Na avea le leai o ni mau fa’amaonia e lagolago ai le tagi a James Barlow fa’asaga i le malo o Amerika Samoa, ma itu na talia ai e le Fa’amasinoga Maualuga le talosaga a le malo, e solofua le tagi na fa’aulu e le ali’i o Barlow fa’asaga i le malo.

O le afioga i le ali’i fa’amasino sili lagolago ia Lyle L. Richmond ma afioga i ali’i fa’amasino lagolago ia Mamea Sala Jr ma Muasau Tasina Tofili na iloiloina le fa’aiuga o lenei mataupu, i le mae’a ai lea ona latou iloiloina o mau fa’amaonia ma talosaga sa fa’aulu e itu e lua o lenei mataupu.

O le tagi a Barlow, lea o lo o taofia pea i le toese i Tafuna e fa’atali ai se fa’aiuga a le fa’amasinoga e tusa ai o tu’uaiga i lona faia o uiga mataga i ni tamaiti talavou se to’atolu i le tolu tausaga talu ai, na fa’aulu lea e lana loia muamua sa i ai o Mark Ude, e tuuaia ai le malo i lo latou fa’atamala i le tausiga ma le vaavaaiga o Barlow ao taofia ai o ia i le toese.

Na taua e Barlow lana talosaga e faapea, e lei mulimulita’i le malo i le fa’atinoina o ana tiute tauave e puipuia ai ona aia tatau ao taofia ai o ia i le toese, e pei o le leaga o le auala na tausi ai o ia ao i ai i le toese, atoa ai ma le faatamala o le malo e tuuina atu faamaumauga moni e tusa ai o se faalavelave na aafia ai Barlow i totonu o le toese.

Ae na taua e le loia a le malo ia Vincent Kruse e fa’apea, o faafinauga e pei ona taua e le itu tagi i le latou tagi, o faafinauga muamua lava fo’i ia na teena muamua e le fa’amasinoga i le tele o taimi e taumafai ai le itu tete’e e fa’aulu lenei talosaga i luma o le fa’amasinoga.

E talitonu fo’i le malo, e le gata e leai ni mau faamaonia e lagolago ai le tagi faaulu a le itu tagi faasaga i le malo, ae foliga mai foi o lo o latou taumafai e faia ni gaioiga ina ia faafoliga atu ai i le faamasinoga sa i ai moni se faatamala o le malo na tulai mai i lenei mataupu.

Na taua e le malo e faapea, e ui o lo o finau le itu tagi sa i ai manu’a na aafia ai Barlow i le umi na taofia ai o ia i le toese e fa’atali ai lona fa’amasinoga, peitai o lo o atagia i faamaumauga le leai o ni mau faamaonia na tuuina atu e Barlow ma lana loia e faamaonia ai sa i ai moni ni manu’a na aafia ai o ia.

E talitonu fo’i le malo, e le mafai e le fa’amasinoga ona latou faia ni suesuega faalilolilo i faamaumauga a le ofisa o le loia sili e sailia ai, pe sa i ai moni ni faamaumauga i se gaioiga tau solitulafono na tula’i mai i totonu o le toese faasaga ia Barlow.

Na finau le itu a Barlow sa i ai se fa’alavelave na fasi ai e se pagota ia Barlow ao taofia i totonu o le toese, ma o lea fa’alavelave na semanu a maliu ai o ia, peita’i e le o manatu le malo latou te fa’alauiloa ia fa’amaumauga.

O lea faafinauga e pei ona taua e le malo i lana talosaga, e leai ni mau e lagolagoina ai, e leai fo’i se fa’avae e faamaonia ai.

O tuuaiga a le itu tete’e i le faatamala lea o le aufaigaluega a le malo e tuuina atu vailaau ma fualaau mo togafitiga o Barlow ao i ai i le toese, ma o le gaioiga ua le amanaia ai ona aia tatau i lalo o tulafono tau soifua maloloina, na finau le itu a le malo, e lei mafai e le itu tagi ona latou fa’ailoa po o ai igoa o tagata faigaluega a le malo na faatamala e faatino ia gaioiga e pei ona tuuaia e le itu tagi.

I le mae’a ai ona iloilo e alii faamasino o talosaga a itu e lua ma faafinauga a loia, na faia ai loa le faaiuga ina ia fa’aleaoga le tagi a Barlow fa’asaga i le malo.