Ads by Google Ads by Google

Leai se soifua na aafia ina ua mu se fale i Utulei

E leai se soifua na ma’imau po o se isi fo’i na manu’a i le taimi na faatamaia ai e le afi se fale o se aiga i Utulei i le aoauli ananafi.

 

Na pau le tulaga na maitauina e le Samoa News ina ua maea gaioiga a le Vaega Fuimu i le tau tapeina lea o le afi, na matua faatamaia uma le vaega i totonu o le fale, sei vagana ai le atigifale sa i ai pea ina ua maea le mu, lea e silia ma le itula o galulue ai le Vaega Fuimu i le faatinoina lea o le latou galuega.

 

O le te’a laititi o le itula e 12:00 i le aoauli ananafi na logoina ai e ni isi o le afioaga o Utulei loa le Ofisa o Leoleo i Fagatogo mo se fesoasoani, ina ua vaaia e ni isi o aiga tuaoi le pupusa a’e o se asu uliuli mai totonu o le fale na aafia, ae mulimuli mai ai tua le sasao o le afi.

 

Na taua e se molimau sa i ai i le taimi na amata sasa’o a’e ai le afi, o le fale ua faatamaia i le mu e nonofo ai se ulugalii ma le la tama e to’atasi, ae foliga mai e leai se isi sa i ai i totonu o le fale i le taimi na tula’i mai ai le fa’alavelave.

 

Na taua e se alii Fuimu e le faatagaina ona talanoa i tusitala i mataupu faapenei, e leai se isi sa i ai i totonu o le fale i le taimi na tula’i mai ai le mu, sei vagana ai meaaoga uma sa i totonu na faaleagaina uma i le afi.

 

E lei mafai e le tina e ana le fale na faatamaia ona faamaonia mai i le Samoa News se tau aofa’i o meatotino ua faaleagaina i le afi, e le’i to’a lelei fo’i lona mafaufau ina ua taumafai le Samoa News e fesiligia o ia e tusa ai o le fa’alavelave.

 

O le te’a laititi o le itula e 12:00 ae taunuu loa le ta’avale Fuimu muamua mai Fagatogo ma amata loa ona galulue alii Fuimu i le tapeina o le mu, lea fo’i sa mafai ona fesoasoani atu i ai nisi o le afioaga o Utulei sa mafai ona lolofi atu i le taimi o le faalavelave.

 

Pe tusa o le 20 minute talu ona galulue alii Fuimu i le tapeina o le afi ae vaaia loa le faaitiitia o le afi faapea ai ma le asu, ona taumafai loa lea o alii Fuimu e aga’i i totonu o le fale mo le faamae’ina o nai vaega o lo o alu a’e ai le asu mai totonu, peitai o le faafitauli na tula’i mai i le taimi lea, ua maea le vai sa i totonu o le taavale Fuimu, ae e le’i taunuu mai fo’i le ta’avale Fuimu mai le Ofisa o Leoleo i Tafuna.

 

Pe tusa ma le 30 minute na faatali ai le taunuu ane o le taavale Fuimu lona lua mai Tafuna, o le taimi fo’i lea na amata ai loa ona toe sasao le afi mai totonu o le fale, ma vaaia ai loa le tau fai pupusa a’e o itu e fa o le fale i le asu uliuli, mulimuli mai ai i tua ma le afi, ae ua na o le laulau tutu o le au Fuimu ma tagata fesoasoani ua le iloa se gaioiga e fai.

 

E fetaui le taunuu ane o le taavale Fuimu mai Tafuna ae o le taimi fo’i lea ua faatamaia uma totonu o le fale i le afi, ua leai ma se mea aoga o totoe ai.

 

Pe tusa o le isi 15 minute ae taunuu loa le taavale Fuimu mai le Ofisa o Leoleo i Leone, ma taumafai loa e fesoasoani atu i le tufaina atu o le vai e tape ai le afi.

 

E lei mafai ona faamaonia mai e se sui o le Vaega Fuimu i le Samoa News ananafi le mafuaaga o le afi, na pau le faamatalaga sa mafai ona tuuina mai, “se’i mae’a le su’esu’e i le mafuaaga tonu o le fa’alavelave ona tuuina atu lea o se ripoti i le Ofisa o Leoleo.

 

Ae na taua e se molimau sa i ai i le taimi na tupu ai le faalavelave i le Samoa News, o le itu i tua o le fale na amata vaaia ai le alu a’e i luga o le asu, ma faasolo atu ai loa i le pito i luma o le fale.