O le taeao ananafi na faatoa mafai ai ona tali le tele o fesili ma matematega sa tuu fesili i ai le toatele o le atunu, poo ai o le a sola ma le siamupini o tuuga fautasi o lenei tausaga, ina ua lele le Fuao mai Vatia ma le mea atoa, ma avea ai ma Siamupini o tuuga fautasi o le sisigafu’a o lenei tausaga.

O le Aeto mai Pago Pago lea na siamupini i le tuuga fautasi o le tausaga na 2012 ua sola ma le tulagalua; Samoana Shark i le tulagatolu; Satani mai Nuuuli i le tulagafa; Fetu o le Afiafi mai Fagaalu i le tulagalima; ma le Fealofani III mai Fagasa i le tulagaono.

E le’i mafai ona tausinio le Matasaua mai Manu’a ona o se faaletonu na tulai mai i le vaa ao aga’i atu i le tuuga. O le faaletonu na tulai mai i le vavevao ananafi a’o lumanai le tuuga, ina ua gau le foeuli o le vaa ao taumafai e toso agai atu i le vaega e amata mai ai le tuuga.

Ina ua fesiligia e le Samoa News le kapeteni o le Fuao, le afioga i le Tamaitai o le Ao ia Gaoteote Palaie Tofau, o ia foi lea o le Peresetene o le Senate i le tulaga sa i ai le tuuga, sa ia saunoa ai e faapea, e lei faigofie le tuuga i lana auva’a, ona e le o se va’a saoasaoa lona va’a, ae o lana faamalosi sa fai i lana auvaa, o le latou malosi lea o le a faamoemoe i ai so latou tulaga mo le tuuga.

Saunoa Gaoteote e faapea, sa lelei lava le amataina o le tuuga, e leai foi se vaa e lei finau i le mua, e ui lava foi sa fiu e faatalitali le taimi e amata ai le tuuga, ae na amata ane ua laina lelei uma vaa i luma o fu’a a le komiti.

O se tasi o itu lelei na taua a Gaoteote na manaia ai le amata o le tuuga i uta, e le gata sa silasila uma ai sui o le komiti na i ai, ae sa sili atu ai le toatele o le atunuu na molimauina le laina tutusa o vaa, ma ua leai ai lava ma se vaa e fia fai togafiti i le taimi o le tuuga.

Na taua e Gaoteote lona tau popole ina ua latalata le latou vaa i le pine lea e liliu mai ai i tai, ae ona vaaia loa le Aeto ua latalata atu.

“O le taimi lea na ou faamalosi atu ai i la’u auvaa ma ou fai atu i ai, o le latou malosi lea o le a faalagolago i ai le tuuga, o iina foi na amata ai loa ona ou faia suiga i ape foe a la’u auvaa ina ia tau faamamao ai le matou vaa ma le Aeto, ma o le agaga faafetai ina ua tini manuia le tuuga e aunoa ma se faalavelave na tulai mai i se isi o le auvaa faapea ai isi auvaa uma sa tausinio,” o le saunoaga lea a Gaoteote.

Na faafetaia e Gaoteote le tapuaiga a le afioga, uo ma aiga tainane ai le itumalo ona o le lagolago ma le alofa atu i taimi o ao taumafai mai lenei faamoemoe.

AMATAGA O LE TUUGA

E te’a ane le itula e 6:00 i le taeao ananafi ua matua faatumulia luma o le ASCO Motors i Pago Pago i le toatele o le atunuu ua lolofi atu e fia maimoa i le amataga o le tuuga. E pei ona silafia, o le afiafi o le aso Lua na toe suia ai e le komiti o le tuuga fautasi le faatautaiga o le tuuga, ma manatu ai loa o le a faaaoga le latou ‘plan B’, lea e amata atu ai le tuuga i luma o le ASCO Motors i Pago Pago, ona alu lea aga’i i pine o lo o i gatai o Lauli’i ma toe fo’i atu ai i le vaega na amata mai ai mo le faamaeaina o le tuuga.

