Ads by Google Ads by Google

Leai se sene mai le lafoga 2% ua taunuu i le LBJ

Talu mai le aso ananafi e le’i tauaaoina lava e le falema’i o le LBJ i Fagaalu se tupe mai le lafoga e 2% na pasia e le Fono Faitulafono i le tausaga na te’a nei, e tuuina atu e fesoasoani ai mo le falema’i i Fagaalu, e pei ona faaalia e le afioga i le alii faipule ia Faimealelei Anthony Fu’e Allen, o ia foi o se tasi o totino o le komiti faafoe na tofia e le kovana,

 

O le tulafono na pasia e le fono i le nofoaiga ua mavae atu, o le lafoga i totogi e 2% na pasia i le tausaga na tea nei, e totogi ai le $3miliona na tuuina atu i le falemai ma le faamoemoe, afai ae maea ona totogi le $3miliona, o le tupe e totoe ai e tuu sa’o atu mo le falema’i i Fagaalu.

 

I le taimi o folafolaga a le maota o sui i le aso ananafi, na faailoa ai e le alii faipule lenei mataupu i luma o le maota.

 

Saunoa Faimealelei e faapea, ua maitauina le i ai o suiga lelei i le falema’i i Fagaalu i le taimi nei, pau le faafitauli o lo o feagai ma le falema’i o le itu tau tupe.

 

Mo se faataitaiga e pei ona saunoa Faimealelei, i le Paketi o le tausaga tupe 2009, e na o le $30.1 miliona na pasia e le malo e tuu atu mo le falema’i, ae i le tausaga tupe lenei 2013, e na o le $34.5 miliona na pasia e faatupe ai galuega a le falema’i mo le atunuu.

 

Fai mai Faimealelei, e manaomia e le atunuu le tautua a le falemai ina ia siitia ma faaleleia, peitai e le mafai ona faatino lea tulaga pe afai ae leai se tupe e faatino ai.

 

“E oo mai lava i le taimi nei e le’i maua e le falema’i se sene mai le lafoga e 2% lea na pasia e le Fono Faitulafono i le tausaga na te’a nei, e fesoasoani ai i le tautua a le falema’i,” o le saunoaga lea a le alii faipule, ma ia talosagaina ai le komiti o le Paketi a le maota ina ia silasila toto’a i lenei mataupu.

 

I se tusi a le afioga i le alii faipule ia Larry Sanitoa i le pule o le falema’i ia Michael Gerstenberger i le vaiaso na te’a nei, na fesiligia ai e le alii faipule se tulaga ua i ai e 2% e pei ona taua.

 

O le mafuaaga na talosagaina ai e Sanitoa lenei mataupu, ona o lo o feagai pea le falema’i ma tulaga pagatia i le itu tau tupe.

 

Ina ua fesiligia e le Samoa News le afioga a Faimealelei i le aso ananafi sa ia taua ai e faapea, ua leva ona maea le totogiina o le $3miliona, ae oo mai lava i le taimi nei e le’i taunuu atu lava se tupe e totoe ai mai le lafoga e 2% i le falema’i, ae ina ua fesiligia e le Samoa News le teutupe a le malo ia Falema’o Phil Ma’o i le aoauli ananafi e faatatau i le mataupu lenei, na faamaonia mai ai e Falema’o e faapea, e le’i mae’a ona totogi le $3miliona sa tuuina atu i le falema’i, e le o iloa se taimi e maea ai.

 

O le tausaga na te’a nei na pasia ai e le Fono Faitulafono le paketi faaopoopo mai le faigamalo ua mavae atu, e tuuina atu ai le $3miliona mo le falema’i ae faatupe mai i lalo o le teugatupe a le Ofisa o Taui mo Tagata Faigaluega (Workmen Compensation) ma le faamoemoe, o le lafoga faaopoopo e 2% mo totogi o tagata faigaluega uma i le teritori, o le a toe totogi ai le $3miliona, o le tupe e totoe ai e tuu atu sa’o i le falema’i.

 

O le itula e 11:00 i le taeao o le aso Lulu o le vaiaso nei ua faamoemoe e faia ai le iloiloga a le komiti o le paketi a le maota o suiu, mo le fesiligiaina o lenei mataupu. O le a molimau i lea iloiloga le pulesili ma le teutupe a le falema’i, faapea ai ma le faatonusili o le matagaluega o le paketi a le malo.