E leai se fa’asalaga fa’a falepuipui ua tu’uina atu e le Fa’amasinoga Feterale i Uosigitone fa’asaga ia John Kruse ma lona faletua o Elaine Kruse, ina ua ta’usala i laua i le mataupu lea na la fa’aaogaina ai le lata i le $400,000 o tupe a le feterale e fa’atupe ai manaoga fa’aleaiga aemaise ai o le totogiina o aitalafu a le la pisinisi,  ae o tupe sa tu’uina atu ia te i laua i lalo o le polokalame o le ‘1602’.

O le fa’asalaga mo John ma Elaine Kruse e aofia ai le nofova’ava’aia mo le 4 tausaga, 8 masina e fa’asala ai fa’a falepuipui i le fale (home confinement), se’i vagana ai taimi e o ai e faigaluega, falema’i, lotu po o ni isi fo’i o taimi e o ai e fa’atino ni isi o fuafuaga masani fa’aleaiga.

Ua poloaina fo’i e le fa’amasinoga feterale le ulugali’i la te toe totogi i le malo feterale le tupe e $399,936.48.

E ui ua le taunu’u le fa’asalaga sa finau i ai le malo ina ia fa’a falepuipui le ulugali’i mo le 24 masina, ae na taua e loia a John ma Elaine, o le fa’asalaga nofovaavaaia ua tu’uina mai mo le ulugali’i, ua talafeagai fo’i lea mo i laua, e le gata o i laua o ni tagata lelei, ae ua la fa’ailoa fo’i i le fa’amasinoga le agaga salamo moni e tusa ai o le solitulafono sa laua faia.

Na taua e le sui sooupu a le FBI mai Honolulu ia Thomas Simon e fa’apea, o le mataupu fa’asaga ia John ma Elaine Kruse, sa matua galulue malosi ai le ofisa o le FBI i Honolulu ina ia su’esu’e mea uma sa tutupu, ona o le manatu ia alu sa’o lava tupe a le feterale i tagata Amerika Samoa o lo o mana’omia le fesoasoani, ae le o le alu i faiga le fa’amaoni fa’apea.

Ina ua fesiligia e le Samoa News le ali’i loia ia Goeoge Allen Dale sa tula’i o Elaine o lo o aumau i Uosigitone e tusa ai o le fa’asalaga a le fa’amasinoga, sa ia fa’amaonia mai ai i se imeli tuutuuga uma o le fa’asalaga nofovaavaaia fa’asaga ia Elaine.

Ae ina ua fesiligia le loia a John ia George S. Smith e tusa ai o le fa’asalaga a le fa’amasinoga feterale, na taua ai e Smith le talafeagai o le fa’aiuga ua tu’uina mai e le faamasinoga mo le ulugali’i, i le mae’a ai lea ona ta’utino o le ulugali’i i le la solitulafono sa fai, ma la fa’ailoa lo la taliaina o le gaioiga sa laua faia.

Na taua e Smith e fa’apea, o le ulugali’i a Kruse, o ni tagata lelei e silafia uma e le to’atele o tagata, ae o le mea sese sa laua faia, ua avea ma lesona aoga mo i laua.

E le i mafai e loia ona fa’amaonia mai le taimi tonu ma le aso e toe fo’i mai ai le uluali’i i Amerika Samoa.

O le susuga a Tiaotalaga John Kruse, o lo o avea ma Fa’atonusili o le Ofisa o Oloa a le malo, lea na ia tauaveina mai lenei tofiga i le 2013.

Ina ua fesiligia e le Samoa News le ali’i kovana e tusa ai o le fa’asalaga mo Kruse, na saunoa ai le tofa i le to’oto’o e fa’apea, e le manatu e vave tu’uina mai sana saunoaga e tusa ai o lenei mataupu, ae o le a fa’atali pea i le taimi e tu’u aloaia mai ai e sui o le FBI po o se sui o le fa’amasinoga feterale le fa’aiuga o lenei mataupu, ona fa’atoa mafai lea ona tu’uina mai sana saunoaga.