Ads by Google Ads by Google

Leai se fa’asalaga fa’afalepuipui fa’asaga ia Kim ma Samani

E lima tausaga lea ua fa’anofovaavaaia ai e le fa’amasinoga maualuga i le vaiaso nei, le ali’i faipisinisi ia Mike Kim ma lona soa tau ia Motau Samani e aunoa ma se fa’asalaga fa’a falepuipui la te tuliina, e ui i le matuia o le solitulafono mamafa ua ta’usala ai i laua i luma o le fa’amasinoga, le solitulafono o le tagofia lea o itutinosa o se tama’ita’i e talavou i lalo o le tulafono.

 

O le fa’asalaga fa’asaga ia Kim ma Samani, na tu’uina mai lea ina ua mae’a ona iloilo e ali’i fa’amasino fa’afinauga a loia sa tutula’i mo i laua ua molia, atoa ai ma le talosaga a le loia sa tula’i mo le malo ia Mitzie Jessop, lea sa ia augani ai i le fa’amasinoga ina ia fa’amama se fa’asalaga mo Kim, ona o tulaga fa’aletonu i lona soifua maloloina, aemaise ai o ia o se tagata ua matua lona soifua.

 

Na taua e Jessop i luma o le fa’amasinoga e fa’apea, e ui o lo o silafia e le malo le matuia o moliaga na ulua’i tu’uaia ai i laua ua molia, atoa ai ma le si’osi’omaga o le fa’alavelave sa tula’i mai, peita’i ua manatu le malo ina ia silasila toto’a pea le fa’amasinoga i le matua o le soifua o Kim aemaise ai le tulaga o lona soifua maloloina.

 

O Kim na ulua’i tu’uaia e le malo i moliaga mamafa e aofia ai faiaiga fa’amalosi ma se tama’ita’i e talavou i lalo o le tulafono; fesoasoani i se isi tagata e fa’atino le solitulafono o le faiaiga fa’amalosi i tama’ita’i talavou; faia o uiga mataga fa’a feusuaiga; fa’aleagaina o mea molimau a le malo; taumafai e ufiufi se solitulafono, atoa ai ma lona faia o ni amioga e ono lamatia ai le saogalemu o se fanau talavou.

 

I le fa’afinauga a le malo i le mataupu a Samani, sa finau ai Jessop ina ia fa’asala o ia i se fa’asalaga fa’afalepuipui.

 

Na taua e Jessop i le fa’amasinoga e fa’apea, i le avea ai o Samani o se tama e to’afa ona alo, o le tama’ita’i fo’i na a’afia sa pei lava o sona afafine, sa tatau lava ona ia iloa le mea sa’o e tatau ona fai.

 

O Samani ma ulua’i tu’uaia e le malo i moliaga e aofia ai le faiaiga ma se tama’ita’i e talavou i lalo o le tulafono; fesoasoani i se tasi e fa’atino le solitulafono o le faiaiga fa’amalosi; faia o uiga mataga fa’afeusuaiga, atoa ai ma lona faia o ni amioga e ono lamatia ai le saogalemu o fanau laiti.

 

O le mataupu ua ta’usala ai Kim ma Samani, na alia’e mai i le fa’alavelave lea na tula’i mai i le aso 29 Iulai 2010, ina ua aumai e Samani le tama’ita’i e 17 tausaga le matua na a’afia ma fai i ai, e maua lana galuega i le pisinisi a Kim o le Tumu’s Apartment i Tafuna.

 

Ina ua taunu’u Samani ma le tama’ita’i na a’afia i le Tumu’s Apartment, sa alu loa na o le tama’ita’i i totonu o le Ofisa o lo o i ai Kim ae fa’atali atu Samani i fafo, ma o iina na tula’i mai ai loa le solitulafono e pei ona ta’usala ai i laua e le fa’amasinoga, ina ua tagofia e Kim itutinosa o le tama’ita’i ma le fa’amoemoe e fa’amalie ai ona lagona tu’inanau.

 

E ta’i 20 masina na manatu le fa’amasinoga e fa’asala ai Kim ma Samani i le toese i Tafuna, o se tasi lea o tu’utu’uga o le la nofovaavaaia e 5 tausaga, peita’i ua manatu ali’i fa’amasino, o le a fa’amalumalu le tuliina o lea fa’asalaga fa’a falepuipui, fuafua lava i le usitaia e i laua o isi poloaiga a le fa’amasinoga.

 

O isi la poloaiga ua tu’uina atu ia te i laua, e aofia ai le totogi e Kim o le salatupe e $5,000 ae $3,000 mo Samani, ma e tatau ona totogi i totonu o le ulua’i 30 aso o le la nofovaavaaia.

 

Ua poloaina fo’i le lesitala o la igoa o ni tagata ua ta’usala i le faia o uiga mataga i fanau laiti, ma ua poloaina fo’i Samani na te tuua le teritori, i totonu o le 48 itula, talu mai le taimi na te totogiina ai le sala tupe, na aumau ai i fafo atu o le teritori mo le umi o lana nofovaavaaia o lo o totoe.

 

O le affoga i le ali’i fa’amasino sili lagolago ia Lyle L. Richmond na iloiloina le fa’asalaga a i laua nei, i lalo o le lagolagosua a Mamea Sala Jr ma Muasau Tasina Tofili.