Ads by Google Ads by Google

Loka 20 masina i le fasi teine

Ua fa’asalaina e le Fa’amasinoga Maualuga, ia se ali’i na ia fasia se tama’ita’i, ina ua musu le tama’itai’ e fa’amalie ona lagona tu’inanau.  E 20 masina ua fa’asala ai Sausaulele Siua i le to’ese i Tafuna, o se tasi o tu’utu’uga o lona fa’anofova’ava’aia e 5 tausaga.

O lenei fa’alavelave na molia ai Siua, na tula’i mai ina ua mae’a se fiafia o se fa’aipoipoga, i le po o le aso 29 Aperila 2010, na fa’aauau ai le evaga a le ua molia ma ana uo, ae ona o se fe’ese’esea’iga na tula’i mai, na mafua ai ona talosaga le tamaitai na a’afia ia Siua pe mafai ona ia momoli o ia i le faletalimalo o le Airport Inn Hotel.

Ae peita’i, e le’i alu sa’o Siua i le vaega o lo o i ai le faletalimalo, ae na ui i le auala o lo o i ai le Ofisa o le M&O i tafatafa o le nofoaga o lo o i ai le Ofisa o Galuega, paka lana ta’avale i se vaega pogisa, ae taumafai e kisi fa’amalosi atu i le tamaitai na a’afia, e ui sa musu le tamaitai.

Na taumafai le tamaitai na a’afia e oso i fafo ma le ta’avale, peitai sa tauanau e Siua o ia la te uo, atoa ai ma lona taofia o ia i totonu o le ta’avale. Na fa’aaoga e Siua lona lima e fusi mai ai le ua o le tamaitai ina ia mafai ai ona taofi o ia i totonu o le ta’avale, ae na avea lea ma itu na tau le mafai e le tamaitai ona manava, seia o’o ai ina mafai ona mamulu ese mai lima o Siua ma oso ese loa le tama’ita’i ma le ta’avale ma totolo atu i luga o vao.

Fai mai fa’amaumauga a le faamasinoga, o le taimi lea na oso atu ai loa Siua ma saofa’i i luga o le tamaitai na a’afia, ma ia tatu’ia ona foliga, a’o taumafai pea le tamaitai e totolo ese ma taumafai e tete’e atu i gaioiga a Siua.

Ina ua mae’a ona fasi e Siua le tamaitai, sa ia toe fa’atoese i ai ma fai atu, “Ou te alofa ia te oe, ou te alofa ia te oe, faamolemole faamagalo mai a’u,” ona ia oso lea i lana ta’avale ma alu ese, ae ta’atia ai lava le tama’ita’i ma ona manu’a i le vaega na fasi ai o ia.

Ao lei tu’uina atu le fa’asalaga a le fa’amasinoga mo Siua, sa maua le avanoa la te fa’ato’ese ai ma lona to’alua, ma la talosagaina ai le fa’amasinoga mo se isi avanoa, sei toe foi atu ai i lo la aiga.

Na fa’ato’ese foi le ulugali’i i le tama’ita’i na a’afia, lea sa i ai i totonu o le potu fa’amasino, ina ia alofa ma faamagalo le ua molia. Na tautino Siua i le faamasinoga.

Na lagolago i le fa’ato’esega a le ua molia ma lona toalua, le loia fautua ia Mike White lea sa tula’i mo Siua, ma ia ta’ua i le faamasinoga e faapea, o Siua, e le gata o le taimi muamua ua solitulafono ai, ae o ia o se alii faipisinisi talavou, ua sese le fa’ai’uga ua ia faia.

Ae na ta’ua e le loia a le malo, o Mitzie Jessop Folau e faapea, e ui o lea ua ta’utino Siua ua ia salamo, peitai o le gaioiga sa ia faia, e matua matuia lava, e le gata na manu’a tigaina ai le tamaitai na a’afia, ae o le ma’ila lea o lo o i lona muaulu, o le a tumau e le toe ave’esea, ma o le a fa’amanatu atu ai foi ia te ia i aso uma e ola ai, le faalavelave na aafia ai o ia ona o Siua.

Na fa’ailoa e Folau i le fa’amasinoga, na avea le fefe o le tamaitai na a’afia ina ua ia fa’alogo ua tatala i tua Siua e fa’atali ai lona fa’amasinoga, ma itu na malaga ai loa le na a’afia i fafo ma nofo ai.

O le fa’aiuga a le alii faamasino sili lagolago ia Lyle L. Richmond, sa ia saunoa ai e faapea, e ui o le gaioiga sa faia e Suia o se gaioiga sa faia na o ia, peitai e fai lava si matuia ma ‘oga’oga o le mea sa ia faia, aemaise foi o le auala sa ia fa’atino ai lenei solitulafono.

O isi poloaiga a le faamasinoga mo Siua e aofia ai lona auai i ni aoaoga e fesoasoani ai i le tulaga o le ita vave, ma ia aua foi nei ona toe soliina se isi tulafono a le malo.