Ads by Google Ads by Google

Loka alii faifaiva toa 18 mumusu toe fo’i fagogota

E to’a 18 ni alii faifaiva mai Indonesia o lo o taofia i le falepuipui i Tafuna, ina ua mumusu e toe fo’i e fagogota i le va’a fagota lea na mafua ai ona ulufale mai i le teritori.

 

O le Aso To’ona’i na te’a nei na fuafua e toe fo’i atu ai le vaa fagota lea na galulue ai alii e toa 18 i luga, peitai ina ua sauni le vaa o le a toe foi, na tula’i mai se faaletonu ina ua mumusu i latou nei e toe galulue i le vaa fagota lea, ae ua mananao e nonofo e faatali ai le taimi e toe fo’i atu ai i lo latou atunuu.

 

I se faamatalaga na tuuina mai e se molimau faatuatuaina i le Samoa News na taua ai e faapea, na faailoa e le au ula ia i sui o le Ofisa o Tiute ma le Ofisa o Femalagaaiga e faapea, ua mafua ona mumusu e toe galulue i le vaa fagota, e le gata e leaga le tausiga o i latou, e le lelei meaai, ae leai foi ni togafitiga lelei mo i latou pe a mama’i i luga o le vaa.

 

Sa tuuaia foi e le au alii ia le i ai o ni isi taimi e fasi ai latou e le alii kapeteni o le vaa, peitai ina ua suesue e le Ofisa o Femalagaaiga tuuaiga a le au alii nei, na iloa mulimuli ane ai, e le faamaonia a latou tuuaiga, ae o tuuaiga na faia ona ua le toe fia fagogota ae ua toe fia fo’i i lo latou atunuu.

 

Na taua e le Pulesili o le Ofisa o Femalagaaiga ia Peseta Dennis Fuimaono e faapea, ina ua tulai mai le faafitauli i le mumusu o alii nei e to’a 18 e toe fo’i i le vaa, sa faia ai loa le faaiuga e le mafai ona malaga ese atu le vaa ma le uafu, ona e i ai tulafono tau i le puipuiga e le mafai ai ona tuuvaa ese atu se vaa fagota e alu pe afai e le o atoa le au vaa.

 

Sa mananao le au alii ua taofia nei e faamautu i se fale talimalo i le atunuu, e faatali ai le taimi e malaga ese atu ai ma le teritori, peita’i sa faia se feutanaiga a le Ofisa o Femalagaaiga, o le afioga i le Loia Sili atoa ai ma le Komesina o Leoleo, ma tasi ai loa le faaiuga o le a taofia i latou uma nei i le toese i Tafun, ona o tulaga faaletonu o lo o i ai a latou pepa e ulufale mai ai i le teritori.

 

Sa faia foi e le loia sili le faatonuga ina ia faamalieina ai le tulafono, e ala i le sainia lea o tusi saisai e taofia faapagota ai i latou nei i Tafuna, ona e le o tusa ai lo latou aumau i le teritori ma tulafono a le Ofisa o Femalagaaiga.

 

Ua galulue le kamupani vaa lea o lo o faa faigaluegaina le vaa fagota sa galulue ai i latou nei mo le totogiina o a latou pasese, mo le toe foi atu o i latou nei i lo latou atunuu i le aso Gafua o le vaiaso fou.

 

Talu ai o lo o alu tupe a le malo i le tausiga o i latou nei, ua faia ai se maliliega a le Ofisa o Femalagaaiga ma le kamupani vaa o lo o faa faigaluegaina le vaa fagota, ina ia totogi atu i le malo le tupe mo le tausiga o i latou nei i le toese, amata mai i le aso Toona’i na te’a nei seia oo atu i le aso Gafua o le vaiaso fou.

 

E $50 a le tagata e taotasi i le aso e tatau ona totogi atu e le kamupani vaa i le malo, e tusa ai o le tausiga o i latou nei i le toese i Tafuna.

 

O le fau ma soloi o tagata mai Asia i totonu o le teritori i le taimi nei, o se tasi lea o atugaluga o lo o feagai ma taitai o le atunuu i le taimi nei, ma o lo o tau saili se auala e foia ai lea faafitauli.

 

I se talanoaga a le Samoa News ma le afioga i le loia sili ia Afoa Suesue M. Lutu i le masina na te’a nei, sa ia taua ai le i ai o ni fuafuaga ua faataoto e lona ofisa ina ia foia ai lenei faafitauli.

 

O matagaluega a le malo na galulue i le foiaina o lenei faafitauli e aofia ai le Ofisa o le Loia Sili, Ofisa Femalagaaiga, Ofisa o le Tiute ma le Ofisa o Leoleo