Ads by Google Ads by Google

LOKA LE TULEI MARIUANA MO LE 20 MASINA

O le ula lea na ia fa'amatala i le Ofisa Fa'anofova'ava'aia, o mariuana ia sa ia tulei ma fa'atauina atu i ni isi o ana uo i le tai $10, o ni isi ia o vaega o mariuana sa ia mauaina i luga o se pasi e alu aga’i i Tafuna, e le gata na fai i ai le fa'amasinoga e le talitonu se isi i lana tala lea ua fai mai, ae ua loka foi o ia i le falepuipui mo le 20 masina.

ìO lau tala lea ua fai mai nei o mariuana sa maua ia te oe o ni isi ia o vaega o mariuana sa e mauaina i luga o le pasi, o se tala e faigata lava ona talitonu i ai le fa'amasinoga, ae 'afai foi e moni lea tala, o lona uiga la e le tele tele sou a'afiaga i lenei mata'upu,î o le saunoaga lea a le ali'i fa'amasino sili lagolago o Lyle L. Richmond sa fa'aliliu e le fa'aliliu 'upu a le fa'amasinoga, o ia foi lea o le Pulesili o le Ofisa Fa'anofova'ava'aia, susuga Salevelio Iosefo.

Na ta'ua e le fa'amasinoga e fa'apea, o le aso 14 Iuni na osofa'i ai e leoleo le fale o le ali'i o Poufa Silulu i Nu'uuli, ina ua masalomia o lo o ia tulei ma fa'atau atu vaega o le la'au fa'asaina o le mariuana.

Na fa'aaoga e leoleo se molimau fa'apitoa na te fa'atauina mai ni sikaleti mariuana mai ia Silulu, e ala i le makaina lea e leoleo o le tupe lea o le a alu ma le molimau fa'apitoa lenei e fai mai ai le fa'atau, ina ua tuana'i le taimi na faia ai le fa'atau, na aga'i atu ai loa leoleo i le fale o Silulu ma maua atu ai o ia, ma tu'uina atu ai loa le kopi o le poloaiga a le fa'amasinoga e sa'ilia ai lona fale ma ana meatotino, pe le o i ai ni vaega o fuala'au fa'asaina e aofia ai ma lona tino.

Ao le i tu'uina atu e Silulu i leoleo ni tama'i taga pepa i'ila o lo o i ai sikaleti mariuana e 10, sa ia fa'amatala i leoleo e fa'apea, sa ti'eti'e i se pasi e aga'i i Tafuna, lea sa ia mauaina ai i le nofoa pito i tua ni taga pepa i'ila se fa o lo o i ai sikaleti mariuana. Sa ia fa'atauina atu isi sikaleti i le ta'i $10 i ni isi o ana uo.

Na fa'ailoa e Silulu i le fa'amasinoga i le taimi a o le i tu'uina atu lona fa'asalaga, o le solitulafono sa ia faia, o se solitulafono sa le tatau ona tupu, peiti o lona fa'atamala ua mafua ai ona tula'i mai lea mea.

Na ia fa'ato'ese i le fa'amasinoga e tusa ai o lana solitulafono sa faia, sa ia fa'ato'ese foi i lona tina sa i ai i totonu o le potu fa'amasino, i le le fa'ataunu'uina lea o ona tiute fa'afanau e ala i le tausiga o ia, ona o le solitulafono sa ia faia ua mafua ai ona loka o ia i le to'ese.

Na fa'ai'u le fa'ato'esega a Silulu i lona augani atu lea i le fa'amasinoga mo se isi avanoa se tasi mo ia, sei fo’i ai i lona aiga e tausi si ona tina ma si ana fanau.

ìOu ke ka’ukigo aku i legei aso ua lagoga lo’u salamo mai le solikulafogo sa ou faia, ou ke ka’ukigo aku foi ou ke le koe faia legei solikulafono i le lumaga’i, ua ou iloa fo’i, o le ko'ese i Kafuga e le o se gofoaga lelei mo a’u,î o le talosaga fa'ai’u lea a Silulu i le fa'amasinoga.

Na fa'ailoa e le loia a Silulu o Ruth Risch-Fuatagavi i le fa'amasinoga e fa'apea, e fa'amaoni le fa'ato'esega a Silulu ua fai nei, e le gata ua salamo ae ua ia a'oa'oina foi se lesona aoga mo lona olaga, talu le umi e tusa ma le 6 masina lea na taofia ai o ia i le to'ese i Tafuna, ma ua ia manatu ai, ua lava lea 6 masina e 'avea ma ona fa'asalaga i lenei mata'upu.

Na ta'ua e le loia, atonu e aoga le mea lea ua loka ai Silulu e fai ma lesona mo isi foi tagata o lo o faia lenei solitulafono o le umia o mariuana ma tulei atu i isi tagata, ina ia latou lagona e le o se mea lelei.

Ae na ta'ua e le ali'i fa'amasino sili lagolago o Richmond, e manatu le fa'amasinoga e pei lava e le lava le 6 masina lea ua uma ona tuli e Silulu i le to'ese, ona o le solitulafono lea sa ia faia, e fai lava si matuia, e mafai ona fa'asala ai se tasi i le toese mo le umi e o'o atu i le 20 tausaga, pe fa'asala foi i se salatupe e mafai ona o'o atu i le $20,000.

E 5 tausaga na manatu le fa'amasinoga e fa'asala ai Silulu i le to'ese, peita'i ua manatu e fa'amalumalu le tuli'ina o lea fa'asalaga, ae fa'anofova'ava'aia mo le 5 tausaga i lalo o poloaiga a le fa'amasinoga.

O ni isi o ia poloa'iga e aofia ai lona tuliina o le umi e 20 masina i le to'ese, e aofia ai ma lona totogiina o le salatupe e $2,000 i totonu o le 12 masina, pe 'afai e magalo mai o ia i le to'ese.

Ua poloai'ina foi e le fa'amasinoga o ia ina ia aua nei ona toe tagofia ni fuala'au fa'asaina po o le 'ava malosi, ma ia auai i ni a'oa'oga e fesoasoani ai i a'afiaga o le 'ava malosi ma fuala'au fa'asaina i lona olaga.