Ads by Google Ads by Google

140 fanau fa’au’u mai le A’oga Maualuga a Leone 2018

A look at some of the 140 graduates of Leone High School class of 2018Leone High School class of 2018 Valedictorian, Stephanie Lynn Sagapolutele Floor.Leone High School class of 2018, Co Salutatorian, Elizabeth Liua Tevaseu Kepaoa.Leone High School class of 2018, Co Salutatorian, Al Joe Aumua

Pago Pago, AMERICAN SAMOA — "Mua'i tigaina mulia'i fa'aeaina! Sacrifice comes before success” - le manulauti na fa'ataua e le vasega fa'ai'uaso a le A'oga Maualuga a Leone mo lenei tausaga i le fa’au’uuina i le taeao o le aso Faraile o le vaiaso ua te’a, i le fale ta’alo a le aoga.

Na tutula'i le susuga le faife'au Rev. Fa'alili Otineru o le EFKAS i Fagali'i, ma ia tapena se upu tomua mo le aso fa’amoemoeina. "Mua'i ositaulaga mulia'i Manuia" o le fa'aleagaga lea o le manulauti.

O le tama'ita'i pule a'oga, Mrs. Mataua Aasa Matai sa fa'afeiloa'ia le au vala'aulia mamalu.

Mai le to'a 140 o le ‘au fa'au'u, ua maua ai le togisilia i le vasega e le tama'ita'i o Stephanie Lynn Sagapolutele Floor mai Iliili. O ona matua o Patricia Ann Zecchini (ua tu’umalo) ma Carl Sagapolutele Floor, ma na soifua mai o ia ia Fepuari 9, 2000. Ua fiafia tele o ia ona ua fa'aeaina o ia i lenei matati'a i a'oa'oga, a'o molimauina e si ona tina matua o Latea Sagapolutele Floor. O ia o le Peresetene o le Green Club, Totino o le NHS Leone, totino fo'i o le Close-Up Club. Na auai o ia i le National History Day, Science Fair, Speech Festival, le Congressioanl Art Competition ma le Young Writers Essay Competition. O ia fo'i o le totino o le National Beach Handball U19 Team ma e Ta'alo fo'i i le Soka. Ua ia umia le fa'ailoga o le U17 Tama'ita'i Ta'alo o le Tausaga 2018 ma le teine sili le ta'alo lelei i le Oceania U17 Beach Handball. O lo'o auai fo'i o ia i le 'au handball a Amerika Samoa mo le Youth Olympics i Argentina ia Oketopa 2018.

E to’alua i la’ua ua mauaina le tulaga lua:

•    Al Joe Aumua mai Pavaia'i. Na soifua mai o ia i le aso 15 Iulai, 2000 i ona matua o Sofeni ma Su'isu'i Aumua. O lana Ekalesia o le New Beginning United Pentecostal Church lea e tausia e ona matua fa'aleagaga Rev. Elder Taualai ma Eleitino Fa'ate'i. O ia o le Peresetene o le Vasega fa'ai'uaso 2018, totino o le Taumafai Chapter, totino o le NHS i Leone, totino o le Close Up Club ma le Student Council. Na auai o ia i tausinioga a le National History Day, Speech Festival, Science Fair, Young Writers Esssay Competition ma le Mathematics Competition.

•    Elizabeth Liua Tevaseu Kepaoa, na soifua a'e o ia i Queensland, Ausetalia ia Aperila 29, 2000, ae ua aoaoina ma alaala tumau nei i Amerika Samoa. Na amata ana a'oa'oga i le Manumalo Baptist Academy i ana a'oa'oga tulaga muamua 2003 - 2012 ona fa'au'u lea i le vasega 8 mai le St Theresa Elementary i Leone i le 2014 ma amatalia ai ana a'oga maualuga i Leone. O ia o le sui totino o le Close Up Club, HOSA ma le NHS i Leone. O ia o le Task Force Commander o Leone HighJROTC Program ma o le Teutupe a le Asosi a Fanau A'oga i Leone. Na auai o ia i tauvaga a le Speech Festival, Science Fair ma le National History Day. Na tulaga muamua lana galuega fa'atino i le Territorial History Day ae tulaga tolu i le tauvaga atoa a le Teritori. O lo ua ia umia le Leone High Female Scholar Athlete 2017-2018. O lo'o fa'anaunau o ia e avea ma se fomai i le Militeri. O ia o le alo o Lalomaota Ta'ioalataua Keila ma Auafafuataga Monroe Tevaseu o Asili, Saletele, Vailu'utai ma Asaga i Samoa.

I le sauniga o le fa’au’uga, sa saunoa ai Kovana Sili, Lolo Moliga, ma ia fa’ailoa i le ‘au fa’au’u, "O le lava sa ia lulu le tasi, e toe selesele fo'i le tasi, a lulu le tele, e selesele fo'i le tele. O le aso lenei ua tatou fiafia fa'atasi aua o le Liona e Toa, e toa uma lava i tatou, pe a tatou le maumau le taimi i isi mea e le aoga, ae fa'aalu e tausaili ai mea lelei i lo outou lumana'i. Iloa lelei e outou le fanau, e le faigofie le tausailiga, ae muamua mai le tigaina, ae mulimuli mai le fa'aeaina ina ua a'e manuia faiva!"

O le fofoga fa’apitoa na tofia e le vasega fa'ai'uaso, o se tasi fo'i sa fofoa atu i le Laumua i Leone, le susuga le Faipule Fagaoatua Dorian Salave'a mo lana fa'amalosi i le fanau ua sauni e taoso le folauga i a'oa'oga maualuluga.

O le taliaina o le vasega fa'aiuaso sa tutula'i ai le tama'ita'i Fa'atonusili o A'oga Dr. Ruth Matagi-Tofiga.

Na muamua lava fa'atagi le Leona, toe usu atoa ma le mau a le Leona, e fa'ato'ato'a ai lagona o le failauga fa'apea ma le vasega fa'aiuaso. E tele ana fautuaga fa'amalosi i le vasega o Liona o le a fa'alele, peita'i sa ia toe fa'atepa i latou, "A e miti, matua moemiti i mea tetele. Ae uma loa na e miti ala mai loa e fa'atino le sailiga o lau miti, ae le fa'apea o le a mitimiti ai lava, ae leai se fa'atinoga."

E tolu miti na ta'ua, ae o miti tetele ua ia lagona ua toeititi tino mai, ma e lelei ai ni mea i le Laumua i Leone, sa ia fa'ailoa mai. "Ua ou miti o le a fa'atula'ia se isi Board tele o le Faleta'alo i Leone. Ua nofo sauni fo'i Leone e tausaili ia tino mai lea miti, ae fa'aopoopo atu i ai ma le a'ao foa'i mai a le Malo i le matagaluega o a'goa ma le afioga le Kovana Sili. E mautinoa e tino lea miti."

"Ua ou miti fo'i o le a i ai se potu o masini komipiuta e fa'aaogaina e le fanau a'oga mo latou suesuega i le tausaga a'oga a sau nei. E le o toe malolo le vasega o Liona tuai, Liona o lo'o a'oa'oina pea, fa'atasi ai ma e uma e agaga i lenei poloketi ina ia tula'i.”

O le avanoa na tu'uina i le vasega fa'au'u o le tausaga 1988 mo le latou fa'ailoga fa'apitoa e fa'amau ai le atoaga o le 30 tausaga talu ona latou fa'au'u ma sa taua'aoina nei fa'ailoga i Faia'oga e to'alua ua atoa le 29 tausaga o avea ma Faia'oga i Leone.