Ua toe fa’afo’i atu e le kovana i le Fono Faitulafono, la latou pil lea na pasia, e faasoasoa ai le $60.373 miliona, e avea ma Paketi a le ASPA, e aunoa ma sana faaiuga ua faia i ai.

I se vaega o le tusi a le afioga i le matua ia Togiola Tulafono na tuuina atu i taitai o le Fono, o le Mataupu 2 o le Vaega 9 o le Faavae o Amerika Samoa o lo o taua ai e faapea, afai e teena e le kovana se pili e pasia atu e le Fono, e mafai ona toe pasia e le fono e ala i le 2/3 o le maota taitasi.

Na ta’ua foi le alii kovana e faapea, o le pili lea ua ia toe faafoi mai e aunoa ma sana faaiuga ua faia i ai, e tutusa lava faaupuga o lo o i ai ma le numera, ma le isi foi pili na pasia atu e le fono, lea sa ia teena i le aso 9 o Fepuari 2012.

O lana fautuaga ua taoto atu i taitai o le fono tauala atu i lana tusi, o loo ia taua ai e faapea, afai e mafai e le fono ona toe tuuina atu ia te ia le kopi moni o le pili sa latou pasia, o le a mafai loa ona ia faatinoina lona malosi o loo faatulaga mai i le Faavae, lea e mafai ai ona ia tuuina atu i le Failautusi o le Initeria mo sana faaiuga i lenei mataupu.

Ua talosagaina foi e le alii kovana taitai o le fono ina ia tuuina atu faamaumauga uma i ripoti ma tusitusiga sa faia e komiti, e aofia ai iloiloga e uiga i lenei mataupu, ina ia tuuina atu faatasi ma le kopi o le pili ua fuafua e tuuina atu i le Failautusi o le Initeria mo sana faaiuga.

O le pili lea na pasia e le Fono e faasoasoa atu ai le aofaiga e $60.373 miliona mo le ASPA, sa faamoemoe le Fono e faatupe ai le paketi a le ASPA mo le umi e 6 masina, lea e amata atu ia Fepuari e oo atu ia Iuni, ona toe avatu ai loa lea o le isi paketi mulimuli mo masina e 3 o loo totoe ai mo le tausaga tupe lenei.

O le masina o Setema na te’a nei na pasia ai e le Fono le paketi a le ASPA mo le umi e tolu  masina,  lea e pei ona faasoasoa atu i ai le aofaiga e $30 miliona ma le faamoemoe,  e toe pasia atu le isi paketi e faaauau ai galuega a le ASPA i se taimi o i luma, lea e pei ona i ai le $60.373 lea na pasia i le masina na te’a nei, a’o lea foi ua toe teena e le alii kovana.

O le mataupui le va o le Fono ma le ASPA poo ai o loo i ai le malosi e pasia ai le paketi mo le ASPA, o se mataupu e le fou i le faafofoga a le atunuu, ona o lea lava e finau le Fono,  o i latou o loo i ai le malosi e pasia atu ai le paketi faafiu a le ASPA, peitai o loo finau mai foi le ASPA latou ia, o le latou komiti faafoe o loo i ai le malosi i lalo o le tulafono e pasia ai le latou paketi.

E le na o le pau lea o le pili na pasia e le Fono e faatatau  i le faafetoaiina lea o le malosi o loo umia e le ASPA, ae sa latou pasia foi le pili e toe faatulaga ai aiaiga mo le tofiaina o totino o le komiti faafoe a le ASPA, faatasi ai ma le pili e toe faafoi atu ai le ASPA i le malo, peitai e leai se pili o nei pili ua sainia e le alii kovana.