Pago Pago, AMERICAN SAMOA — Na amatalia le sauniga o le fa'au'uga a le A’oga Maualuga a Tafuna, i le taeao o le aso Gafua, Iuni 18, i le Luamua o le Toa, ma na fa’au’u mai ai fanau e 225 i latou ua fa'au'u mai ai.

"Tu'utu'u i le loloto, e tamali'i le poto" - (“Be prudent, wisdom with discern your way”) - o le sini lea a le ‘au fa’au’u ma o le fautuaga tima'i lea ua fa'aautu i ai lenei tausaga mo le vasega o Toa o le a talafa'auto e tausaili le atamai lautele i Kolisi ma Iunivesite, po'o le faigaluega fo'i ma le taumafai i vaega 'au a le malo tele.

O le saunoaga e fa'afeiloa'i sa nafa ma le tama'ita'i pule a'oga, Tutuila N. Togilau. O le fa'alauiloaga o le Togisilia ma le Tulaga lua i le vasega fa'ai'uaso sa tolaulauina lea e Telesia Mauigoa, le Sui Pule A'oga i Tafuna High.

O le tama'ita'i ua maua le togisilia o Nicole Lefetutasi Semeatu. Na soifua mai ia Oketopa 8, 2000, tele o taimi e tausia ma a'oa'o e matua o lona tina, ma ia maua ai le fa'amanuiga o le fa'atasi i aiga, ekalesia ma le a'oga e sili ona atina'e ai le tagata soifua. "Ua a'oa'oina o a'u ina ia tauivi i a'oa'oga, ma le mata'u i le Atua i mea uma, atoa ma le fa'alogo i faia'oga ma usiusita'i i fa'atonuga, e maua ai le atamai,” o se tala tusitusia lea a Nicole, ma o le sui o le New Apostolic Church i Tafuna.

O le tulaga lua i le vasega na maua e Mua Fiatoa. Na soifua mai o ia i ona matua Sione ma Tofaga Fiatoa ia Aukuso 21, 2000. "O le Mata'u i le Atua o le amataga lea o le poto. O le upu lea e fa'avae uma ai mea e fa'anaunau i ai lo'u olaga, aua o le fa'amanatu lea a o'u matua ia te a'u i aso uma,” o se tala tusitusia lea a Mua, ma o ia o le sui totino o le AOG Tafuna ma e pese fo'i o ia i le Praise Team a lana Ekalesia.

I le Laumua o le Toa ua maua ai nisi sui iloga o i latou na fesoasoani malosi i lana tauiviga fa'alea'oa'oga. I ona faia'oga, o faufautua ma i latou sa fa'auo e fa'afiafiaina ai le agaga a'o alo faiva i sailiga o le atamai. Ua ia mautinoa fo'i, e le'i afa lana sailiga i le taimi nei, e ao ina tula'i ma tu'utu'u le u pega fagota i le loloto, aua e tamali'i le poto.

O le tama'ita'i na avea ma fofoga tima'i o le vasega fa'aiuaso o Letupu Tauanu'u - Moananu, o ia o lo'o avea ma Dean of Academic Affairs i le Kolisi Tu'ufa'atasi.

O lana tu'ualalo i le fanau i le latou aso fa'apitoa, "Ia loloto lau sailiga, ae ia e iloa lelei, ia fetu'una'i muniao pe a o'o i ou faiva i fanua, aua e sili atu ona tamali'i fa'afoega a i latou na mua i malae i le faiva, nai lo i tatou ua fa'aa'u'upegaina i le atamai fa'aonaponei mai fafo." O lana sailiga sa maualuga ma loloto peita'i i lona toe taliu mai i fanua, e a'anoa atu lava faiva sa a'oa'oina ai e lona tua'a alo a le atunu'u sa soloa'i atu i ai, ae na'o le AA le fa'ailoga o lo'o fa'atautaia ai e lona tama ana a'oa'oga uma.

"Ia fa'autauta lava ma taumafai atili, a fa'aletonu ma ua sasi se mea, toe tu a'e i luga ma toe tausaili, o le malosi'aga lena e fa'aofi atu e lou mata'u lava i lou Atua, ma e tauivi ia ausia lau sini, le mafuaga na e mua'i faia ai le la'asaga muamua o lau taumafaiga."

O le taliaina o fanau a'oga ua pasia mataupu uma e umia ai latou Tipiloma mai A'oga Maualuluga a Amerika Samoa, sa tu'u atu lea faiva i le tama'ita'i Fa'atonu o A'oga Dr Ruth Matagi-Tofiga ona tutula'i lea o le mamalu o vala'aulia fa'apitoa, Kovana Lolo Matalasi Moliga, Faife'au Rev Alapi Eti ma le afioga Lutena Kovana Lemanu Peleti Mauga, ma le Peresetene PTA Fareti Mamea mo le taua'aoina o Tipiloma o le 225 fanau fa'au'u.

Na tolaulauina fa'ailoga sikolasipi a le Malo mo le fanau ua agava'a ai: Nicole Semeatu, Mua Fiatoa, Safuiane Fonoti, Ida-Lina Wilson, Isek Kuki,  Vini Sipili, Janice Lemusu, ma Fotuatua Afioa'e.

O fa'ailoga fa'apitoa na tufatufaina lea i le sauniga fa'apitoa ina ua mae'a le Pakaloli, o le a tusia i se isi tala i le LALI.