Ads by Google Ads by Google

Leai se malosi Teutupe taofi ai tupe pasia mo le LBJ

Na fa’ailoa e le Peresetene o le Senate i le Teutupe a le malo i le aso Tofi na te’a nei, e leai se mea na te taofia ai fua tupe na pasia atu e le Fono Faitulafono, e ave e fesoasoani ai i le faatautaiga o le falema’i o le LBJ i Fagaalu.

 

“E le i avatua ni tupe e totogi ai ni aitalafu a le malo, afai ua outou fa’aaoga tupe sa pasia atu e le Fono mo le falema’i e totogi ai aitalafu, lona uiga ua soli e le malo le tulafono, ua e solia fo’i le tulafono,” o le saunoaga lea a Gaoteote Palaie Tofau i le teutupe ia Dr. Falema’o ‘Phil’ Pili, i se iloiloga sa faia i luma o le Komiti o le Paketi a le Senate.

 

O saunoaga a le alii peresetene aga’i i le teutupe a le malo, sa tuuina atu i le taimi na talanoaina ai e le komiti ma le teutupe le ripoti a le teutupe e faatatau i le tupe sa maua mai e le malo i le lafoga o totogi e 2%.

 

E tusa ai o le ripoti a le teutupe, o le tupe atoa sa ao e le malo ina ua pasia le tulafono o le 2%, e $7.3 miliona, ma o lea aofaiga e aofia ai le $3.6 sa ao i le tausaga e 2012, ma le $3.7 miliona sa ao i le 2013.

 

I le talitonuga o le Fono e pei ona saunoa Gaoteote, i lalo o le tulafono na pasia e le Fono, a uma loa ona totogi le nonogatupe e $3 miliona mai le tupe e maua mai i le lafoga o totogi e 2% i le ‘Workmens Compensation Fund’, o le tupe atoa lava e totoe ai e tuuina atu i le falema’i, ona alu lea o le 50% e faatino ai galuega a le falema’i, ae o le isi 50% e faatupe ai le polokalame lea e auina ai gasegase i fafo mo togafitiga.

 

Na taua i le ripoti a le teutupe, e $1.5 miliona sa tuuina atu i le LBJ i le tausaga na te’a nei, fa’atasi ai ma isi vaega tupe o lo o totogi ta’i masina talu mai le amataga o le tausaga lenei, se’i vagana ai le $2.8 miliona o lo o ia taofia pea e le i tuuina atu i le falema’i.

 

Na faamanino atili e Pili e fa’apea, ua mafua ona ia taofia le tupe e le tuuina atu i le falema’i, ona e le tatau ia te ia o le teutupe ona tuuina atu se siaki i le falema’i ae le o i ai se tinoitupe i totonu o le teugatupe a le malo.

 

Sa ia taua fo’i e fa’apea, e ui o lea ua taua i faamaumauga le totogi mai e pisinisi o le latou vaega o le lafoga o totogi e 2% i le malo, peitai e na o fa’amaumauga o lo o i ai ae leai se tinoitupe.

 

Ua le gata i lea, o lo o i ai isi aitalafu a le LBJ i le malo e pei o le $1 miliona lea o lo o aitalafu ai le falema’i i teugatupe lautele a le malo (general fund), faapea ai ma le $5 miliona sa aitalafu i ni tausaga ua mavae, lea lava e oo mai i le taimi nei e le i totogia.

 

Saunoa Gaoteote e faapea, o isi uma vaega o lo o taua i le ripoti a le teutupe e leai ma se vaega o ia mea o taua i le tulafono na pasia e le Fono.

 

Na faailoa e le afioga i le alii senatoa ia Mauga Tasi Asuega, afai na pasia e le Fono le tulafono e ave ai tupe e totogi i le falema’i, lona uiga e tatau i le malo ona fa’ataua le tulafono.

 

“O lea e talanoa tatou i le falema’i o lo o gafa ma le tautuaina o le soifua ma ola o tagata, toatele tagata o lo o faatali mo se avanoa e auina atu ai latou i fafo mo togafitiga, a’o lea e taofiofi e le malo le tupe sa tatau ona tuuina atu i ai,” o le saunoaga faasea lea a Mauga.

 

Na taumafai Pili e tau faamanino atili le mafuaaga ua ala ai ona ia taofia le $2.8 miliona, ona e i ai pisinisi tua e le i totogiina atu la latou vaega mo lafoga o totogi a tagata faigaluega, ae na fa’auilavea le ali’i peresetene ma saunoa i ai e fa’apea, “Ou te le mana’o e te tau tigaina e fa’amatala mai ni isi mau tala, pau le fautuaga a le Fono, ave le tupe i le falema’i.

 

Na fesiligia e le afioga i le alii senatoa ia Soliai Tuipine Fuimaono le teutupe, le mafuaaga e tutusa ai numera o siaki sa totogi atu i le LBJ.

 

Na i’u lava i le tula’i o le alii senatoa ia Soliai ma savali i le laulau molimau o lo o alala mai ai le teutupe, ma fa’aali i ai le vaega o le ripoti o lo o faatatau i ai lana fesili, ina ua tali mai le teutupe e leai se ripoti fa’apena o ia taulimaina.

 

Mo se fa’ata’ita’iga, i le aso 6 Ianuari 2014 e pei ona taua i le ripoti, e fa’alua ona tuuina atu le siaki #698788 i le falema’i i le aofaiga e $63,248.83 ma le isi i le aofaiga e $64,459.71.

 

E fa’apena fo’i i le aso 3 Ianuari 2014, e fa’atolu ona tuuina atu le siaki numera 698747 i le aofaiga e $63,515.79; $65,932.37 ma le $64,688.80.