Ads by Google Ads by Google

Leai se tupe malo totogi ai poloaiga Fa’amasinoga

E na o le leai, leai, leai, na fa’aaoga e le Teutupe a le malo e tali atu ai, ina ua fesiligia e le ali’i loia ia Mark Ude, e uiga i le poloaiga a le faamasinoga e totogi ai e le malo le tupe e $321,398.93 i le kamupani a le Pacific International Engineering (PIE).

Na fesili Ude i le afioga ia Magalei Logovi’i pe na te iloa le mataupu e uiga i le poloaiga a le faamasinoga e totogi ai e le malo le tupe i le PIE, na tali Magalei ‘leai’. Sa toe fesili Ude pe na vaai i le kopi o le iuga a le faamasinoga, tali Magalei ‘Leai,’ ina ua toe fesili foi Ude pe na talanoa atu le Ofisa o le Loia Sili ia te ia e uiga i le poloaiga, na toe tali foi Magalei ‘Leai.’

O le mataupu lenei na afua mai ina ua faila e le PIE sana tagi faasaga i le malo, e mafua mai i le galuega mo le fausia o se auala i Ta’u, Manu’a i le 1991.

E silia i le $2 miliona na tagi ai le PIE e totogi atu e le malo, ona o le konekarate o le galuega sa latou faia, peitai i le faaiuga o se iloiloga sa faia i le 2010, na poloaia ai e le faamasinoga le malo na te totogia le silia i le $321,000 i le PIE, faatasi ai ma le tului e 6% sei vagana ua mae’a le totogia o lenei tupe.

Talu mai le taimi na tuuina atu ai le poloaiga a le faamasinoga, e le gata o lo o finau pea le malo e leai se tupe latou te totogiina ai le poloaiga, ae le’i totogia lava fo’i se sene o le tupe e pei ona taua, o le mafuaaga lea na faila ai loa e le loia a le PIE ia Ude se talosaga i le faamasinoga e fesiligia ai le malo i le mafuaaga ua le totogiina ai le tupe.

Na ulua’i talosaga Ude i le faamasinoga mo sana poloaiga, e faaaoga ai le tupe a le malo o loo i le Lesitala a le Faamasinoga e $250,000 e totogi ai se vaega o lana poloaiga, peitai o lea talosaga na teena e le faamasinoga.

Talu mai le taimi na tuuina atu ai le poloaiga a le faamasinoga, e lei totogiina lava e le malo se tupe, na i’u lava ina taumafai le alii loia ia Ude mo se auala e taofia faamalosi ai se tasi o ta’avale a le alii kovana ina ia mafai ai ona maua se tupe e totogi ai le poloaiga, peitai na taofia lea taumafaiga e le faamasinoga.

Na taua e Magalei i lana molimau i le vaiaso nei, o lana faamuamua lava e ave i le totogiina o pili a le malo ma ana tagata faigaluega, ae le ave sana faamuamua i ni pili e le’i tuuina atu ia te ia, e le’i vaai ai foi.

Na faailoa e Magalei i lana molimau i le faamasinoga, o lana matafaioi ia mautinoa e maua le tupe e totogi ai tagata faigaluega, lea e tusa ma le $3.3 miliona e alu ai faapea ai ma isi pili e manaomia ona totogi a le malo.

Sa ia faailoa foi i le faamasinoga, e lei i ai se taimi na tuuina atu ai e le Ofisa a le Loia Sili se poloaiga a le faamasinoga e uiga i lenei mataupu, poo se tupe foi e totogi, ae afai foi e tuuina atu ia te ia i se taimi, e tatau foi ona saili se auala e maua mai ai se alagatupe e totogi ai le poloaiga.

E le o se taimi muamua lea ua tulai mai ai ni mataupu e faia faasaga i le malo, ua tuuina atu ai e le faamasinoga sana poloaiga mo se vaega tupe e totogi e le malo.

O nisi o mataupu e masani ona manumalo ai itu tagi faasaga i le malo, o mataupu faasaga i le falema’i ona o nisi ua maliliu e mafua mai i se tautua ua faaletonu ona faia, a le o lea foi, o ni tagi faasaga i le faatamala o le malo i le faatinoina o ana matafaioi e pei o mu ma faalavelave e aafia ai tagata faigaluega a le malo poo ana mea totino.

Na talosaga le malo i le faamasinoga ina ia teena le talosaga a le PIE mo sana poloaiga e maua mai ai se alagatupe e faatupe ai le poloaiga ua maea ona tuuina atu.

Fai mai le malo, o le isi lala a le malo, le Fono Faitulafono, o loo i ai le malosi e faatonutonu ma faamaonia ai le faaaogaina o tupe mo le malo.

Na i’u lava foi ina taua e le malo e faapea, o se faaiuga ua tuuina atu e le faamasinoga i se taimi ua te’a, o loo taua ai le le tatau lea i le malo ona o latou faaaogaina tupe e le’i faatagaina mai e le Fono Faitulafono.

Na siitia e le malo se mataupu sa fofogaina i le 2000 i le va o le Fono Faitulafono ma Lutali, lea na faamanino ai i le faaiuga a le faamasinoga e faapea, o le matafaioi a le Fono o le faatonutonuina lea o auala e faaaoga ai tupe a le malo o Amerika Samoa.

Ua taoto atu nei lenei mataupu i se faaiuga a le afioga i alii faamasino o loo iloiloina lenei mataupu, lea e aofia ai Lyle L. Richond ma Mamea Sala Jr.