Ua i ai se finagalo o le itumalo o Sua i le Falelima i Sasa’e, o le a tuuina atu sa latou talosaga tusitusia i le afioga i le kovana sili ia Lolo Matalasi Moliga, ina ia alofagia le itumalo e le’i maua lava sa latou sene apa mai le vaevaeina o le $1miliona a le Falelima i Sasa’e, a’o lea ua faalauiloa lana fuafuaga ua faia ina ia teu faatasi tupe o lo o totoe mai i ta’i $1miliona a Falelima e tolu i le atunuu i totonu o se teugatupe faapitoa a le malo.

O lenei mataupu na faato’a nofo malamalama i ai le itumalo o Sua ina ua lomia se ripoti a le Samoa News i le aso 17 o Me 2013 i auala na faaaoga i ai le $1 miliona a le Falelima i Sasa’e, atoa ai ma le finagalo o le alii kovana mo le teu faatasi o tupe o lo o totoe i se taugatupe faapitoa a le malo.

I se feiloaiga a le Samoa News ma le afioga Malepeai Setu i le amataga o le vaiaso na ia saunoa ai “O lea ua manino i le ripoti auala na faaaoga i ai tupe a le Falelima i Sasa’e, ma o le fesili lea ua tula’i mai i le taimi nei, o le pule a ai na faaaoga ai tupe a le Falelima i Sasa’e i auala eseese e pei ona taua i le ripoti a le Samoa News, e aofia ai ma le tuuina atu o le $50,000 e faatupe ai le aso o tagata Samoa i Hawaii (Samoa Heritage Week)”.

Na taua e Malepeai e faapea, e le o fesiligia e le itumalo o Sua aofa’i o vaega tupe tetele sa vaevaeina i itumalo taitasi o le Falelima i Sasa’e, po o ni isi tupe sa faatupe ai galuega mo le faaleleia o atina’e o itumalo taitasi o le Falelima, pau le itu o lo o fia malamalama i ai le itumalo o Sua, o le pule na mafua ai ona faamatuu atu le tupe e faaaoga i fuafuaga sa faia i fafo atu o le atunuu.

“O lea ua alu tupe e faatino ai fuafuaga nei a le malo ae o lea lava e nonofo tatali le itumalo o Sua po o afea e maua mai ai se vaega tupe e fesoasoani i le faaleleia o atina’e o le itumalo,” o le isi lea saunoaga a Malepeai.

E oo mai i le aso 6 Me 2013 na te’a nei, toe $29,804.31 le tupe o lo o totoe mai le $1miliona a le Falelima i Sasa’e.

Na faamaonia e Malepeai le tuuina atu atoa e le itumalo o Sua o le avanoa e fai ai o ia ma sui o le itumalo, mo le sailia o se fesoasoani e maua ai sa latou tupe mai le $1miliona a le Falelima i Sasa’e.

Na faamalamalama e Malepeai i le Samoa News e faapea, e $90,000 le tupe a le itumalo o Sua na maua mai ina ua vaevae le $1miliona a le Falelima ni Sasa’e, ma o lea tupe sa faamoemoe e vaevae i nuu e fitu o le itumalo e aofia ai Sa’ilele, Masausi, Masefau, Afono, Fagaitua, Amaua ma Lauli’i ma ua tuuina atu le latou lisi i le Ofisa sa gafa ma le vaavaaia o tupe na tuuina atu mo Falelima e tolu i le atunuu, i lalo o le taitaiga a le afioga a Tagaloa Toloa Letuli.

Saunoa Malepeai e faapea, ina ua la feiloa’i ma Letuli i le tausaga na tea nei ma tuuina atu i ai le lisi mo le vaevaeina o le $90,000 a le itumalo, sa saunoa atu Letuli ia te ia e “aua le popole o le a faia lava le tulaga ua vaevaeina i ai le tupe a le itumalo.”

Na maua le avanoa e fesiligia ai e le Samoa News le afioga a Letuli i le aoauli ananafi ma na ia taua ai e faapea, sa i ai lava le tupe na totoe a le Falelima i Sasa’e i totonu o le latou teugatupe talu mai le taimi na avea ai o ia ma taitai o lea ofisa.

Saunoa Letuli e faapea, o le faaiuga a le alii kovana ua i ai nei ina ia tuu faatasi tupe ua totoe mai le ta’i $1miliona a Falelima taitasi i totonu o le teugatupe faapitoa a le malo, o le “finagalo lava lea o le kovana fou ua i ai nei, e le malamalama ai foi i ai se isi.”

Na faafuase’i ona motusia le fesootaiga a le Samoa News ma Letuli a’o taumafai le Samoa News e fesiligia o ia e tusa ai ma le mafuaaga ua le maua ai e le itumalo o Sua la latou vaega tupe.  Na fiu le Samoa News e toe taumafai se fesootaiga ma le afioga Letuli, ae ua le toe maua se fesootaiga.

O le aso 28 o Tesema 2012 na taua e Letuli na faamavae mai ai i le ofisa na tofia i ai o ia e le kovana ua mavae atu ia Togiola Tulafono.

E toalua isi sui o le itumalo o Sua e le’i finagalo e faailoa o la suafa, peitai sa la faamaonia mai i le Samoa News le saunoaga a Malepeai e faatatau i le tupe a le itumalo.

Na taua e le isi o i laua ia e faapea, ana tuu atu e le itumalo le latou talosaga ma totogi mai loa e le Ofisa le tupe i le taimi lava lea, atonu e le pagatia faapea le itumalo o Sua, ae ua mafua ona tigaina le itumalo, ona ua faaaoga e le malo ua mavae atu se vaega tele o lea tupe e fai ai isi manaoga e pei o le aso faamanatu o Samoa i Hawaii ae pagatia ai le itumalo e oo mai lava i le taimi nei.