Ads by Google Ads by Google

Leai se tupe na pasia Paketi e totogi ai ni ‘payout’

MAGALEI:  LEAI SE TULAFONO NA SOLIA I LE FAIA O ‘PAYOUT’

 

Na taua e le Teutupe a le malo i lana molimau i luma o le komiti a le Senate i le vaiaso na te’a nei, e leai se tupe na faatulaga i le Paketi o le Tausaga Tupe 2013 mo totogi fa’ai’u (payout) o Faatonusili sa galulue i le nofoaiga a Togiola ma Faoa, pe’ita’i na faailoa e le alii senatoa ia Magalei Logovii lea sa teutupe i le taimi na totogi ai ‘payout’, e leai se tulafono na soli i le totogia o ‘payout’ e pei ona fesiligia e komiti.

 

O le vaiaso na te’a nei na toe faaauau ai le iloiloga a le komiti o le Faagaoiga o le Malo a le Senate, i lalo o le taitaiga a le afioga i le alii senatoa ia Galea’i M. Tuufuli, e fesiligia ai le mataupu i totogi faaiu sa totogi atu i ni isi o le nofoaiga na faatoa maea atu nei.

 

Na faailoa e Galea’ i le Teutupe a le malo ia Falema’o Pili se vaega o le molimau o le Faatonusili o le Ofisa o le Paketi, e faatatau i le $600,000 sa faatulaga i le paketi e faatupe ai totogi faai’u, na tali Falema’o, se’i o la toe feutana’i ma le tamaitai faatonu ia Catherine Aigamaua-Saelua e faatatau i le mataupu lea ona e le mana’o e eseese a la molimau e faatatau i lenei mataupu, ae i lana sailiiliga sa fai na ia maua ai, e leai se tupe i totonu o le paketi na faatulaga mo totogi faaiu.

 

Na fautua Galea’i ia Falema’o ina ia toe taga’i toto’a i le tulafono, afai fai mai le tulafono e le mafai ona faaaogaina se tupe se’i vagana ua faataga atu e le Fono Faitulafono, lona uiga e tatau ona mulimuli i le tulafono.

 

Na faatu e le afioga i le alii senatoa ia LeAtualevao S. Asifoa le mau ina ia faaagafua le auai o alii senatoa ia Magalei ma Soliai Tuipine Fuimaono i le iloiloga, ona o lea o lo o aofia ai o la igoa i le ripoti o le ‘payout’, peitai na saunoa Galea’i, e leai se malosi o le komiti e faaagafua ai alii senatoa mai le auai i le iloiloga, sei vagana lava ua la malilie e tula’i ese.

 

Ina ua fesiligia e le alii senatoa ia Saole Mila le teutupe pe sa i ai i le taimi na totogi atu ai ‘payout’ e pei ona fesiligia, ae na tali Falema’o, pe tusa o le 80% o le ‘payout’ e taunuu atu uma ona totogi.

 

Ae na saunoa Magalei, o ia sa tatau ona fesiligia e le komiti e faatatau i ‘payout’ ae le o Falema’o, aua o le ‘payout’ sa fai i le taimi na avea ai o ia ma teutupe, ae leai se mea o le a foa ai fua Falema’o ae le’i faimisa.

 

“E malamalama lelei lava Magalei i payout ia tou te vavao ai, e leai foi se tulafono na solia i le taimi na totogi atu ai tupe o le payout,” o le saunoaga lea a Magalei.

 

Sa ia faamanino foi i le komiti e faapea, o le ripoti ua tauaao e le komiti i le aofai o le tupe na alu i le ‘payout’, o lo o aofia ai ma i latou sa totogi i tupe mai le feterale.

 

Saunoa Galea’i, sa i ai le manatu o le komiti e faaiu lana iloiloga e ala i le fesiligia o Magalei, ae talu ai ua faauivalea le alii senatoa e faatatau i le mataupu, ua manatu ai le komiti o le a tuuina mai sana faaiuga i se taimi e faatatau i le tulaga lea.

 

Ae na taua e le alii senatoa ia Tuiasina S. Esera e faapea, o lea ua manino le fesili sa fia malamalama ai, pe agavaa le kovana ma le lutena kovana i livi ma’i ma livi tausaga, ae foliga soo se tofi na palota e le atunuu, e le agavaa i faamanuiaga nei, e ui o lea ua manino i le ripoti sa maua ai le totogi faaiu a le kovana ma le lutena kovana ua mavae atu.

 

O se tasi o atugaluga na taua e le alii senatoa ia Laolagi Fonoti Savali Vaeao, o le faaaoga o tupe feterale e totogi ai ‘payout’, ma e foliga mai o le isi lea mafuaaga ua ala ai ona manaomia e le feterale le toe totogi atu o ni isi o ana vaega tupe, ona e le o sa’o le auala o lo o faaaoga ai.