Ua fia ni falea’oga po’o ni Nofoaga Fa’apitoa ua fa’asuafaina i se Tama’ita’i Samoa ina ia avea ma manulauti o lana tautua matavela i ni setete o le malo o le Iunaite Setete o Amerika? Masalo o se ulua’i Tina Samoa lea ua ave i ai lea fa’amuamua — Leataata Amisone Maiu’u — Floyd mai le afio’aga o Pago Pago ma Utusi’a, Fagaitua.

Afai ua fa’amau fa’apea se suafa o se tina i totonu o le laumua o Kalefonia, e mautinoa e i ai ana galuega tetele ma le iloga, ua afua ai. O le tala’aga o Leataata Amisone Floyd, e le’i mana’o e fa’ailo pe fa’asalalau ia silafia e nisi, peita’i, o le agaga taua, “Ia aoga e to’aga atili ai nisi o le tatou faigamalo fa’ateritori e fa’ailoga ou tulaga a’ao i ni galuega lelei mo nisi e te faia, a’o e soifua ma tautua i au taleni mai lou Atua.”

Na mae’a lona tikeri ma ua fa’aipoipo ia Malcolm Floyd Sr sa la’ua a’o’oga fa’atasi, ona faamautu loa lea i Seavey Circle, Sacramento lea na ia fa’atuina ai se matati’a maualuga i lona taumafai malosi, ia soso’o agaga o aiga eseese uma, mai le tele o lanu ma gagana, o lo’o latou alaala faatasi i lea vaia’ai.

“O se nofoaga sa tetele ai fa’atauga o fuala’au fa’asaina ma sa tele fo’i fa’alavelave tau misaga, fasiotiga tagata ona nei faiga leaga sa tumu ai Seavey Circle.” O se tala toe tau manatu lea a Leataata i le amataga o le nonofo ai i lena nu’u.

Ona o ia sa maua lana galuega e na te fa’asoasoaina nofoaga a le Malo tele mo aiga, (HUD) ae o Floyd sa avea ma se tasi e galue e fa’amasani le fanau talavou i ituaiga ta’aloga eseese e agava’a ai mo le matagaluega o A’oga a le Laumua o Kalefonia, o lea sa fa’afaigofie ai ona soso’o la’ua agaga ma aiga ta’itasi o le latou vai a’ai.

Na vave iloa e tina papalagi, tina lanu, tina Mexico ma isi uma aiga o lo’o i lea a’ai, e malolosi tele loto o tina o Samoa mai le Pasefika. E le fefe gofie fo’i tina Samoa i ni fa’alavelave e tau fa’aolioli mai i le latou vaia’ai, ina ua ia ta’ita’ia le leoleoga tele i le po atoa ma le ao.

“I taimi uma e tau tutupu ai ni vevesi, e le mapu lo’u mafaufau, ona o le va’ai i le fanau, ina ne’i toe maumau atu ae le’i aoga le ola i ni mea lelei mo le aiga, e taulamua ona tu ai ma taumafai e soloia fa’afitauli, ua o’o lava ina talanoa i tama sifi o vaega leaga!” O si ana tala ‘ata lea.

Na fetu’una’i muniao, ma ua talanoa fa’atasi ma matua o le vaia’ai, “Ia fa’afaigaluega mai tama leaga, e toe leoleoina le latou a’ai, ae fa’aaoga i ai le vaega tupe na talosaga mo lea leoleoga mai le malo tele, e fa’auia mai le setete o Sacramento!”

Mai le taimi na ulufale atu ai ma nonofo i lea vaia’ai e le’i i ai fa’atasi ma se ‘au Pasiketipolo, Volipolo, Flag Football ma le Pesipolo a lea vai a’ai, ae o le taimi ua 8 lelei ‘au o ta’aloga eseese nei ua mae’a tu’ufa’atasia ma ua tauva ai le fanau talavou i le laumua.

O le fa’aigoaina ai le fale’aoga i lenei tina talu mai le 2012, o se ala lea a le A’ai o Seavey Sacramento, e fa’amauina ai le auaunaga a le tina mai Amerika Samoa i lana mau ia nofo filemu, fealofani ma fiafia fa’atasi le latou a’ai, atoa ai ma le si’itia o tulaga o a’oa’oga i totonu o Seavey, ma lona naunau ia so’ofa’atasi faia’oga ma matua, ia atamamai ma a’oa’oina latou fanau. 

Ua mafai ona e taina le igoa o le A’oga lea i le google i le initeneti ma e faitau atoatoa ai i le tala’aga o lea a’oga. O se fa’aea lea a Leataata Amisona Floyd i ona matua, Maiu’u Amisone ma Fa’afeumalo Amisone, e sa fofoaina lona olaga a’o itiiti se’ia o’o ina malaga to’atasi e saili sona lumana’i manuia.