Ads by Google Ads by Google

Loka Reupena Siaulaiga ona o le meaalofa mai lana uo

O sikaleti mariuana e fa ia o lo o tuuaia e le malo le alii o Reupena Siaulaiga sa maua ia te ia, lea ua mafua ai ona taofia o ia i le toese i Tafuna, na taua e Siaulaiga e faapea, o le meaalofa lea na tuuina atu e sana ana uo ia la te faamavae ai, ina ua sauni lana uo e tuua le teritori mo Samoa Tutoatasi i le masina na te’a nei.

O le aso 1 Ianuari 2013 na agai atu ai leoleo i Pava’ia’i e tali i se valaau mai se aiga, e faatatau i se inugapia o lo o faia i tafatafa o le faleoloa o le MJ Store i Pava’ia’i, lea e masalomia o lo o inupia ai ma ni tamaiti e laiti i lalo o le tulafono.

Ina ua taunuu leoleo i luma o le MJ Store i Pava’ia’i, sa latou vaaia ai ni alii se to’afa o lo o faia sa latou inuga pia i tafatafa o le faleoloa.

Ao taumafai leoleo e talanoa atu ia i latou nei, sa vaia ai e se tasi o alii leoleo le alii o Siaulaiga o aapa atu lona lima i totonu o le taga o lona ofuvae o lo o fai, ma uu mai se mea sa i totonu ma togi agai atu i le pupu’u o lo o i tafatafa atu o ia.

Na savali atu i ai le leoleo i le vaega tonu sa togi i ai e Siaulaiga le mea na uu i lona lima, ma ia vaaia ai se tama’i taga pepe iila o lo o taatia mai ai, i totonu o lea taga pepe iila o lo o i ai ni sikaleti mariuana se fa ua uma ona taai.

Sa faia se suega a leoleo i sikaleti e fa sa maua ma faamaonia ai, o lau mariuana o lo o i totonu o sikaleti nei e fa.

Ina ua fesiligia Siaulaiga e tusa ai o sikaleti mariuana sa ia taua ai e faapea, o le aso 28 Tesema 2012 na la talanoa faamavae ai ma lana uo ina ua sauni e toe foi atu i Samoa, ma ia folafola ai loa lona tuuina atu o sana meaalofa mo ia, lea o le a momoli atu e se tagata ia te ia.

Ina ua maua e Siaulaiga le meaalofa mai lana uo, o se tama’i taga pepa iila o lo o i ai sikaleti mariuana e fa, sa tago loa tuu i totonu o lana ato i le fale faigaluega.

Na galo le ato a Siaulaiga i lana fale faigaluega i le aso lea, o lea na faatoa ia pikiina ai lana ato i le aso 31 Tesema ma alu loa ma ia i le fale, ona ia aveese lea o le pepa iila o lo o i ai sikaleti e fa mai totonu o le ato ma tuu i totonu o le taga o lona ofuvae.

O lona ofuvae la lea na ofu i le taimi na taunuu atu ai leoleo ao faia sa latou inuga pia i tafatafa o le MJ Store, ma ia taumafai loa e aveese le pepa iila mai le taga o lona ofuvae sa fai.

Na teena e Siaulaiga le moliaga e tasi o lo o tuuaia ai o ia, o le umia faasolitulafono lea o vaega o fualaau faasaina o le mariuana, ina ua tulai i luma o le Faamasinoga Maualuga i le taeao ananafi.

I lona teena ai o le moliaga e tasi a le malo faasaga ia te ia, ua faatulaga ai loa lana ulua’i iloiloga e faia lea i le aso 28 Fepuari, lea ua faamoemoe e tatau ona oo atu i ai ua manino le tulaga o lana mataupu, i le faia lea o se maliliega ma le malo e faamuta ai, pe faatulaga loa foi se aso e faia ai lana faamasinoga autu.

E $20,000 le tupe lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese.

O le tamaitai loia ia Kimberly Hyde o lo o tulai mo le malo i le mataupu lenei, ae o le alii loia ia Michael White o lo o avea ma loia fautua a Siaulaiga.