Ads by Google Ads by Google

12 Fanau Fa'au'u mai A'oga Maualuga a Manu'a, 2018

Manu'a, AMERICAN SAMOA — O le aso Faraile ua te’a na fa'ataunu'uina ai le sauniga o le fa'au'uga mo fanau fa'ai'uaso mai le Laumua o le Segaula, le Aoga Maualuga a Manu’a, i le Manu'atele. E to'a sefulu ma le lua i latou na fa'au'u mai i lenei tausaga ma ua fa'ale'ia fo'i i latou i apoapoa'iga ma tima'iga aoga mai ta'ita'i o le sauniga, ta'ita'i o le Malo ae maise foi o le fofoga fa'apitoa sa latou tofia i lenei tausaga, le afioga Senatoa Nuanuaolefeagaiga Saolauga A. Nua.

E le gata i lea, ae sa auai fo'i le Komiti Mamalu o le Fa'ailogaina o le 50 tausaga talu ona fa'atuina le aoga maualuga i le Manu'atele, Talia Fa'afetai I'aulualo, ma sa ia fa'aopoopo fo'i i tima'iga matagofie mo le fanau ina ia tauivi ma finau i avanoa lelei ua maua e tausailia ai le atamai ma ia umia fo'i le taui o fa'ailoga maualuluga e agava'a ai i le tele o galuega i le malo ma pisinisi tumaoti.

Mai le vasega fa'aiuaso, o le togisilia sa maua e le tama'ita'i o Samantha Scanlan, o se tasi sa amatalia lona soifua a'oa'oina i Aua Elementary, soso'o ai ma le ulufale i Fagaitua High ae fa'ai'u atu ana a'oa'oga i le A'oga Maualuga i Manu'a, ona ua si'itia matua e galulue i le Ekalesia i le Manu'atele. Sa ia fa’ailoa, “O lo'o faia fa'atasi lava ma le finagalo o le Ali'i, ua si'itia matua i le galuega ma ua fa'apea fo'i ona to'ai taunu'u mai ai ma aoga ai i lenei laumua matagofie, lea ua fa'au'u ane le a'oga maualuga, ua avea ma se tasi o Segaula."

O le tulaga tua sa mauaina e Safaira Numera ma sa mata'ina fo'i lana taumafaiga i lenei tausaga. O ia o le tama'ita'i ua atoa lelei le fa o tausaga o a'oa'oina i le Laumua o le Segaula ma ua tamau fo'i i lona loto, "Ou te mafaia mea uma lava i le fa'amalosi mai o Keriso ia te a'u!"

O le sini a le ‘au fa’au’u i lenei tausaga, “Ou te mafaia mea uma lava ona o ia ua fa’amalosi mai ia te a’u”.

I le saunoaga a le afioga le Kovana Sili Lolo Moliga ma le fofoga fa'apitoa mo le 'au fa'au'u, Nuanuaolefeagaiga, sa la'ua fa'amamafa lava lea tulaga. "O le mata'u i le Atua o le amataga lea o mea uma, po'o le a lava le faigata, ae ia pipi'i mau i lou talitonuga, e te mafaia mea uma i le fa'amalosi mai o Keriso ia te oe!"

O le tama'ita'i pule a'oga, Patricia Fuiava, sa lauga fa'afeiloa'ia le mamalu o le auvala'aulia ma le vasega o matua ma aiga.

O le taliaina o le vasega fa'aiuaso na tula'i ai le tama'ita'i Fa'atonusili o A'oga a le Malo Dr. Ruth Matagi-Tofiga ma tufatufaina ai tusi pasi. Na tufatufa fa'atasi atu ai fo'i ma Tusi Fa'ailo fa'apitoa mai le Faipule o Amerika Samoa i le Konekeresi, Aumua Amata.

Ina ua mae'a fo'i le pese a le vasega fa'au'u ona tu'uina lea o le avanoa mo fa'ailoga fa'apitoa ua saunia e le Komiti Fa'afoe o le Fa'ailogaina o le 50 tausaga o Manu'a High, e fa'alauiloa nei fa'ailoga ma sui ua agava'a ai.

O le fa'ailoga muamua mo le Sui ua Maoa'e lana taumafaiga ua fa'au'u mai le Manu'a High, ma ua latou filifilia ai le afioga le Kovana Sili. Na fa'au'u mai le Manu'atele, si'itia mai a'oa'oga ma umia lona Bachelors, fa'aauau ma toe umia lona Masters Degree, ona tutula'i loa lea i tofiga eseese o le Faigamalo a Amerika Samoa, e aofia ai lona avea ma Faipule ma Senatoa o le Manu'atele i le Fono Faitulafono, avea ma Peresetene o le Senate ma soso'o ai ma lona avea ma Kovana Sili. O lona fa'ailoga o le Plaque ma le fa'ailoga tupe.

O le fa'ailoga lona lua ua tapena mai e le Komiti o le 50 Tausaga o Manu'a High, o le fa'ailoga tupe e $1,000 mo le ua avea le togisilia o le vasega fa'aiuaso, le tamaitai ia Samantha Scanlan.

O le ‘au fa’au’u a Manua i lenei tausaga e aofia ai: Andrew Ilimaleota, Chris Logoleo, Letisha Milo, Meleane Salesa, Samantha Scanlan, Tautalaaso Kuka, Alivalu Afo, Crystal Logoleo, Joshua Taula'i, Nofoao Tuialuuluu, Safaira Numera ma Vincent Simolea.

O pese ma vi'iga o le sauniga mamalu, sa tapena ma usuina e le vasega fa'ai'uaso mo le latou sauniga atoa.