Ads by Google Ads by Google

LOKA LE ALII FAI FAIVA AE TAU FAAOLA LE KAPETENI FALEMA’I

Ua molia nei e le malo se alii fai faiva mai le atunuu o Vietnam e galue i luga o le vaa fagota o le ‘Shin Jaan Shin #168’ i moliaga mamafa e tolu e aofia ai le moliaga o lona taumafai e fasioti se tagata, faapea ai ma moliaga e lua o le faaoolima i le tulaga muamua ma le tulaga lua.

 

E faalima ona ta tui e le alii ua molia le kapeteni i se naifi fai meaai, ma o ia tui e pei ona taua i faamaumauga a le faamasinoga e aofia ai le tasi i lona ulu ma le isi fa i lona fatafata ma ona foliga.

 

Na taua i se ripoti e faapea, o lo o taofia pea i le falema’i i Fagaalu le alii kapeteni na aafia ona o tulaga matuia o manu’a sa aafia ai o ia i le taimi na tupu mai ai lenei faalavelave.

 

O le alii ua molia e le malo i lenei mataupu o Thai Dang, o se tagatanuu o le malo o Vietnam, ma o lo o taofia pea o ia i le falepuipui i Tafuna sei vagana ua ia totogiina le $100,000 ua faatulaga ona faatoa mafai lea ona tatala o ia i tua mai le toese.

 

O le po o le aso Toona’i na te’a nei na tulai mai ai lenei faalavelave i Pago Pago, ae o le taeao o le aso Sa na sosoo ai na taofia ai loa e leoleo ni alii se toalua e aofia ai ma Dang, ona o tuuaiga i lo la faaoolima lea i le alii kapeteni na manu’a, ae ina ua faaauau suesuega a leoleo e faatatau i lenei mataupu, na faaiuina ai loa e na o Dang e tuuaia ae ua toe tatala i tua le isi alii na taofia faatasi i laua.

 

Pe tusa o le itula e 2:30 i le vaveao o le aso 28 Aperila na te’a nei, na logoina ai e se molimau mai Pago Pago le ofisa o leoleo mo se fesoasoani ona o se tagata o lo o manu’a ai. E taunuu atu leoleo ua i ai le taavale a le EMS, ma o lo o taumafai e sii le tagata o lo o manua i totonu o le taavale mo le auina atu i le falemai mo togafitiga.

 

O le alii leoleo ia PSO. E. Lito na faatautaia le suesueina o lenei mataupu, lea sa ia taua i lana ripoti lona vaaia o le matuia o ni manu’a o lo o aafia ai le tino o le alii o lo o manu’a, lea na mulimuli ane faailoa lona igoa, o ia o Ruigo Lui, o ia foi o le kapeteni o le vaa fagota o lo o galue ai Dang ua molia.

 

Na taua e se molimau i leoleo e faapea, ina ua latou faalogoina ni leo o ni tagata o lo o pisa, sa ia vaaia ai ni alii Vietnam se toalua o lo o tamomo’e ese mai i le nofoaga na maua atu i ai le tino o le alii kapeteni.

 

E taunuu sui o le EMS ma leoleo sa latou molimauina ai le alii o Lui ua matapogia, ma o latou taumafai ai loa e ofo atu le fesoasoani muamua mo ia, mulimuli ane auina atu o ia i le falemai mo togafitiga, ma e oo mai lava i le taimi nei o lo o i ai pea o ia i le falemai.

 

Na taumafai leoleo e saili alii e toalua ia o lo o taua e molimau na tamomo’e ese mai le nofoaga na maua i ai le tino o le alii kapeteni peitai e le’i maua, o lea na fautuaina ai loa e se sui o le kamupani o lo o pulea le vaa fagota ia leoleo, e sili pe a faatali sei oo i le taeao atonu e toe foi atu ai i laua nei i luga o le vaa ma faigofie ai loa ona taofia i laua.

 

E lei malama lelei le taeao o le aso Sa, 29 Aperila ae taunuu loa leoleo i le vaega tonu o lo o taula ai le vaa fagota, ma latou maua atu i ai Dang faatasi ai ma le isi alii na taofia faatasi i laua peitai o lea ua toe tatala i tua o ia ae taofia ai pea Dang i le toese i Tafuna.

 

Ina ua fesiligia e leoleo Dang e faatatau i le mea sa tupu, sa ia faamaonia ai lona faaaogaina o se naifi fai meaai e ta tui ai le alii kapeteni i lona ulu ma lona fatafata.

 

O le tui muamua na aafia ai le ulu o le alii kapeteni ao taumafai e solomuli ese mai le ua molia, ina ua lavea le kapeteni i le ulua’i tui, sa toe sosoo atu ai loa ma isi tui i lalo mai o lona mata lea e lua filo na su’i ai, o le isi tui i le pito i luga o le isi ona mata lea e valu filo na su’i ai, ma isi tui e tolu i fatafata e latalata i lona fatu, o le isi tui e 11 filo na su’i ai, o le isi e 8 filo ae o le isi e 5 manu’a.

 

O le taeao o le aso Gafua o le vaiaso fou lea ua faatulaga e faia ai le uluai iloiloga o le mataupu a Dang i luma o le faamasinoga faaitumalo, lea o le a iloilo ai e le alii faamasino mau a le malo, pe lava ma totoe a latou faamaumauga e faamaonia ai sa soli se tulafono, ae pe mafai foi e ia mau ona faamaonia o le alii ua taofia nei o lo o tuuaia i le soliina o le tulafono.

 

O le alii kapeteni o se tagatanuu o le malo o Saina e pei ona taua i faamaumauga a le faamasinoga.

 

E le o se taimi muamua lea ua tulai mai ai ni faalavelave e aafia ai tagata mai Asia o lo o galulue i vaa fagota ma faatoaga i le atunuu i le tulafono.

 

O le tausaga na te’a nei na molia ai foi e le malo se isi alii fai faiva ina ua ia faaoolima i le isi alii fai faiva i luga o le vaa fagota, e mafua mai i se taugaupu na amata i se inugapia, ae o le isi faalavelave na molia ai se alii fai faatoaga mai Asia ina ua ia faaaoga se agaese e faaoo ai manu’a i le isi foi alii mai Asia sa la galulue i se faatoaga laau aina i Taputimu.