Ads by Google Ads by Google

Loka ni tamaitai i le faaleagaina o saini a Lolo ma Lemanu

E toafa ni tamaitai na taofia mai e leoleo i le po o le Aso Lua ina ua maea le palota, ona o tuuaiga i lo latou faaleagaina o se saini e patino i le paga a Lolo Matalasi Moliga ma Lemanu Peleti Mauga, i Petesa.

I le taimi na loka ai e leoleo i latou nei e toafa, sa vaaia le toatolu o lo o laeiina mitiafu o lo o lolomi ai le igoa o le paga a Faoa ma Taufete’e, e pei ona taua i faamaumauga a le fa’amasinoga.

O le Aso Lulu na sosoo ai na tutula’i ai i latou nei e toafa i luma o le Faamasinoga Faaitumalo, mo le tuuina atu o a latou tali i moliaga mama o lo o tuuaia ai i latou.

O i latou e toafa o lo o tuuaia i lenei mataupu e aofia ai Vaililigi Tusi; Vailea Tusi; Naomi Tausaga ma Bernadette Siua.

O lenei mataupu na tofu atu i le Ofisa o Leoleo i Tafuna, ina ua logoina leoleo pe tusa o le itula e 9:00 ina ua maea ona lau le faaiuga o le palota, ina ua ia vaaia ni tamaitai se toalua o lo o la faaleagaina se saini a Lolo ma Lemanu i Petesa.

Na taunuu leoleo i le nofoaga na tupu ai le faalavelave ma latou talosagaina ai le tama o tamaitai o lo o aafia, mo se avanoa latou te talanoa ai ma i latou nei, ae na pisapisao i latou nei ma latou fesiligia le mafuaaga o le a loka ai fua i latou, e leai foi se feau a leoleo o le saini sa tu i luga o le latou fanua, mulimuli ane latou agai atu i le Ofisa o Leoleo i Tafuna mo le suesueina atili o lenei mataupu.

A’o aga’i atu le taavale a leoleo o lo o avatu ai i latou nei, na valaau le isi o i latou i tagata o lo o laulaututu mai i luga o le auala ma fai mai, “o le a le mea tou te tilotilo mai ai, afai tou te lokaina matou ua lelei tele, ae afai tou te tatalaina matou i tua, o le a tupu se taua.”

O upu tau faamata’u ia na faia ai loa le faaiuga a le Ta’ita’i Uati ina ia taofia i latou nei i le toese i Tafuna i le po lava lea, ona o puipuiga i le saogalemu o tagata lautele, atoa ai ma lo latou faaleagaina o le saini a Lolo ma Lemanu.

E ta’i $200 lea ua faatulaga e le faamasinoga faaitumalo e totogi, ona faatoa mafai lea ona tatala i latou nei i tua mai le toese, ae afai ae mafai ona tatala i latou i tua mai le toese, ua poloaina e le faamasinoga i latou ina ia aua nei o latou toe soliina se tulafono a le malo pe toe tuuaia foi i latou i se isi lava ituaiga gaioiga latou te faia, a ia avea i latou ma tagatanuu lelei e tausisi i tulafono a le malo i taimi uma.

Na fautuaina malosi e le alii faamasino o John Ward II i latou uma nei e toafa ina ia tausi le filemu i lo latou nuu ma aiga tuaoi.