Ua foliga mai o le latalata atu lava i le Kerisimasi, ua fa’apea fo’i ona valea ma ulu o le au fai’oloa o le atunu’u! Lele ua oso mai i luga o le fua le ali’i mai Korea i Saute - Mr Lee ma lona fale’oloa o le Peradise Inc. i Nu’uuli.

Fai mai e 20% lea o le a to’ese mai i tau o mea uma lava e te fa’atauina mai le latou fale’oloa! Oka, masalo o saili se pasese o le ali’i pu’eata lea e fia alu i Korea i Matu e tapu’e mai ata o le maliu o le Peresetene o lena malo lea ua fa’ailoa mai, ua maliu i le fa’ai’uga o le vaiaso na te’a nei.

Oka o se taimi muamua lea ua fa’asoloatoa ai lana pa’u i tau o oloa uma i totonu o lona fale’oloa. Fa’afetai i lona fia fiafia e fa’asoa mai i le tatou nei vaitau fiafia o le tausaga. Pau le mea ou te pikia ai le faleoloa lea, tusa pe tumu fata o lona faleoloa pe a e ulufale atu i ai, ae le taitai ona aumaia i fafo. E fai mai lana tala, “E leaga ou te iloa e pefu le alatele, ma e le atoatoa ai le lagona malu o le tagata fa’atau pe afai o le a sau i totonu.”

O le tala mai le ali’i Thomas Drabble ma lana Sadies, o lea ua toe fa’aoso mai lana Brunch, o lona uiga ua le Breakfast, ae oso mai ua ‘aiga i le va o le malu taeao ma le ‘aiga o le aoauli. Lele ua fa’ailoa mai, e ta’i $19.95 i le tagata matua, le isi vaega feololo e $12.00, ae o le 5 aga’i i lalo tausaga ua tausami e le totogia. Sole na ona iloa lava e le isi fafine faia’oga o le a’oga aso Sa, fai ma le ofo, “ave uma lava la’u vasega i le Sadies pe a tu’ua le lotu i le aso Sa!”  Alofa e masau atu e na’o le ta’itasi lava tamaiti i aiga ta’itasi e maua lea fa’amanuiaga, ae le o le a’oga aso Sa atoa! Ha ha.

Va’ai la oe lea e malaga i Apia, e le o misia mai oe i le fa’asologa o Pisinisi ma latou tautua e ofoina mai i ni tau ua fa’aitiitia. Lele ua mae’a ona e totogia iinei sou potu, ae fa’ato’a e malaga ai, ae faia i le vaega a Pelene po’o le vala’au i le telefoni 688-7222. Se ele toe popole i le fa’asoaina o le tupe latou pe a o’o i o, aua e totogia uma lava i’inei. E o’o lava i le oso i le ta’avale i le malaeva’alele ma toe fo’i ane i le aso e toe sau ai. Se le latou faletalimalo o le Insel Fehmarn i Tanugamanono. Aua le toe oso le sauni i Samoa, ia alu lava ua uma ona totogia uma mea e fai ai ou uiga! Ha Ha!

Le Kamupani Ta’avale a le Toyota, lea ua fa’ailoa mai le latou fo’i fesoasoani i lau fa’asoa! E amata mai lou fa’aaogaina o se ta’avale Toyota mai le Avis Car Hire, e o’o i le fa’atau o se totoga o laua ta’avale ma le fa’atauga o Ma’a Ta’avale afi, afai e silia ma le $100. ua fa’aalu, ona tu’ua lea o lou suafa i le latou se’i mo le Kerisimasi. O le se’i e mata’utia o latou fa’ailoga. O le TV lanu tele 42inisi le fa’ailoga muamua. O le fa’ailoga lona lua o le 3 pusa o seti meafaigaluega ‘eseese ma le fa’ailoga lona tolu e 3 fo’i aso e te fa’asavili solo ai le ta’avale mai le Avis Car Hire.

Oso i ai i totonu, va’ai lau ponesi e fa’aaoga tatau mai, e te’i lava ua maua ai nisi mea aoga mo le aiga i lau fa’atauga o na mea aoga, ae leaga ona fa’aaoga vale i nisi mea e tasi lava le taimi e te fiafia ai, uma e le toe maua mai!

