Ads by Google Ads by Google

Loka mo le 28 masina i le osofa’ia o le falema’i i Tafuna

O le alii talavou e 21 tausaga lea na ulufale faamalosi i totonu o le lotoa a le Falema’i i Tafuna, talepe le Ofisa ona ulufale faamalosi lea i totonu ma faaleaga mea totino sa i ai, e aofia ai ma lona gaoiina o ni taavale se lua a le Ofisa o le Falema’i sa tutu ai i le paka taavale, ua faafalepuipui e le faamasinoga maualuga mo le 28 masina, o se tasi lea o tuutuuga o lana faanofovaavaaia e 7 tausaga.

E 7 tausaga na manatu le faamasinoga e faasala ai Andres Villar i le falepuipui, peitai ua faamalumalu lona tuliina o lea faasalaga, ae ua faanofovaavaaia ai o ia i lalo o poloaiga a le faamasinoga.

A’o le’i tuuina atu le faasalaga a le faamasinoga, na molimau le tina o lenei talavou ma ia talosaga i le faamasionoga mo se isi avanoa e toe foi atu ai lana tama e fesoasoani ia te ia i le tausiga o le latou aiga.

Na taua e le tina, ua toe na o ia ma lana fanau, ua leai se tama o le aiga, e faalagolago malosi o ia ia Andres i le tausiga o le aiga i soo se itu. Sa ia faatoese foi ona o se sese ua faia e lana tama.

O lagona lava foi ia na taua e le loia a Villar ia Leslie Cardin i luma o le faamasinoga, ao ia finau mo se faasalaga mama mo le ua molia. Na taua e Cardin, e ui i le matuia o le solitulafono na faia e le ua molia, peitai o se taimi muamua lea ua aafia ai o ia i se solitulafono, ma e manaomia foi se fesoasoani mo le toe faaleleia o lona olaga.

Na taua e Cardin e faapea, e le’i i’u le aoga a Villar ona sa manatu e nofo e fesoasoani i lona tina i le tausiga o le aiga, ina ua tuua i latou e lona tama, ma, talu ai o le pu moomoo o le olaga aoaoina, leai foi se tama e mafai ona fautua atu ia te ia, na mafua ai loa ona oo le olaga o Villar i le ava malosi.

Sa ia faailoa i le faamasinoga le tele o se avanoa e mafai ai ona toe suia le olaga o Villar pe afai ae tuu atu i ai se isi avanoa mo ia, ae na taua e le loia a le malo o Cable Poag e faapea, i lana faalogo ma lana maitau i faafinauga a le tamaitai loia ia Cardin, e atagia mai ai le leai lea o se fesootaiga o le alu ese o le tama o Villar mai le aiga, ma le gaioiga matuia lea ua ala ai ona tulai lenei alii talavou i luma o le faamasinoga.

Na finau Poag i le faamasinoga ina ia poloaina Villar na te toe totogiina le tupe e $3,300 mo taavale e lua a le matagaluega o le soifua maloloina na faaleagaina.

O nisi o poloaiga mo le faanofovaavaaia a le ua molia, e aofia ai lona totogiina lea o le tupe e $3,500 i le malo mo mea sa faaleagaina, faasa ona ia tagofia le ava malosi, auai i ni aoaoga e fesoasoani ai i le tagofia o le ava malosi, ma ia auai i ni aoaoga tau i le mafaufau e fesoasoani ai i aafiaga o le mafaufau o loo  aafia ai o ia.

O le a mafai foi ona tatala o ia i tua e faigaluega ma toe foi i totonu o le toese e fesoasoani ai i lona tina, pe afai e maua se galuega tumau e mafai ona faamaonia atu i luma o le faamasinoga.

O le tausaga na tea nei na ulufale faamalosi ai Villar i totonu o le lotoa a le Falemai i Tafuna, ma ia gaoia mai ai sipea ki mo taavale fou e lua sa tutu ai, ona ia oso lea i le van lanu pa’epa’e ma alu ai seia oo ina lavea.

Na toe foi atu le ua molia ma toe oso i le isi taavale a le falemai, o se pikiapu lanu uliuli ma agai atu ai i le fale o se tasi o ana uo, ma o iina maua mai ai e leoleo le taavale.