Ads by Google Ads by Google

Leai se Ofisa EMS i le Ofisa o Leoleo i Leone ma Fagaitua

O se tasi o atugaluga o le atunuu ua i ai i le taimi nei, o le leai lea o se Ofisa a le EMS i nofoaga ua i ai Ofisa a leoleo i Fagaitua, atoa ai ma le Ofisa fou lea na faatoa tatala i le vaiaso na te’a nei i Leone.

E lei pine ona maea le tatalaina o le Ofisa fou o Leoleo i Leone, ae maua e le Samoa News se telefoni mai se sui o le Ofisa o le EMS e lei finagalo e faalauiloa lona suafa, ma faailoa mai ai se faafitauli ua tulai mai, ina ua faatonu e le Taitai o le Ofisa o Leoleo i Leone i latou e o ese ma le Ofisa.

Na taua e le sui o le EMS e faapea, sa tuuina atu ia te ia le ki o le Ofisa ma le faaupuga, o lo o i ai le Ofisa o le EMS i le Ofisa fou a Leoleo ua tatalaina nei i Leone, peitai sa toe faatonu o ia e le Taitai o le Ofisa o Leoleo i Leone e toe faafoi atu le ki, atonu ua sese ona tuuina atu le ki ia te ia.

O le aso Lulu o le vaiaso na te’a nei na faatonuina ai loa sui o le EMS sa i ai i le Ofisa o Leoleo i Leone, ina ia latou tuua le Ofisa o Leoleo.

Na taua e se sui o le EMS e lei finagalo e faailoa lona suafa e faapea, o se tasi o popolega ua tulai mai, ina nei avea le leai o se Ofisa e faamautu ai le tautua a le EMS i Ofisa o Leoleo i Fagaitua ma Leone ma itu e afaina ai le tautua mo le atunuu o lo o nonofo i afioaga mamao tua.

Na taumafai le Samoa News e fesiligia le Taitai o le Ofisa o Leoleo i Leone e tusa ai o lenei mataupu, peitai sa ia taua e faapea, o fesili uma e uiga i le mataupu lea e tatau ona tali mai ai le Sui Komesina o Leoleo, le tofa ia Leseiau Laumoli.

Na taua e le tofa Laumoli e faapea, talu ai e le o toe i ai le EMS i lalo o le faamalu a le Matagaluega o Leoleo, lona uiga foi lea, e le o toe i ai sa latou Ofisa i totonu o soo se Ofisa o Leoleo.

“E mafai ona latou faaaoga le Ofisa o Leoleo e togafiti ai a latou gasegase, pe malolo ai foi mo sina taimi, ae le o i ai sa latou Ofisa i Leone,” o le saunoaga lea a Laumoli.

E na o le lua nofoaga o lo o i ai Ofisa a le EMS i le atunuu i le taimi nei, o le nofoaga autu i Fagaalu, lea e faafeagai ma le Falemai o le LBJ, ma le isi a latou lala i le Falema’i i Tafuna.

faaliliu: Ausage Fausia