Ads by Google Ads by Google

Leai se iuga Senate i le faaiuga LBJ faasaga ia Dr. Iotamo Saleapaga

A’o le’i tapunia le Tauaofiaga a le Fono Faitulafono i le taeao ananafi, na tasi le faaiuga a le komiti o le LBJ/Soifu Maloloina a le Senate i le maea ai o se latou fonotaga faafuasei ma le Pulesili o le Falema’i a le LBJ, o le a taoto ai pea i le tulaga ua i ai le faaiuga a le LBJ faasaga ia Dr. Iotamo Saleapaga, sei toe taliu mai i fanua le taitaifono o le Komiti Faafoe a le falema’i o loo malaga i fafo.

O ananafi na atoa i ai aso e 45 o le tauaofiaga mulimuli a le Fono mo lana nofoaiga lona 32, peitai na toe faatopetope ai se feiloaiga a le komiti a le Senate ma le pulesili o le falemai, susuga Michael Gerstenberger, ona o le mataupu e faatatau i le konekarate a le alii foma’i ia Dr. Saleapaga.

O le iloiloga sa faia lea i le potu fono faapitoa a le Senate, lea sa na o sui o le komiti ma le pule o le falema’i na mafai ona auai. E le’i auai sui o ofisa faasalalau i le atunuu, peitai ina ua maea le fonotaga, sa maua ai loa se avanoa e fesiligia ai le taitaifono o le komiti, le afioga Galea’i Moaalii Tuufuli e tusa ai o mataupu o le fonotaga.

“O tuuaiga sa faailoa mai e le pule o le falemai e fai lava si matuia, o lea na ou logoina ai loa le peresetene e uiga i le mataupu, ma maua ai loa le avanoa matou te faasoa ai ma le pule o le falemai, ma iu ai loa la matou faaiuga, o le a taoto ai pea faapea le faaiuga a le falemai i le tulaga o loo i ai, sei foi mai le taitaifono o le komiti o loo malaga i fafo,” o le saunoaga lea a Galea’i.

Na taua foi e le alii senatoa e faapea, o lo o manino le tulafono i le va feagai o le falemai ma le Fono, e leai se malosi o le Fono e suia ai faaiuga a le falemai ma lana komiti faafoe ua faia, leaga o lo o faatulaga mai lava i le tulafono, na pau le malosi e oo i ai le fono o le faamaonia lea o tofiga a le kovana i totino o le komiti faafoe, ae o le komiti faafoe latou te faafoeina le falema’i.

O le mataupu lenei na auala atu i le peresetene o le Senate, ina ua faateia le alii foma’i e usu atu i lana galuega i le aso taeao ananafii, ae ona maua ai, e le gata ua le mafai ona toe ulufale i totonu o lona ofisa, ae ua le toe faafouina foi e le falema’i lana konekarate.

“Ua tasi la le faaiuga a le komiti, taatia ai faapea le faaiuga a le falemai i le alii foma’i, sei vagana ua atoa uma totino o le komiti faafoe latou te faia se faaiuga e uiga i lenei mataupu,” o le saunoaga lea a Galeai.

O le afioga i le taitaifono, ia Moananu Va, o lo o malaga i atunuu i fafo.