Ads by Google Ads by Google

LOKA LONA TOALUA MA LANA FANAU MA FOLAFOLA FASIOTIA LATOU

O le alii lea na ina lokaina lona toalua ma lana fanau e toa 5 i totonu o le potu o le fale, ma ia folafola i ai lona fasiotia i latou ma susunu i lalo le latou fale pe afai latou te taumafai e sosola ese, ua faatonu e le faamasinoga e aua nei ona toe taumafai e faafesootai lona toalua ma lana fanau i soo se auala ao faagasolo ai taualumaga o lana mataupu.

E le gata na faia e le ula lea i lona toalua ma lana fanau, ae na ia faia foi lana folafolaga lava foi lea e tasi i le tina o si ona toalua, i lona fasiotia lea o ia pe afai ae toe aia i le mataupu o lo o tulai mai i le va o ia ma lona toalua.

O lenei mataupu na tulai mai i le nuu o Pava’ia’i i le aso tonu o le Kerisimasi na te’a nei, peitai na faatoa taunuu i le ofisa o leoleo i le aso na sosoo ai, Tesema 26, ina ua malaga le aunty a le fafine na aafia ma si ana fanau i le Ofisa o Leoleo e faila la latou tagi faasaga i le tama o le aiga, o ia foi lea ua molia i lenei mataupu.

O le a le mafai e le Samoa News ona faalauiloa le igoa o le ula lea ua molia, ona o puipuiga lava i le ono aafia atu ai ma lona aiga o lo o aafia i lenei mataupu.

A na taua e molimau i leoleo e faapea, o le mataupu na tulai mai ina ua sulu atu le fafine ma si ana fanau i lona aunty, mo se fesoasoani e uiga i gaioiga o lo o faia e le ua molia ia te i latou.

Na taua e le fafine e faapea, e vaiaso atoa e le’i moe lona toalua, ae na o le fealualua’i solo i le ao ma le po, o le isi foi po na te’i ai ao momoe ma si ana fanau i le latou fale, ina ua ki atu e le ua molia se moli uila i ona mata i le vaega o lo o momoe ai ma si ana fanau, ma ua avea ai ana gaioiga ia ma itu ua atili ai ona oso lona fefe i lona toalua, ina nei ona faia se mea leaga ia te ia ma lana fanau.

Sa ia taua foi i leoleo le loka e lona toalua o ia ma si ana fanau i totonu o le potu o le latou fale, ma fai atu lana faatonuga e faapea, o le taimi lava latou te taumafai ai e sosola ese, o le a ia faaaoga le agaese (tulou) e fasioti ai latou, ma susunu i lalo le latou fale, o le mafuaaga lea na alu ai le fafine ma nana le sapelu, ina nei alu atu lona toalua ma faataunuu ai lana folafolaga ia te ia ma lana fanau.

Na faailoa e le tina o le fafine o lo o aafia i leoleo e faapea, o le tele o taimi e tulai mai ai vevesi i le va o le ua molia ma lana tama, e musu ai lava e faalavelave ina nei avea lea ma itu e liliu atu ai le tamaloa ma fasioti o ia.

E lei umi ona taamilo solo leoleo i Faleniu ma Pava’ia’i ae maua loa le ua molia ma taofia faapagota loa o ia.

I luma o le faamasinoga, na teena ai e le ula lea moliaga mama e lua o le faatupu vevesi i totonu o lona aiga, atoa ai ma le faaoolima i le tulaga tolu, peitai ua manatu le itu a le malo, o le a faaauau a latou suesuega ma iloilo, pe i ai ni moliaga faaopoopo e ono faia faasaga i le ua molia.

I faamaumauga na tuu atu e le itu a le malo i le faamasinoga, ua taua ai le taofia lea o le fafine ma lana fanau faatasi ai ma lona tina i lalo o le vaavaaiga a le malo, ina ia mautinoa e saogalemu i latou uma mai ni sauaga e ono faia i ai e le ua molia, ae ua tatalaina nei i tua le ua molia mai le toese, e faatali ai le aso Gafua o le vaiaso fou lea ua faamoemoe e tatau ona toe tulai ai i luma o le faamasinoga, mo le failaina lea o moliaga faaopoopo faasaga ia te ia.

I le tatala ai o le ua molia i tua, ua fautuaina malosi o ia e le faamasinoga e aua nei ona toe taumafai e faafesootai lona toalua ma lana fanau poo le tina foi o lona toalua i soo se auala, sei vagana ua toe tuuina atu e le faamasinoga se isi poloaiga ia te ia.

Ua faasa ona ia toe tagofia le ava malosi, fualaau faasaina poo ni aupega mamafa, ae ia avea o ia ma tagata nuu lelei e tausi i tulafono a le malo i taimi uma, ma o le a mafai ona suesueina lona tino i soo se taimi ina ia iloa ai, o lo o ia usitaia tuutuuga uma o lana faanofovaavaaia.

Ua taofia nei e le malo pepa malaga a le ua molia, ina ia mautinoa ai e le mafai ona ia sola ese ma le atunuu, ao faagasolo ai taualumaga o lana mataupu.

E le o se taimi muamua lenei ua  tulai mai ai ni mataupu faapenei i le sauaina o tina ma fanau i luma o le faamasinoga, aemaise lava pe afai e aafia ai le ava malosi.

E lua ni mataupu faapenei ua maea ona faia i ai se faaiuga a le faamasinoga, faasaga i ni ulugalii se toalua sa tuuaia i lo la faia lea o ni sauaga faapea i a la fanau. O le isi mataupu sa tuuaia ai se ulugalii mai Pago Pago i lo la faapologaina lea o le la tama e 3 tausaga e ala i le loka lea i totonu o le potu i le aso atoa e le fafagaina, ina ua maea ona sasa e le tamaloa lona tino i le fagaau ma manu’a uma ai.

O le isi ulugalii sa tuuaia foi i lo la sauaina o le la tama e mafua mai i lona le usitai. O sauaga sa faia e lea ulualii i le la tama e 7 tausaga e aofia ai le sasa i le au o le pulumu ma faapologa e le fafagaina.

O nei ituaiga mataupu e le manatu mama i ai le faamasinoga, e le faata’eta’ealuga foi le tuuina atu i ai o sana faaiuga.