Ads by Google Ads by Google

Loka 3 tausaga i le faia amioga mataga i se teineititi 7 tausaga

O le alii e 19 tausaga lea na sasa e se teineititi e 7 tausaga le matua i se salulima, ina ua ia taumafai e fai ni uiga mataga ia te ia, ua fa’a falepuipui e le Faamasinoga Maualuga mo le 3 tausaga, o se tasi lea o tu’utu’uga o lona fa’anofova’ava’aia e 5 tausaga.

E 9 tausaga na manatu le fa’amasinoga e fa’asala ai le alii o Puna Tusiga, ina ua ta’usala i le moliaga o le faia o amioga fa’asotoma fa’asaga i se alualutoto e 7 tausaga, faapea ai ma lona faia o ni gaioiga e ono lamatia ai le saogalemu o lea alualutoto, peitai na talia e le faamasinoga fautuaga a loia e faanofovaavaaia le ua molia, ma ia tuu atu o ia auai i ni polokalama e fesoasoani ai i le tulaga vaivai o lona mafaufau.

Na faamatala e Tusiga i le faamasinoga e faapea, i se taimi o le aso 13 Mati o le tausaga na tea nei, sa ia faia ai uiga mataga ia i le teineititi na aafia, i lona taumafai lea e tagofia ona itutinosa  (tulou), ae faasaga atu ai le teineititi sasa lona lima i le salulima.

Na ta’utino le ua molia o le gaioiga sa ia faia e le tusa ai ma ala o le tulafono.

Na faatoese Tusiga i le faamasinoga e tusa ai o le solitulafono sa ia faia, sa ia faatoese foi i ona matua aemaise ai le teineititi na aafia ma lona aiga. Na taua e Tusiga, o le solitulafono sa ia faia e le o se gaioiga lelei, ua  ia lagona lona salamo ao taofia ai o ia i le falepuipui, ma ua toe fia fo’i i lona aiga.

Na faamatala e le tama a le ua molia i luma o le faamasinoga le mafuaaga na ala ai ona aafia le mafaufau o le ua molia, talu mai le taimi na laititi ai o ia seia oo mai lava i le taimi nei. Na taua e le tama, na lavea Tusiga i se pasi ina ua 3 ona tausaga, ma afua  mai ai loa iina suiga i lona mafaufau.

O isi aso ina ua oo le aoga a Tusiga i le Vasega 9, e maua mai ai i Tula poo Amanave o ti’eti’e pasi ai ma nisi o tamaiti aoga, o nisi foi o aso e faaeteete gata ai le tuua na o ia ina ua maitauina suiga i lona mafaufau, e pei ona taua e le tama i lana molimau.

Ona o aafiaga i lona mafaufau, na finau ai e tamaitai loia o Ruth Risch-Fuatagavi i le faamasinoga ina ia faanofovaavaaia Tusiga, ma ia poloaina o ia e auai i ni polokalame e faatulaga atu e le Ofisa o le OPAD, e fesoasoani ai i le tulaga vaivai o lona mafaufau.

E ui i le matuia o le solitulafono na faia e le ua molia, peitai na taua e lana loia, o loo manaomia e Tusiga se fesoasoani tau aoaoga mo ia, atoa ai ma le faaauauina pea lea o ana talavai o le mafaufau i le falemai e pei ona faia i le taimi nei.

Na lagolagoina e le loia a le malo le faafinauga e faanofovaavaaia Tusiga, peitai e tatau foi ona i ai se faasalaga faafalepuipui e tuuina atu ia te ia, ina ia aoaoina ai lona mafaufau mai le gaioiga sese sa ia faia.

Na taua e Mitzie Folau na tulai mo le malo, o le itu matuia o lenei solitulafono, o le laititi lea o tausaga o le teineititi na aafia i lenei solitulafono, ma ua avea ai le mea sa tupu o se mea o le a manatua pea i le loto o lenei alualu toto i lona olaga atoa.

A’o lei tuuina mai le faasalaga a le faamasinoga na saunoa ai le alii faamasino sili lagolago ia Lyle L. Richmond, e le o se mataupu faigofie le mataupu lenei aemaise lava i le iloiloina o se faasalaga talafeagai.

Sa i ai le manatu o le faamasinoga e faasala Tusiga i se faasalaga pito sili ona mamafa, ona o le matuia o le solitulafono sa ia faia, peitai i le isi foi itu, sa vaavaai le faamasinoga i le manaomia lea e Tusiga o se fesoasoani i lona mafaufau, ona o aafiaga o le mafaufau o loo aafia ai o ia.

E ese mai i le faasalaga faa falepuipui e 3 tausaga lea ua tuli e Tusiga, ua poloaina foi o ia ina ia faaauau ana talavai i le falemai, ma ia auai i aoaoga o le a faatulaga e le malo, e fesoasoani ai i le aafiaga o lona mafaufau.