E leai se lafoga e totogi e tagata faimalaga i le va o Amerika Samoa ma Samoa pe afai e ui mai i le malae vaalele i Fagalii i siitaga fou ua fuafuaina e le malo o Samoa, sei vagana ai le malae vaalele i Faleolo ua faamaonia mai le totogi o le lafoga.

Na faamaonia mai e se sui o le kamupani vaalele a le Inter Island Airways i le Samoa News i le aso ananafi, e totogi le lafoga mo i latou e malaga mai i le malae vaalele i Faleolo, ae na taua e se sui o le kamupani vaalele a le Polenisia e faapea, e leai se lafoga e totogi e le latou kamupani vaalele i Fagalii, sei vagana ai le totogi (fee) mo le faaaogaina o le malae vaalele.

Soo se taimi lava e ui mai ai se tasi i le malae vaalele i Fagalii, e $30ST o loo totogi mo le faaaogaina o le malae vaalele, ma o le tupe lea o loo aofia i le pasese o loo totogi e le tagata malaga, peitai o le masina fou o Iulai o le a sii ai i le $40 le totogi lea.

Na taua e nisi o le atunuu sa ui mai i le malae vaalele i Fagalii, o loo i ai se tulaga le manino i se faasilasilaga o loo faapipi’i i le malae vaalele i Fagalii, ona o loo taua ai le i ai o le lafoga e totogi e le tagata malaga.

Ae mo le totogiina ai o le lafoga lenei, na taua ai e se tagata malaga, o le a avea ma alofaga mo tagata e ui atu i Faleoloa ae o le a filifili tagata e ui i Fagalii e leai se lafoga  o totogiina ai.

I se ripoti mai Samoa i le vaiaso na te’a nei, na taua ai le leai lea o se suiga i lafoga o loo totogi e tagata uma e malaga mai i Amerika Samoa nei, mai suiga ua faamamaluina e le malo o Samoa i le masina lenei o Iuni.

Na taua e se sui o le kamupani a le Polenisia i Tafuna e faapea, o le siitaga lea ua faamamaluina mai e le malo o Samoa, e aofia ai soo se tagata malaga e silia i le 8 itula talu ona taunuu lana malaga i Samoa.

O le amataga o le masina lenei o Iuni na faamamaluina ai le siitaga fou o lafoga e totogi e tagata faimalaga i le malae vaalele, e pei ona faalauiloa mai i se pepa o faamatalaga a le malo o Samoa.

O le lafoga mo tagata matutua o le a $65 ae o fanau e i le va o le 2 tausaga e oo atu i le 15 tausaga e $15, sei vagana ai fanau e i lalo o le 2 tausaga e le aofia ai i le lafoga lenei.