai loa ona ia taumafai e fai uiga mataga ia te ia, peitai sa ia finau malosi e tete’e le ua molia.

Na taua foi e le tamaitai na aafia i leoleo e faapea, ina ua ia vaaia lona uso o alu atu e su’e o ia, sa taumafai e ee i luga peitai sa pupuni e le ua molia lona gutu. Sa fai atu foi Itutasi ia te ia, e aua nei pisa i se isi ina ne’i iloa laua.

Na toe ee le tamaitai i luga ina ua ia faalogoina lona tina matua o lo o valaau i lona igoa, o le taimi lea na fai ai Itutasi i le teineititi e alu ese ma lona potu.  Na sulu le tamaitai ma leaga uma ai ona tulivae ma ona lima i le sima ina ua taumafai e tamo’e i le atoa.

Ina ua loka e leoleo le ua molia, sa latou faalogoina ai le malosi o lona manogi pia, ina ua fesiligia o ia e leoleo, sa ia faailoa ai e faapea, e le gata sa inu i le aso atoa lea na tulai mai ai le faalavelave, ae sa inupia foi i le vaiaso atoa.

O le faaiuga o le vaiaso nei lea ua faatulaga e faia ai le ulua’i iloiloga o lenei mataupu i luma o le faamasinoga, lea o le a iloilo ai e le alii faamasino faamaumauga a le malo, pe o lava mau a leoleo e faamaonia ai sa soli se vaega o le tulafono, ae poo ia foi lea o lo o tuuaia i le soliina lea o le tulafono.