Ads by Google Ads by Google

LEATUALEVAO: OKI PISIGISI A SAMOA I LE SOLI MALO TULAFONO

FESILIGIA MAFUAAGA UA FAU MA SOLOI AI ASIA ATUNUUE talitonu le afioga i le alii Senatoa ia Leatualevao S. Asifoa, ua mafua ona faaletonu ma le olaola lelei pisinisi a tagata Samoa, ona ua tafe faa vai le sau i totonu o tagata Asia i le atunuu, e le gata la o ni isi o lo o ui mai i auala ua soli ai e le malo le tulafono, ae ua le maua ai foi ni avanoa o tagata Amerika Samoa e maua ai galuega e atina’e ai aiga.I se faatalatalanoaga ma le Samoa News i le taeao ananafi, na taua ai e le alii Senatoa e faapea, o le fau ma soloi o le mau tagata mai Asia i totonu o le atunuu i le taimi nei, ua fesiligia e lona mafaufau, ma ua oso ai lagona masalo, atonu o lo o i ai ni auala faa solitulafono o lo o faia e ni isi o tagata faigaluega a le malo, ua mafua ai ona saoasaoa ma televave le ulufale mai o tagata Asia i le teritori.“A e savali i luga o le alatele ua tagata Asia loaloa, a e alu atu i se faleoloa ua na o tagata Asia o lo o galulue mai ai, ua oo lava fo’i i nofoaga eseese i le atunuu, ua ese la ta vaai, ma ua oso ai manatu alofa i le atunuu e faapea, o le a faapefea nei le lumana’i o alo ma fanau a Amerika Samoa i le lumana’i pe afai ua vaaia le toatele o nei mau tagata ua ulufale mai ma nonofo iinei,?” o le saunoaga lea a le alii Senatoa.Na taua e Leatualevao e faapea, e i ai le faleoloa i lona nuu na amata mai e na o le ulugalii Saina sa i ai, peitai o le taimi nei ua silia i le toa 10 tamaloloa ma fafine Saina ua galulue ai.“E i ai foi isi faleoloa ma pisinisi i le atunuu ua ou vaai i ai, na amata mai le pisinisi o i ai nai tagata Samoa e faigaluega ai, ae o le taimi nei pe afai ae toe asia, ua tutuli ese uma Samoa ae faa faigaluega ai na o tagata Saina poo isi foi o tagata mai le atu Asia, ma o se tasi lea o atugaluga i lo’u sui Senatoa, ona o le tulaga pagatia ua feagai ma tatou, e foliga mai ua eu eu ese nai o tatou tagata ae tuu le avanoa i tagata nei e maua ai galuega ma ave tupe,” o le saunoaga lea a le alii Senatoa.O ia manatu na laga e le alii Senatoa i le taimi o le iloiloga o le Loia Sili ia Afoa Leulumoega Suesue Lutu, faapea ai ma le Faatonusili o le Matagaluega o le Soifua Maloloina ia CSM. Motusa Tuileama To’atoalu Nua i le vaiaso nei.Fai mai le alii Senatoa, e i ai tagata mai Asia e lei leva ona taunuu mai i le teritori, ae ua maua health card e galulue ai i totonu o faleaiga ma pisinisi a Saina ma Kolea e aunoa ma ni pepa nofomau.E i ai foi tagata mai Asia o lo o galulue i totonu o faleoloa ma faleaiga e aunoa ma ni pepa nofomau.O lona popolega o lo o aga’i i le soifua maloloina o tagata ma le saogalemu, ina ia mautinoa e le o faia nei mau gaioiga i ni auala eleelea.