E ui i fautuaga ma finagalo mai ni isi o faipule o le maota o sui i le tatau lea ona su’e tagata faigaluega a le malo e aofia ai ma Leoleo po o latou tagofia fualaau fa’asaina, peita’i na fa’ailoa e le Ta’ita’i Leoleo ia Tauese Va’a Sunia, e le o i ai se tulafono e fa’amalosia ai le faia o suega e pei ona fesiligia fa’asaga i leoleo ma tagata faiglauega a le malo.

O se tasi lea o mataupu mai mataupu e tele na fetufaa’i ai le komiti o le Puipuiga o le Saogalemu Lautele a le maota o sui, ma molimau a le malo na valaau e molimau i le mataupu lea na tula’i mai i le Ofisa o Leoleo i le tausaga na te’a nei.

O le afioga i le tama’ita’i faipule ia Vui Florence Tuaumu-Saulo na fesiligia le mataupu lea i le Komesina tofia o Leoleo ia Save Liuato Tuitele pe mafai ona faia ni suega i tagata faigaluega a le malo e aofia ai ma leoleo i tulaga o fualaau fa’asaina, afai fo’i e mafai, o le a se vave e mafai ai ona fa’atino lea fuafuaga, ae pe fia fo’i se vaega tupe e mana’omia ai.

Saunoa Save e fa’apea, ua leva tele ona ia fa’alogo o pisa solo tala a le atunu’u i le tatau lea ona su’e tagata faigaluega a le malo atoa ai ma leoleo, po o latou fa’aaogaina fualaau fa’asaina.

E ui e taua finagalo ma fautuaga e fa’atatau i lenei mataupu, peita’i o le mea moni e pei ona fa’apupula e Save, e le faigofie le auala e fa’atino ai, e le vave fo’i se taimi e fa’atino ai, e mana’omia fo’i se vaega tupe e fa’atino ai lea fuafuaga.

Na fa’amanino e Save e fa’apea, e le gata e mana’omia se fale su’e toto e fa’amaonia mai ai suega e fai, ae tatau fo’i ona i ai se tagata e agava’a fa’aletulafono na te fa’atinoina le faia o suega, ina ia fa’amaonia ma aloaia o lo o sa’o ma talafeagai ma le tulafono.

“O le mea moni le mamalu o le maota, e le taugofie le fa’atupeina o le galuega atoa lenei, e tele se vaega tupe e manaomia e fa’atino ai le polokalame”, o le saunoaga lea a Save.

O le isi vaega na faamanino e Save, e tatau fo’i ona i ai se polokalame e fa’atula’i ina ia fa’a faigofie ai ona fa’agasolo su’ega e pei ona mana’omia, aua e le mafai ona fa’ailoaina i tagata o le suega lea la’a fai, ina ne’i faigata ai ona maua tagata o lo o fia su’e.

O le isi fa’afitauli e pei ona saunoa Save e ao fo’i ona silasila toto’a i ai i le polokalame pe afai e fa’atula’i, e le tutusa le umi e nofo ai le vailaau oona i totonu o le tino o le tagata.

Mo se fa’ata’ita’iga o le pauta o le aisa, pe tusa ma le 24 itula le umi e nofo ai i totonu o le tino o le tagata, se’i vagana ai le mariuana e tusa ma le 30 aso le umi e mafai ai ona maua pea i le tino o le tagata.

Sa i ai se mataupu faapea na taua e Save na tula’i mai i se taimi ua tuana’i, ina ua fa’aaoga e se foma’i se vaega e ta’u o le ‘field test’ e fai ai le su’ega i le tino o se tagata i tulaga o fualaau fa’asaina, peita’i sa teena e le fa’amasinoga le iuga o lea suega, ona o le auala sa fa’atinoina ai.

Na fa’ai’u le saunoaga a Save i lona fa’ailoa lea i le komiti, afai e mana’omia le faia o se su’ega faapea mo tagata faigaluega a le malo atoa ai ma leoleo, e manaia ae faaulu se tulafono ina ia mafai ai ona fa’amalosia lea tulaga.

Na fesili le afioga i le sui fofoga fetalai ia Fetu Fetui Jr i molimau, pe fa’ataga i lalo o le tulafono ona faia ni suega fa’asaga i tagata faigaluega a le malo e aofia ai ma leoleo.

Na saunoa le Ta’ita’i Leoleo ia Tauese e fa’apea, e le solitulafono le faia o su’ega fa’asaga i leoleo e pei ona fesiligia, pau le fa’afitauli o lo o i ai, e le o i ai se tulafono, peita’i na toe saunoa Fetui Jr e fa’apea, i lona lava talitonuga, e solitulafono pe afai e faia ni su’ega fa’asaga i leoleo mo fualaau fa’asaina, aua so o se mea lava e fai, e tatau ona malie i ai le tagata ona fa’atoa fa’atino lea.

Na fa’amanino foi e Tauese e fa’apea, talu ai o le ofisa o leoleo o se vaega o tagata faigaluega a le malo, o fa’atonuga uma lava mo le faia o ni suega e pei ona fesiligia, e sau mai le Matagaluega o Tagata Faigaluega a le malo.