Ads by Google Ads by Google

106 ‘au fa’au’u mai le A’oga Maualuga a Fagaitua 2018

Fagaitua High School class of 2018 [photo: Leua Aiono Frost]Fagaitua High School class of 2018 Valedictorian, Selaina Johanna P. Tuatoo [photo: Leua Aiono Frost]Fagaitua High School class of 2018 Co Salutatorian, Sauiluma Afusia [photo: Leua Aiono Frost]Fagaitua High School class of 2018 Co Salutatorian, Tiara Ului So'otaga [photo: Leua Aiono Frost]

Pago Pago, AMERICAN SAMOA —  O le sauniga o le Fa'au'uga o le Vasega Fa'aiuaso 2018 a le Laumua o le Toa o le Vasa, na taua'aoina aloa'ia ai tipiloma mo i latou e to'a 106.

O le sini a le ‘au fa’au’u, "The Hero Within!" po'o le "Agaga o le Toa!"

Na auai le Kovana Sili Lolo Moliga fa'apea le Lutena Kovana Lemanu Palepoi Mauga, fa'atonusili o A'oga Dr Ruth Matagi-Tofiga ae maise aiga ma le toatele o le ‘au valaaulia.

Rev. Siaosi Fale na si'itia le talosaga amata fa'apea ma le fa'ai'uga o le aso fa'amoemoeina o le fanau faau'u.

O le fofoga o le aso na filifili ai William Spitzenberg, o se tasi o Toa o le Vasa na fa'au'u mai i Fagaitua i le tausaga e 1994. Ua avea nei o ia ma se tasi o fa'auluuluga o le Puleaga o le Eletise ma le Suavai Taumafa (ASPA).

O le togisilia o le vasega o le tama'ita'i o Selaina Johanna P. Tuatoo mai Alofau, Aua ma Oneasosopo. O lana GPA e 3.94 ma ona matua fa'aleagaga o le susuga le Peresetene Petita ma Petana Fanene ae o ona matua o Stephen ma Elizabeth Tuatoo. O lo'o i ai lona fa'amoemoe e fia avea o ia ma 'Foma'i mo Toagafitiga o le Soifua' mo fitafita i le Militeri.

O sui e to'alua na mauaina le tulaga lua: Tiara Ului So'otaga mai le afioaga o Tula. O ona matua fa'aleagaga o Epikopo Mamea ma le Faletua mai Tula ma o lana GPA e 3.89. O ona matua o Tupou ma le Faletua So'otaga.

O le ua to'alua i la'ua i lea tulaga o le tama'ita'i o Sauiluma Afusia mai le afio'aga o Aoa. O ona matua fo'i o le Susuga Afusia ma To'oto'o mai Aoa lava i ona togi ua tutusa lelei ai o la'ua GPA 3.89.

I upu tima'i a le kovana, sa ia toe faamanatu ai le latou autu, "O le agaga o le Toa, e ola manumalo ai ma le le to'ilalo ai i mea faigata e fa'asagatau ia te ia i lona ala."

"Ua le na'o le toa o le loto, ae ia toa e tumau i mea ua a'o'a'oina ai oe, e le o le malosi, po'o le fitafita, ae o le malosi e taofi ai lou talitonuga i mea e lelei ai e ui ina faigata le folauga o le a feagai ai,” o le toe tima'i lea a le Kovana i le fanau fa'au'u.

O lana toe fa'amanatu, "A'o e tausaili le poto lautele, ia finafinau i le tatalo, e malosi ai lou loto ma avatu ai e le Atua ia te oe tali o mea lelei uma e te savali ai."

Na toe fa'atepa e Spitzenberg le ‘au fa’au’u i le manulauti a Fagaitua High, "Commitment to Excellence”, po'o le “Fa'amalosi ma Faia Mea Sili!" Ona o le agaga o le Toa e fa'amalosi ai ma faia mea sili, ua talafeagai lava ma le 'auga o le fa'amoemoe o le vasega fa'aiuaso.

Na peseina e Spitzenberg le pese sa latou fatufatua i lo latou tausaga fa'aiu 1994, ma na toe fai ma fa'aoso matagofie o lana upu tima'i mo le fanau.

"E mautinoa e le faigofie, so'o se mea e umi ona lelei, e faigata ona e maua! Peita'i o iina tonu e iloa patino ai, pe ua e loto i le tausinioga, ona moni ai lea o le uiga o le Toa, e tau malosi, ma e manumalo i mea uma!"

"O le Toa ma lona anoa, ua mae'a fa'anofomau i totonu ia te oe le talavou fa'au'u, ae o le a se umi e te gafatia ai ona avea pea ma Toa e tauivi ma so'o se mea fita ina ia e maua le auga o lou fa'amoemoe? Aua ne'i lafoa'i auupega o le taua, ia fa'amalosi ma tutumau, e le vale fo'i lou taui."

O vaega e tolu sa ia fa'ailoa, e mafai ai so'o se taumafaiga fita: "Filifili nei ma aua lava ne'i e tu'ua lau tauiviga ae ia tutumau i ai ma una'i malosi, e te malo ai. Filifili e avea oe ma Tagata e Autu i ai lou lava tala'aga o lo'o e taumafai e maua. Fa'alogo i le leo itiiti mai totonu o lou agaga, ma e mautinoa e te maua le malosi'aga i le mafuta mai o lou Atua ia te oe a'o e tauivi i so'o se mea, e te manumalo ai."

Ma lana toe fautuaga, "Filifili tatau ma ia e fesoasoani atu i se tasi o lo'o mana'omia se fesaosoani, e tau atu ai i lou ala!"

O le taliaina o fanau fa'au'u na gafa lea ma le Fa'atonusili o A’oga, ona taua'aoina lea o fa'ailoga tipiloma o le fanau.