Ads by Google Ads by Google

Leai se Au Fusu AS mo le Oceania - Ausetalia

O lo’o ua fa’ailoa mai e le susuga le Peresetene o le ASBF Amerika Samoa Boxing Federation, Mapu Jamias, o le a leai se aufusu e auina atu mo le Oceania i Ausetalia i le vaiaso fou Mati 20-26, 2012), ona o le tulaga fa’aletonu o Tusi Folau o ali’i fusu fa’apea ma tupe fa’asoa a le ASNOC.

O nei ta’aloga e mafai ai e se ali’i fusu po o se ‘au fusu ona ausia so latou tulaga i totonu o ta’aloga fa’a Olimipeka a le lalolagi, lea e faia i Lonetona, i Egelani i le va o Iulai 28  ma Aokuso 12, 2012.

“O le fa’aletonu o le tusifolau o le atali’i o Alapati A’asa, e le o se tusi folau Amerika, ma ua le mafai ai ona ia suia Amerika Samoa i le Ta’amilosaga Fusu o le Oceania i lenei tausaga. O se mea lava e tasi na le mafai ai fo’i ona alu o ia i le Pacific Games i Noumea i le tausaga ua mavae.” O se fa’apupulaga mai lea a le ali’i Peresetene o le ASBF, Mapu Jamias, ma o le Taitaifono o le Komisi o Tagata Fusu ma le Talavou a le Amateur International Boxing Association i le Lalolagia toa.

Ona o Jamias o lo’o ia fa’amalosia aiaiga uma tau tagata fusu, tama ma teine, ua le mafai ai ona ia fa’aosofia lava se faiga sese i lea itu o le fa’agatama o Faipelega. E ao ia te ia, ona faia mea uma ma taga’i toto’a i le filiga o tagata fusu e auina atu mo ta’amilosaga fa’avaomalo ae maise o le tapenaga atu lea mo le Olimipeka i Lonetona i lenei tausaga.

Mo se tatou va’aigaga lautele i lea itu, e to’atele na’ua tama fusu e o mai i isi atunu’u, ae fusu mo isi malo, e aofia ai fo’i ma Amerika, peita’i, e saisaitia lava Amerika Samoa i lea va, aua o lo’o fa’aaogaina e Amerika Samoa le tusi folau Amerika.

O le isi maga o lenei fa’afitauli, o lo’o tatalia pea le tupe fa’asoa a le ASNOC e le’i fa’amatu’u maia i le OFC, ma ua le mafai ai fo’i ona latou fesoasoani e tapena le aufusu mo Ausetalia i lenei masina, e ui lava ona o lo’o i ai le isi vaega o tama fusu, e ese mai ia Alapati A’asa,  e mafai ona malaga mo lea fa’amoemoe.

O le a faia le fonotaga a le ASBF i se aso lata mai e talanoaina ai le fa’ateleina o le aotelega o talavou e tauva i lea fa’agatama, ma e tatau ai fo’i ona sailia ma ni tama’ita’i, aua o lea ua fa’amamafa mai e le AIBA ina ia fa’atautaia se liki fusu a le itupa o tama’ita’i i le fa’ai’uga o lenei tausaga.

O se tala mai le ali’i fesoasoani i le faia’oga fa’avaomalo a le ASBF, Norris Alai’asa, le susuga Sanele, ua ia fa’ailoa ai, “O lea ua toe tatala le potu mo koleniga o tama fusu i le Doc’s Gym i Lepuapua, ma e fa’atauanau atu i le vasega uma o talavou e fia auai i ni sipa po’o le koleni masani lava, ia o’o ane i ai i le Doc’s Gym i Lepuapua.