Manatua fo’i i lou mafaufau, o lou laki lava i lau se’i e te pikia ai se 50% mo le tau o sou se’evae mai le Shoe Tree. Oka e le sau fa’alua lava Santa Claus - e tasi lava le taimi e sau ai, ona fa’ato’a toe tatalia fo’i i lea mo le tausaga fou.

Afai o viga lava le fanau mo se Computer e faia ai latou meaa’oga, ia o le taimi lelei lava lenei e fa’ailoa ai lou agaga i lau fanau, fa’atau loa ma se Komipiuta pe a maua se meaalofa.  Fai mai e faia fo’i le latou se’i, fa’atau ai se mea i’ina e fe’avea’i ai meaa’oga a le fanau, Flash drive, ma maua ai se ticket mo lea se’i tele a i latou. O fa’ailoga, o le Laptop, se ua le toe feoa’i ni tamaiti i fafo ma ni ‘api, ua feoa’i solo ma Laptop i ‘ato. Soso’o lea ma isi mea ia e mafai fo’i ona sefe i ai latou meaa’oga ma latou homework, 10inch Tablet ma le 16iPod. “Se Mama, o mea uma lava na e matua sipoki ai lava le fanau, ae o oe ma a’u, o le vaega fo’i lea sa ola mai i vaitau e fa’avavau. E iloa lava e tamaiti latou mea e fa’aaoga i ai na mea!”

O le vaitau lenei, pe afai o i ai sau manamea pe o gau lava fo’i lou loto i se fa’alo’ilo’i ae le’i mafai ona fai i ai se tala, o oe la lena e aoga i ai le Treasure Island. Se le manogi o latou moliga’o mo le aiga atoa, e fa’amanogi

Fai mai ua pa’u fo’i le 10% mai oloa o teuga eseese tau filifili auro, mama o so’o se ituaiga, ile siliva po’o le auro, teuteuina i ma’ataua matagofie e talafeagai ma le tau o lou mana’o o i ai i lau manamea. E le gata i na oloa ae ua i ai foi ma fagu fa’amanogi, sasala ma le fa’agauloto, ia e sauni lelei, aua e le taugofie le onosa’i, amio lelei toe tausa’afia! Ha Ha! Fai mai le isi toea’ina, e uma lava mea toe fofo’e atu ma le pa’u, ae o lo’o tutu mai lava le tama’ita’i i lou mafaufau, e foliga mai e le’i taitai ona maua lona tau! Ae uma la pe a e tago loa fa’atau ma se moliga’o manogi, e fa’aliu suavai ai ona lagona!

Ae o lea fo’i ua sau le Origin Energy latou, aua ua fai si leva o fa’asaga lea Kamupani Kesi e fa’alauiloa le fa’aaogaina o latou oloa i totonu o aiga, mo le tapenaga o fofoga taumafa ma isi lava faiga ua mafai ona e fa’aaogaina ai le Kesi nai lo le eletise lea ua si’itia pea lona tau. Na faia latou fa’aaliga nei i le Maketi fou i Fagatogo i afiafi o aso Faraile, ma sa iloga ona tumutumu i ai le atunu’u.

Peita’i o lea ua fa’ailoa mai, pe a fa’atau sau ogaumu po’o ni oloa mai o latou faleoloa i le atunu’u, ona e agava’a ai lea mo se avanoa e te maua ai se Turkey po’o se Pepa e talafua ai oloa mai le Faleoloa o le Forsgrens, lea fo’i ua fa’ailoa mai le latou vaega fou o lo ua tautuaina ai le atunu’u, Fuala’au Aina. Fai mai ua pa’u fo’i le tau o latou ogaumu e ta’i fa mataafi.

Aua nei galo ia te oe le tama e fiafia tele i ai le aiga atoa. Le Pizza Hut ma le latou pa’u i le tau o latou Pizza ma isi fo’i mea fa’aopoopo lea ua fa’ailoa mai.

Lua Medium tasi le fa’atumu fa’atasi ai ma le 10 dunkers po’o Keke Sukalati i le tau e $29.95. E lava lelei ai le fanau, ma e mafai ona fa’afiafia ai latou ae o Mom ma Dad i le tifaga se’i maua fo’i se la’ua taimi nao la’ua.

Va’ai le soso’oga, po’o ai lea o le a soso’o ai i latou tautua mo le mamalu lautele.