“O le a saga nonofo lava le malo ae le galulue e fai se auala e foia ai le faafitauli lenei, e pologa nai o tatou uso mai Samoa e galulue ma totogi lafoga i le malo, ae o mai nei tagata e galulue fua ma la’u tupe i o latou atunuu ae malaia ai tatou,” o le saunoaga lea a le alii Senatoa.O se tasi o vaega e le o nofo lelei i le finagalo o le alii Senatoa, o tagata mai Asia o lo o la’u mai e galulue i galuega fai faatoaga pe kuka foi i faleaiga ma pisinisi a tagata Asia, ae o galuega nei e leai se tagata Amerika Samoa e le iloa fai.Fai mai le alii Senatoa, i lona malamalama i le tulafono, sei vagana lava ua le maua i Amerika Samoa le tagata e faatinoina se galuega i matata maualuluga, ona faatoa mafia lea ona aumai se tagata mai fafo.“Ae aisea ua la’u mai ai Saina ma Kolea e galulue i faatoaga i Amerika Samoa, aisea ua la’u mai ai Saina ma Kolea e kuka i Amerika Samoa, o le mea ea ua le iloa e o tatou tagata fai ni faatoaga pe kuka foi ni meaai,?” o le fesili lea a le alii Senatoa faatasi ai ma lana saunoaga, e i ai lona talitonuga e i ai le vaega o lo o mafua mai ai le faaletonu.O le mataupu lava foi lea na laga e le alii faipule ia Vaetasi Tuumolimoli Saena Moliga ina ua fesiligia tofiga a le kovana mo le susuga ia CSM. Motusa i le vaiaso na te’a nei.Na taua e Vaetasi e faapea, ua maitauina pea le toatele o tagata mai Asia ma Filipaina ua galulue i soo se pisinisi i le atunuu, e le gata i faleaiga, faleoloa ae ua oo lava foi i fale suisui, peitai o le fesili o lo o tulai mai, “faamata o tofu nei tagata ma pepa nofomau.?”Na fautua le alii faipule ia CSM. Motusa, ina ia silasila totoa i tagata nei, afai e maua e le o i ai ni health card e galulue ai i totonu o faleaiga, faasala le pisinisi ae toe faafoi le tagata pe afai e leai ni pepa nofomau.I le talanoaina ai o le mataupu lava lenei, na talosagaina ai loa e le alii faipule ia Puleleiite le Loia Sili, i se avanoa e tuu mai ai i luma o le Fono se ripoti e tusa ai o le aofai o tagata mai fafo ua nofoia le atunuu, e aofia ai Samoa, o isi atumotu o le pasefika, atoa ai ma atunuu mai Asia.O lo o fia iloa foi e le alii faipule pe toafia le aofai o tagata mai atunuu eseese e mafai ona talia i totonu o le teritori i le tausaga e tasi.Ae i lalo o le tulafono tau Femalagaaiga o lo o taua ai e faapea, e 250 tagata mai Samoa e talia i totonu o le tausaga e tasi, ae toa 5 mai isi atunuu uma lava e aofia ai ma atunuu Asia, faapea ai ma isi atumotu o le Pasefika.Ae na taua e le alii senatoa ia Leatualevao e faapea, e ia i lona talitonuga e le tausisia e le Ofisa o Femalagaaiga lea vaega o le tulafono, pe a fuafua i le televave o le aofai o tagata mai Asia ua nofoia le teritori.I le fesiligia ai o le faafitauli i tagata mai Asia e lei leva ona taunuu ae ua maua pepa nofomau, o lo o i luma nei o le Faamasinoga Maualuga le mataupu faasaga i se alii Sinia mai le Ofisa o Femalagaaiga, o lo o tuuaia i le mataupu lea na ia tuuina atu ai ni ID i ni tagata mai Saina se toafa e lei leva ona taunuu mai i le atunuu, ae maua le avanoa e pu’e ai a latou ID.I faamaumauga a le faamasinoga o lo o taua ai, sa maua e lenei alii ni tupe mai tagata Saina nei ina ia mafai ai ona pu’e a latou ID, peitai o ni isi o nei ID, e le gata e le’i faaaogaina numera ae o isi ID sa faaaoga e ni tagata ua leva ona latou tuua le atunuu ma toe foi atu i o latou atunuu.