Ads by Google Ads by Google

LOKA LE ALII AMIO VALEA MO LE 28 MASINA

O le alii e 30 tausaga lea na ia faia uiga mataga i se teineititi e 15 tausaga le matua, ua faa falepuipuiina nei mo le 28 masina i le toese i Tafuna, o se tasi lea o tuutuuga o lana faanofovaavaaia e 7 tausaga ua tuuina atu e le Faamasinoga Maualuga.

O moliaga faasaga ia Malake Gauta na alia’e mai ina ua maua atu e le tina o le teineititi e 15 tausaga le matua o ia i totonu o le potu a lana tama, faatasi ma le isi ona niece e 17 tausaga le matua.

O Gauta na tuuaia i moliaga eseese e aofia ai le tagofia o itutinosa o se teineititi, faiaoga ma se teineititi e laititi i lalo o le tulafono, faamalosi teine, faapea ai ma le faia o gaioiga e ono lamatia ai le saogalemu o se fanau e laititi i lalo o le tulafono, ae i le maliliega sa ia sainia ma le malo, na ia ioeina ai le moliaga o le faiaiga i se teineititi ae solofua isi ona moliaga na totoe ai.

O le moliaga lea ua ta’usala ai e le faamasinoga Gaute, e mafai ona loka ai o ia i le falepuipui mo le 7 tausaga, pe faasala i le salatupe e $5,000, poo le faasala foi i faasalaga uma ia e lua.

Na vaaia le salamo moni o le alii o Gauta ao faia lana faatoesega i le faamasinoga mo se isi avanoa mo ia, ina ia mafai ai ona toe foi atu e tausi lona aiga ma si ona tina. Sa ia taua e faapea, o le umi lea na loka ai o ia i le falepuipui, ua ia aoaoina ai se lesona taua mo lona olaga, ma ua ia tautino na te le toe faia lenei solitulafono.

Na taua e le loia a Gauta o Leslie Cardin e faapea, ina ua maliu le tama a le ua molia, sa toe foi uma lona aiga i Samoa ae tuua ai na o ia iinei.

Na talosaga lana loia ina ia lava le 9 masina lea ua uma ona tuli e Gauta i le falepuipui e fai ma ona faasalaga i lenei mataupu, peitai na faailoa e le loia a le malo o Mitzie Folau i le faamasinoga, o le teineititi na aafia e na o le 15 tausaga le matua, ae o Gauta ua 30 ona tausaga.

Na lagolagoina e Folau le fautuaga a le ofisa faanofovaavaaia mo se faasalaga mo Gauta ina ia faanofovaavaaia le ua molia, faapea ai ma ni nai masina e taofia ai o ia i le toese.

E 28 masina ua faasala ai Gauta i le toese, peitai ua manatu le faamasinoga o le a taofi le tuliina o masina e 12 o loo totoe, ae ua tatau nei loa ona tuua e le ua molia le teritori ma aumau ai i fafo atu mo le umi o lana faanofovaavaaia o loo totoe.

Ua poloaina foi o ia na te totogiina le salatupe e $2,500, ma ia lesitala lona igoa i le lisi o tagata ua faamaonia i solitulafono o le faia lea o uiga mataga i fanau laiti.

O isi poloaiga o le faanofovaavaaia a Gauta e aofia ai le faia lea o se suega i lona tino ina ia iloa ai, poo ia tauaveina le siama o le HIV, ma ua poloaina foi o ia e aua nei ona toe soliina se tulafono ao i ai pea i le teritori.