E ui o lea ua salalau fa’amatalaga salatua i le ono i ai o se fuafuaga a le Kolisi Tuufaatasi, e fa’amalolo ai nisi o ana tagata faigaluega, ona o tulaga faaletonu tau tupe ua alia’e mai, peita’i ina ua fesiligia e le komiti o Aoga a le Senate i le taeao ananafi sui o le Pulega, sa latou fa’amaonia ai, le leai o sa latou fuafuaga fa’apea.

O le iloiloga lea na talo e le sui taitaifono o le komiti o Aoga a le maota maualuga, le afioga i le alii Senatoa ia Velega Savali Jr, na afua mai ina ua maua tala i le tulaga o le a o’o i ai le kolisi, e mafua mai i fa’afitauli tau tupe.

Na fa’aalia e le afioga Senatoa Mauga Tasi Asuega fa’apea le afioga i le ali’i Faipule ia Tapumanaia galu Satele Jr., i luma o maota e lua ia ni fa’afitauli e ono tula’i mai i le kolisi ona o tulaga fa’aletonu i le tupe.

Na ta’ua e Tapumanaia, le ono vaea o ni faiaoga o le kolisi ma le ono faia o se solo tetee a nisi o faiaoga, ina ua le mafai e le kolisi ona totogi i latou.

Na taua e sui o le pulega a le kolisi i le komiti o aoga, e tusa ma le $900,000 le aofa’i o le tupe o lo o aitalafu ai le fono ia i latou, ma o lea tupe e aofia ai le $582,000 lea e le’i totogia talu mai le Tausaga Tupe 2011, ma le $200,000 mai le tausaga tupe lenei 2012.

E tai $600,000 e tatau ona totogi atu e le malo i le kolisi mo kuata taitasi, peitai o le kuata muamua o le tausaga tupe 2012 e $100,000 e lei maua atu, ma le  isi $100,000 mo le masina lenei o Ianuari o lo o faatali pea po o afea e totogi atu ai.

O le isi aitalafu tau tupe e $1.7 miliona, o pili a fanau aoga talu mai le 10 tausaga talu ai, e pei ona saunoa le  afioga ia Uta Dr. Laloulu Tagoilelagi, o se sui o le komiti faafoe a le kolisi.

Saunoa Uta, e ui o lo o i ai fanau aoga o lo o nofo aitalafu i le kolisi, peitai e le o avea lea ma tulaga e taofia ai le tatalaina atu pea o le avanoa e fa’aauau ai a latou a’oa’oga, ona o le manatu maualuga o le pulega a le kolisi, e taua atu le avanoa o lo o maua e fanau e a’oa’oina ai nai lo tupe, peitai o lo o latou taumafai pea i nisi auala e ao mai ai aitalafu a fanau e ala i feutanaiga  o lo o latou faia ma matua.

Saunoa Velega, o le isi faafitauli lea ua maitauina i le kolisi, o le tuai ona ao aitalafu mai pili aoga a fanau, aua o se vaega o le aitalafu e pei ona taua e ono le toe maua e le kolisi,  ona o nisi o i latou ia ua malaga ese ma le atunuu, ae o isi ua maliliu foi.

“E i ai lou talitonuga o nisi o tamaiti aoga ia o loo nofo aitalafu i le kolisi mai le 10 tausaga talu ai ua malaga ese atu ma le atunuu, o isi ua toe foi i atunuu na o mai ai, ae o nisi foi ua maliliu, ma o le isi lena tulaga faigata i le tou aitalafu e $1.7 miliona lea ua faailoa mai,” o le saunoaga lea a Velega.

E le o mautinoa e le kolisi pe fia se tupe o le aitalafu o loo i ai e mautinoa le toe maua mai, ma o le isi lea itu na auala atu ai fautuaga a le komiti,  ina ia silasila totoa i faafitauli faapenei i le lumanai, ina ia mautinoa e i ai ni faamaumauga e lagolagoina ai nei aitalafu, e le gata i lea, ua fautuaina foi le tatau lea ona i ai ni a latou fuafuaga e fai pe afai e tulai faafuasei mai se faafitauli tau tupe.

Sa i ai se fautuaga e ono i ai se fuafuaga a le Fono e faia ina ia tuuina atu ai se fesoasoani tau tupe mo le kolisi, ae i le maea ai o le iloiloga ananafi, na saunoa ai loa le tofa Velega, o le a le vave faia se fuafuaga a le Senate mo se pili tupe mo le kolisi, ona o lea o loo atagia mai le tulaga feololo o ana tupe i le taimi nei, e le pei o le tulaga pagatia o loo i ai isi lala o le malo e pei o le falemai ma le ASPA, lea ua faitau miliona ma miliona le aitalafu a le malo o loo i ai.