Ads by Google Ads by Google

Loka i le taumafai e fa’aaoga se ‘Credit Card’ na ia gaoia

O le tina lea na taumafai e faaaoga se credit card sa ia gaoia e fai ai sana faatau i le kamupani a le ASCO Motors, ua molia nei e le malo i moliaga mamafa e lua e aofia ai le gaoi, ma lona taumafai e faaaoga faagaoi se ‘credit card’ a se isi tagata.

O le taeao ananafi na tulai ai i luma o le Faamasinoga Faaitumalo le tina o Naomi Mavaega ma le faamoemoe o le taeao nei, o le a toe tulai ai o ia mo le faatulagaina o se aso o lona ulua’i iloiloga.

O se tagata faigaluega a le Asco Motors na faafesootaia le tama a le olomatua e ana le ‘credit card’, ina ua taumafai Naomi e faaaoga e fai ai sana faatau, i le aso 26 o Aokuso 2011.

Ina ua fesiligia e leoleo Naomi, sa ia ioeina mea uma sa ia faia e ala i lona gaoia o le ‘credit card’ atoa ai ma lona taumafai e faaaoga.

Na faailoa e le tina e ana ia le ‘credit card’, o ia sa i le falema’i i Fagaalu i le potu e faatalitali ai gasegase mo le vaaia o se foma’i, faatasi ma Naomi, peitai sa taatia lava i ona tafatafa lana ato i le taimi atoa sa la talanoa ai ma Naomi, na te le’i toe siakia fo’i lana ato pe i ai se mea na leiloa pe na pau ese mai ai.  Ae ana le vili atu lana tama, e na te le iloa ai ua leiloa le tama’i ato lea sa i totonu o lana ato ta’ita’i, lea sa i ai lana ‘credit card’.

I faamaumauga a le faamasinoga o lo o taua ai, e $450 le tupe o lo o aitalafu ai Naomi i le kamupani a le Aeto Taxi Stand i Pago Pago, o le mafuaaga foi lea na o ai ma le pule o le kamupani taxi i le Asco Motors, mo le faatauina mai o pa’u taavale ina ia faapaleni ai lana aitalafu.

Na faailoa e le pule o le kamupani taxi i leoleo, na fai atu Naomi ia te ia, o le ‘credit card’ a lona tina lea o le a ia faaaoga e faatau ai ana pa’u ta’avale, ma ua maea fo’i ona iloa e lona tina.

O le tala foi lea a Naomi na fai i le tagata faigaluega a le Asco Motor ina ua fesiligia o ia e uiga i le ‘credit card’, peitai ina ua faailoa i ai e le tagata faigaluega a le Asco Motors o lea ua maea ona ia talanoa i le tagata e ana ia le ‘credit card’, o iina na tautino ai loa Naomi e pepelo lana tala sa fai atu muamua.

Ina ua fesiligia o ia e leoleo po o fea ua ave i ai le ato, na tali Naomi sa ia tia’ia i le togavao i Tafuna, ae o le credit card ma mea aoga sa i totonu o lo o teu i lona fale.

 O le taimi nei, ua maea ona toe fa’afo’i i le tina e ana ia le credit card lana ato ma mea aoga uma sa i ai i totonu, ae ua taofia Naomi i le toese e faatali ai lana mataupu.

E $10,000 le tupe ua faatulaga e le faamasinoga e totogi, ona faatoa mafai lea ona tatala i tua le ua molia mai le toese e pei ona taofia ai o ia i le taimi nei.