Ads by Google Ads by Google

Loka e leoleo ni alii fia FBI se toalua

Ua lokaina e leoleo i le to’ese i Tafuna ni alii se toalua ua nonofo ma faafaigaluega ni tagata e silia ma le to’a 20, e aunoa ma le totogia, toe o la fa’ailoa i ai o la’ua o sui o le FBI i totonu o Amerika.

O le alii o Aperaamo Levi ma Alatise Fonoti, ua molia i moliaga mamafa e lua o le gaoi, ma ua tofu atu i luma o le Faamasinoga Maualuga a la mataupu, ina ua le faataunuuina a la ulua’i iloiloga i luma o le faamasinoga faaitumalo i le taeao ananafi.

Na o’o lenei mataupu i totonu o le ofisa a leoleo, ona o se tagi na faaulu e Wayne Mataiao e faasaga i nei alii e toalua, i le aso 9 o Oketopa 2010, ina ua le totogia Mataiao ma ni isi ona o a latou galuega sa faia mo i la’ua ia.

I faamaumauga a le faamasinoga o lo o taua ai e faapea, na faailoa e Fonoti ia Mataiao, o ia o se sui o le FBI i Amerika Samoa, ma o lo o ia te ia se vaega tupe mai le FBI e faa faigaluega ai ni tagata, e faamama se vaega o lona fanua e fau ai se fale. Na folafola e Fonoti ma Levi ia Mataiao ia penefiti, o se totogi e $10 i le itula ma sana ponesi e $4,000.

E tusa ai ma faamaumauga a le faamasinoga, e to’a 25 tagata sa faafaigaluega e Levi ma Fonoti, e aofia ai ni tagata se to’afitu o le aiga o Mataiao.

Na faailoa e Mataiao i leoleo e faapea, ina ua ia aumaia tagata o lona aiga, sa folafola i ai e Levi ma Fonoti ni isi o faamanuiaga latou te maua, e pei o masini fai faapapa (toasters), microwaves, DVD, ma TV, faapea ma totogi tga’i $3,000 a le tagata e toatasi.  E le gata i lea, afai e fa’aaoga e le tagata lana taavale e la’u mai ai le aufaigaluega ma toe momoli i o latou aiga, e toe fa’aopoopo iai le $100 i le aso e tasi.

Na faailoa e Mataiao i leoleo e faapea, ina ua amata le galuega, na faailoa atu e le au sifi ia te ia, o le a tuu atu ia te ia le $2,000 e faatau ai meaai a le aufaigaluega, peitai e mae’a lava le galuega e leai ma se folafolaga na taunu’u, ae o le tele o taimi e faatau mai ai e lona aiga meaai mo le aufaigaluega.

Na taua foi e Mataiao i leoleo le i ai o ni isi taimi e tuu atu ai e le au ula ia faatonuga i le aufaigaluega, afai latou te fesiligia i laua e tusa ai o le galuega, o le a la ta loka i latou i le falepuipui, e le toe vaai foi o latou aiga ia te i latou.

E tusa ai ma faamaumauga a le faamasinoga o lo o taua ai e faapea, e tolu masina o galulue nei tagata, o nisi o taimi e ta’i iva itula e galulue ai i latou, e aunoa ma ni totogi.  Ae ua fa’aali ifo i ai e Levi ma Fonoti, o le fafine o lo o pule i le FBI, o Kim lona igoa, o lo o faapea mai e le’i maea ona tusi siaki mo le aufaigaluega.

Na mananao tagata faigaluega e fia vaai ma talanoa ia Kim peitai sa faailoa i ai e le au sifi ia, e le o maua se avanoa o Kim leaga o lo o pisi.

Na faamaonia uma e tagata e toa 25 na fesiligia e leoleo faamatalaga a Mataiao, i folafolaga sa faia e Levi ma Fonoti ia i latou.

Na fa’aalia e ni isi o i latou o lo o a’afia i lenei mataupu, na o latou taumafai e fesiligia Levi e tusa ai ma le latou galuega, ae na faailoa atu e Levi, e lua tausaga e mafai ona loka ai le tagata o i latou pe a latou fesiligia o ia po o le ofisa o le FBI e uiga i a latou galuega ma a latou totogi.

Sa aafia soifua maloloina o ni isi o le aufaigaluega, i le manogi leaga o le nofoaga na galulue ai, faapea le manunu’a o isi i le faatinoga o le galuega.

Sa faamatala e se tasi o alii i leoleo le faa faigaluega o ia o se kuka mo le $5 i le itula, ae na uma lava le galuega, e le’i maua sona totogi.

Ina ua fesiligia e leoleo Fonoti e uiga i lenei mataupu, sa ia taua e faapea, o ia e faigaluega  mo le FBI i lalo o le vaega a le CIS, ae ina ua fesiligia Levi, sa musu e fai sana faamatalaga e uiga i le mea sa tupu, ae na pau lana tali i leoleo, ina ua fesiligia o ia pe sa i ai se taimi na galue ai mo le FBI, sa ia tali ai “ioe.”

Ae na faamaonia mai e se sui o le FBI e suafa ia Matthew McDonald, e leai se taimi na galue ai Levi mo le latou ofisa.

O Levi na faafalepuipui e le faamasinoga i masina e 28, ina ua faamaonia le moliaga o le gaoi, e mafua mai i se faalavelave lea na ia faavalea ai ni tina se toatolu, o ia e fai lana kamupani e apalai ai VISA mo Niu Sila, Ausetalia ma Amerika.

E tele ni vaega tupe na totogi e nai fafine ia Levi, ma le faamoemoe o le a maua mai ai a latou visa e malaga atu ai i Niu Sila, Ausetalia ma Amerika, peitai ina ua fiu nai fafine e faatali a latou visa, na o latou sulu loa i leoleo mo se fesoasoani.

E ta’i $7,500 lea ua faatulaga e totogi ona faatoa mafai ona tatala Levi ma Fonoti mai tua o le toese.

O le taeao nei ua faamoemoe e tutulai ai i laua nei i luma o le faamasinoga maualuga, mo le faatulagaina o se aso e valaauina ai le la ulua’i iloiloga.