Ads by Google Ads by Google

LEALAO: Aua le sailia tupe i auala palapala

Susunu Ofisa Faatoaga oloa na aumai faanana i le atunuu

Ua lapataia e le Faatonusili o le Matagaluega o Faatoaga ni isi o le aufaipinisi o lo o faaaogaina auala palapala ma solitulafono e saili ai a latou tupe, ina ia taofi nei lea tulaga, ona e le gata o lo o soli ai le tulafono, ae fiu lava e fai, e le manuia.

“O le fautuaga e tuuina atu i ni isi o le aufai pisinisi o lo o latou aumaia faanana oloa mai fafo e saili ai a latou tupe, ua tatau nei ona taoto lea faiga manu e le’i maua oe, ina ne’i afaina atu ai oe ma lau pisinisi i le tulafono,” o le fautuaga lea a Lealao Mel Purcell, le Faatonusili o le Matagaluega o Faatoaga a le malo.

O lea saunoaga mai le alii Faatonusili, na afua mai i le mataupu lea na maua ai e le Ofisa ni oloa na aumai faanana i totonu o le atunuu, i luga o le Lady Naomi, i le vaiaso na te’a nei.

O ia oloa e aofia ai ni pusa mago se tolu ma ni puss manapusa se via.

Na faamanino e Lealao i le Samoa News ananafi e faapea, o pusa mago na aumai e se aiga ma le faaupuga e aumai e faaaoga mo i latou lava, ae emo ane le ata ua faatau i le maketi, ma e le o se taimi muamua lea ua aumai faanana ai e le aiga lea pusa mago mai Samoa.

O pusa manapua sa aumai i Taiwan e se alii faipisinisi Asia ma le faaupuga, o manapua e faaaoga i luga o le vaa fagota. O ni isi o ia manapua o lo o gaosi i le aano o le povi.

Saunoa Lealao e faapea, o pusa mago ma pusa manapua na aumai, e lei aofia i le lisi o oloa sa fuafua e aumai, peitai na nana mai i lalo o isi oloa na aumai.

O oloa uma nei na susunuina e le Matagaluega i le vaiaso na te’a nei, ina ia mautinoa e le mafai ona sao atu i tua ni faama’i e ono maua mai ai.

“O le popolega sili ia te a’u ma le Matagaluega, o manapua na aumai e ono mafai ai ona aumai ai i le atunuu faama’i o lo o aafia ai aano o manu fasi o lo o tatou taumafai e tete’e atu, ae foliga mai e le o popole tagata mai Asia i lo tatou soifua maloloina ma a tatou tulafono, ae o lo o sili atu lo latou naunau i le tupe,” o le saunoaga lea a Lealao.

“Ua uma ona tuu atu i ai le fautuaga i le alii faipisinisi mai Asia lea na aumaia faanana oloa nei i le atunuu, faatasi ai ma isi foi tagata faipisinisi mai Asia o lo o faia lenei mea, ina ia tausisi i tulafono a le malo ma faamuamua le saogalemu o le soifua o tagata, aua tatou te le o o atu foi tatou i o latou atunuu ma soli tulafono a latou malo,” o Lealao lea.

“O le fautuaga, afai ua o mai iinei e faipisinisi ai, tausisi i le tulafono ma mulimuli i ai, ae aua le faia auala eleele e saili ai a latou tupe, ae mulimuli ane aafia ai le soifua maloloina o tagata lautele.”

“O lo o tele lava isi oloa mai fafo o lo o masalomia e le matou Ofisa o lo o aumai faanana e ni isi o le aufai pisinisi mai Asia e pei o vailaau ma fatu laau, e oo foi i moli Saina mai Samoa o lo o aumai faanana foi, ma o mea uma ia o lo o matua mataala i ai lo’u Ofisa, ina ia mautinoa e le sao atu se vaega o ia oloa  i totonu o le atunuu.”

O le mapuna a’e ai o lenei mataupu i le vaiaso na te’a nei, na lagalaga ai finagalo o ni isi o le aufai faatoaga a le atunuu, ma o latou faamatalaina ai gaioiga o lo o faia e tagata nei, o ni faiga e atagia mai ai le le kea i le tulafono a le malo, e le manatu mamafa fo’i i le saogalemu o le atunuu.

Saunoa Viliamu Livigisitone o se tama fai faatoaga mai Pava’ia’i ma le tina o Valasi Filiga mai Faleniu e faapea, e tatau i le Ofisa o Faatoaga ona matua mataala i tagata mai Asia ia o lo o fai pisinisi ma fai a latou faatoaga i le atunuu, leaga e le o popole tele i latou i le tulafono po o ni isi lava mea, ae pau lava lo latou faanaunauga, ia maua tupe i a latou pisinisi ma galuega o lo o faia.

Mo se faataitaiga o vailaau ia o lo o faaaoga e tagata Asia e tausi ai a latou faatoaga, e tatau ona matua mataalia i ai le Ofisa o Faatoaga e siaki ma vaavaai, poo talafeagai ma tulafono feterale, ina ne’i tutupu ai ni faama’i eseese i le atunuu ma aafia ai le soifua o tagata, e mafua i le sese o vailaau o lo o faaaoga.

“O isi mea o oloa o lo o faatau i faleoloa e pei o fualaau a le falema’i, o oloa o lo o tusia ai upu i le gagana Saina poo Kolea foi, faapea ai ma meaai, o mea uma nei e tatau ona mataalia i ai le Ofisa o Faatoaga faapea ai tagata taitoatasi, ina ia mautinoa e le faatamala i tatou i le tausiga o o tatou soifua maloloina,” o le saunoaga lea a Livigisitone.

Ae na faamautuina mai e Lealao e faapea, o le isi lea galuega tupito a lana matagaluega o lo o faia i le taimi nei, o le siaki o vailaau o lo o faaaoga e tagata fai faatoaga e aofia ai ma tagata mai Asia, ina ia mautinoa o lo o mulimulitai ma tausisia tulafono a le feterale.