E te’a laititi ane le itula e 6:30 i le taeao ua atoa vaa e 5 i le vaega e amata ai le tuuga, sei vagana ai le Matasaua ma le Fetu o le Afiafi e le’i taunuu atu, peita’i toe o ni nai minute ta le itula e 7:00 ae maua e sui o le komiti sa i luga o le vaega e amata ai le tuuga, ua le mafai ona tausinio le Matasaua.

O le tea laititi o le 7:00 na taunuu ai loa le Sa mai Fagaalu i le vaega e amata ai le tuuga, peitai na toe tuai laititi le amataina o le tuuga, ona sa taumafai le komiti e faalaina lelei va’a ma le pine ina ia mautinoa e leai latalata le isi vaa i le isi vaa ina ne’i filiva’a i le taimi e liliu ai, ma o le taimi lava na sauni uma ai vaa, na pa ai loa ma le fana ma amata loa le tuuga.

TAPUAIGA A AFIOAGA TAITASI

Na matua pisapisa le nofoaga e tini mai i ai le tuuga i le tapuaiga a afioaga eseese sa auai a latou fautasi i le tuuga. O le taimi lava e ta’u mai ai i le leitio le igoa o le vaa o lo o muamua mai i le tuuga, o le taimi foi lea e faalogoina ai leo o tagata o le tapuaiga a le afioaga e ana le vaa ua feei ma leotetele i luga.

O le fiafia tele o ni isi o le tapuaiga a Pago Pago na tulioso ai isi fafine e toalua i le sami ma talotalo i le auvaa, ao agai atu le afioga i le alii faipule ia Vaamua Henry Sesepasara, le kapeteni o le Aeto ma lana auvaa i le tini mo le tulaga lua.

E le’i maua se finagalo o Vaamua i le aso ananafi ona e fesootai atu i ai le Samoa News ae o lo o fai le fono a le afioaga i Pago Pago.

FAAIUGA A LE KOMITI

E tele faamatalaga na salalau solo i le aso ananafi e faatatau i le tulaga sa i ai le tuuga fautasi, ona o faamatalaga e faapea sa i ai fautasi e lei usitaia le faaiuga a le komiti i le taimi e liliu ai le vaa i pine o lo o i tai o le sami.

Na maua le avanoa o le sui o le U.S Coast Guard ia Lt. Erick Runyon o ia foi lea o le taitaifono o le komiti o tuuga fautasi e asia ai le ofisa o le KVZK-TV mo le toe iloiloina o le tape sa pu’eina i le taimi o le tuuga ma faia ai loa lana faaiuga e faapea.

“Mai la’u vaai i le tape sa pu’eina i le taimi o le tuuga fautasi ananei i le taeao (taeao ananafi), sa usitaia uma e kapeteni ma latou fautasi le faaiuga i le taimi e liliu ai le vaa ma le pine e tatau ona liliu mai ai,” o le saunoaga lea a Lt. Runyon.

“O se lagona fiafia lena ia te a’u ona o se tuuga matagofie, lelei ma talafeagai sa faatinoina e fautasi e 6 sa tausinio.”

“Ua aloaia nei la faaiuga o le tuuga fautasi e faapea, tulaga muamua o le Fuao mai Vatia; tulagalua le Aeto mai Pago Pago; tulagatolu le Samoana Sharks mai le Aoga Maualuga a Samoana; tulagafa le Satani mai Nuuuli; tulagalima le Fetu o le Afiafi mai Fagaalu, ma le tulagaono o le Matasaua mai Manu’ua,” o le saunoaga lea a le Lt. Runyon.

E pei ona faalauiloa e le komiti, o le tulaga muamua e maua ina le $15,000; tulagalua i le $13,000; tulagatolu i le $10,000; tulagafa i le $8.000; tulagalima e $5,000 ma le ta’i $1,000 mo le tulagaono ma le tulagafitu.